قازاقستاندا ايەلدەردى بولەك ۆاگونعا جايعاستىرۋ جوباسى قولعا الىنعاننان كەيىن ەر ادامدار "قازاقستان تەمىرجولى" ۇلتتىق كومپانياسىنا ارىز جازا باستادى. بۇل تۋرالى كومپانيانىڭ بۇقارالىق اقپارات قۇرالدارىمەن جۇمىس جونىندەگى دەپارتامەنت ديرەكتورى قايسار جۇمابايۇلى ايتتى، دەپ حابارلايدى «ادىرنا» ۇلتتىق پورتالى.
ايتا كەتەيىك، 2018 جىلى "تالگو" پويىزىندا بولعان ايەلدى زورلاۋ وقيعاسىنان كەيىن حالىق اراسىندا ايەلدەرگە ارنالعان كۋپەلەردى ەنگىزۋ باستاماسى كوتەرىلدى. 2021 جىلى ايەلدەرگە ارنالعان ۆاگوندار جوباسى قولعا الىنعان بولاتىن.
"وكىنىشكە قاراي، ەر ادامداردىڭ اراسىندا مۇنداي ۆاگوندار قۇقىعىمىزدى شەكتەيدى دەپ ارىزدانعاندار دا تابىلدى. ايەلدەر وسى باستامانى قىزۋ قولدادى. ەرلەر ءبىرىنشى بولىپ قولداۋى كەرەك قوي", - دەيدى جۇمابايۇلى.
ونىڭ سوزىنە قاراعاندا، جاڭا باستامانى دىنمەن بايلانىستىرعان ەر ادامدار دا بار. بىراق ونداي نورمانىڭ دىنگە ەشبىر قاتىسى جوق. بۇل – تەك قاۋىپسىزدىك ماسەلەسى. قازىرگى كەزدە ايەلدەرگە ارنالعان ۆاگوندار بەس باعىتتا قاتىنايدى. ولار:
الماتى - ماڭعىستاۋ;
الماتى - وسكەمەن;
الماتى - اقتوبە;
نۇر-سۇلتان - شىمكەنت;
الماتى - ماڭعىستاۋ.
الداعى ۋاقىتتا ۇلتتىق كومپانيا تالداۋ جۇمىستارىن وتكىزىپ، قاجەت بولعان جاعدايدا ايەلدەرگە ارنالعان ۆاگونداردى ارتتىرۋدى قاراستىرىپ وتىر. ورتاق جانە ايەلدەر ۆاگوندارىنىڭ باعاسى بىردەي.
الايدا جولاۋشىلار تاسىمالىنا جوعارى سۇرانىس بولعاندا، ماسەلەن، جازعى ۋاقىتتا مقنداي ۆاگونداردى ۇيىمداستىرۋ قيىنعا سوعادى.
«ادىرنا» ۇلتتىق پورتالى
