«AMANAT» توراعاسى ەرلان قوشانوۆ بەينەكونفەرەنتسيا بايلانىسى ارقىلى كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى رەفەرەندۋمدى قولداۋ ءۇشىن پارتيانىڭ رەسپۋبليكالىق شتابىنىڭ العاشقى جيىنىن وتكىزدى، دەپ حابارلايدى “ادىرنا” ۇلتتىق پورتالى.
جيىن بارىسىندا ەرلان قوشانوۆ پرەزيدەنتتىڭ جالپىۇلتتىق رەفەرەندۋم وتكىزۋ باستاماسىن قولداۋ جونىندەگى «AMANAT» پارتياسىنىڭ مالىمدەمەسىن جاريالادى.
«پرەزيدەنت قازاقستان حالقىنا جاريالاعان بيىلعى جولداۋىندا اۋقىمدى ساياسي رەفورمالار ۇسىندى. بۇل رەفورمالاردىڭ ماقساتى – حالىقتىڭ ءال-اۋقاتىن ارتتىرۋ، سۋپەرپرەزيدەنتتىك باسقارۋ فورماسىنان پارلامەنت پەن ءماسليحاتتاردىڭ ءرولى كۇشەيگەن ساياسي جۇيەگە كوشۋ، دەموكراتيالىق پروتسەستەر قارقىنىن ۇدەتۋ، ەلدەگى بىرلىك پەن ىنتىماقتى ارتتىرۋ»، - دەلىنگەن مالىمدەمەدە.
پارتيا توراعاسى اۋقىمدى رەفورمالار سايلاۋ، پارتيالىق جانە سوت-قۇقىقتىق جۇيەسىن، اۋماقتىق-تەرريتوريالىق قۇرىلىمى مەن مەملەكەتتىك بيلىكتىڭ ءبولىنۋ ءپرينتسيپىن تۇبەگەيلى وزگەرتەتىنىن اتاپ ءوتتى.
«بۇل – ەكىنشى رەسپۋبليكانىڭ ساياسي ىرگەتاسى. پرەزيدەنتتىڭ وسى تاريحي شەشىمدەرى – جاڭا ءارى ادىلەتتى قازاقستان قۇرۋ جولىندا جاسالعان ءىرى قادام. مۇنىڭ بارلىعى ساياسي باسەكەلەستىكتى كۇشەيتۋگە جول اشىپ، قازاقستان ازاماتتارىنا جاڭا ءارى تەڭ مۇمكىندىكتەر بەرەدى. مەملەكەت باسشىسى ۇسىنعان كەشەندى رەفورمالاردى جۇزەگە اسىرۋ ءۇشىن كونستيتۋتسياعا 33 وزگەرىس پەن تولىقتىرۋ ەنگىزۋ قاجەت. اتالعان وزگەرىستەردى قۇقىقتىق تۇرعىدا بەكىتۋ ءۇشىن پرەزيدەنت رەسپۋبليكالىق رەفەرەندۋم وتكىزۋدى ۇسىندى. كونستيتۋتسيانى جالپىحالىقتىق داۋىس بەرۋ ارقىلى وزگەرتۋ –«مەملەكەتتىك بيلىكتىڭ بىردەن-ءبىر قاينار كوزى – حالىق» دەگەن ءپرينتسيپتىڭ ءىس جۇزىندە ورىندالۋىنىڭ ايعاعى. «AMANAT» پارتياسى كونستيتۋتسيالىق رەفورمانىڭ ماڭىزدىلىعىن تەرەڭ تۇسىنە وتىرىپ، الداعى رەفەرەندۋمدى وتكىزۋدى تولىق قولدايدى!»، - دەدى ەرلان قوشانوۆ.
ونىڭ ايتۋىنشا، بۇكىلحالىقتىق رەفەرەندۋم مەملەكەتتىڭ ناقتى وزگەرىستەرگە بەت بۇرعانىن كورسەتىپ وتىر,سوندىقتان پارتيا بارلىق كۇش-جىگەرىن كونستيتۋتسيالىق رەفورمانى قوعامدىق قولداۋدى ۇيىمداستىرۋعا باعىتتاۋعا دايىن.
اقپاراتتىق-ءتۇسىندىرۋ جۇمىستارى مەن ءىس-شارالاردى ۇيىمداستىرۋ ءۇشىن پارتيا رەسپۋبليكالىق جانە 17 وڭىرلىك شتاب قۇردى. ولاردىڭ قۇرامىنا ورتالىقتاعى جانە وڭىرلەردەگى «AMANAT» اكتيۆتەرى كىرءدى. بۇل جۇمىسقا پارلامەنت پەن ماسليحاتتارداعى فراكتسيا دەپۋتاتتارى، زيالى قاۋىم وكىلدەرى، مادەنيەت پەن سپورت قايراتكەرلەرى، جاستار قاناتى مەن وڭىرلەردەگى فيليالدار اتسالىسادى. پارتيا مۇشەلەرى وڭىرلەردە جانە شالعاي ەلدى مەكەندەردە سايلاۋشىلارمەن كەزدەسەدى.
«مەملەكەت باسشىسى ۇسىنعان رەفورما – قازاقستاننىڭ ستراتەگيالىق بولاشاعىن ايقىندايتىن باستاما. ءبىز اشىق، وركەندەگەن، زاڭ ۇستەمدىك ەتەتىن، تەڭدىك ورناعان قوعام قۇرۋدى كوزدەپ وتىرمىز. پرەزيدەنت پەن حالىقتىڭ ماقساتى ورتاق، كوزدەگەنى ءبىر. سول سەبەپتى رەفەرەندۋمعا قاتىسۋ – بارلىعىمىزعا ورتاق بورىش! ەل تاعدىرىن ايقىندايتىن وسىناۋ ماڭىزدى كەزەڭدە ەشكىم شەت قالماۋعا جانە تاريحي تاڭداۋ جاساۋعا ءتيىس. ەگەمەن ەلىمىزدىڭ ەرتەڭى – حالىقتىڭ قولىندا!»، - دەدى ەرلان قوشانوۆ.
جيىن بارىسىندا شتابتاردىڭ جۇمىسىن جوعارى دەڭگەيدە ۇيىمداستىرۋعا قاتىستى بىرقاتار ناقتى تاپسىرما بەرىلدى.
“ادىرنا” ۇلتتىق پورتالى
