ماڭعىستاۋ وبلىسىندا اسكەر قاتارىنا الىنعانىنا ءۇش-اق كۇن بولعان جاس سارباز ەسىنەن اداسىپ، اۋرۋحاناعا ءتۇستى، دەپ حابارلايدى “ادىرنا” ۇلتتىق پورتالى “حابار 24” ارناسىنا سىلتەمە جاساپ.
19 جاستاعى تالعات ايمۇحانوۆ قۇرىق اۋىلىنداعى تەڭىز جاياۋ اسكەرىندە بورىشىن وتەۋدى باستاعان. الايدا اياق استى ءوزىن ءبىرتۇرلى ۇستاي باستاعان. قازىر وبلىستىق اۋرۋحانادا جاتىر. ساربازدىڭ تۋىستارى ونىڭ اسكەرگە ءوز ەركىمەن اتتانباعانىن ايتادى. ال اسكەريلەر باسقاشا ايتىپ وتىر.
ساربازدى وسىندا قۇرىق اۋىلىنداعى اسكەري بولىمشەدەن جەتكىزگەن. مۇنداعىلاردىڭ ايتۋىنشا، تالعات كەلگەننەن كەيىن 3 كۇن وتكەن سوڭ ءوزىن ءبىرتۇرلى ۇستاي باستاعان. جاۋىنگەردىڭ دەنساۋلىعىنا الاڭداعان بولىمشە باسشىلىعى دەرەۋ اقتاۋعا جىبەردى. قازىر دارىگەرلەر تەكسەرۋ جۇرگىزىپ جاتىر. ال تالعاتتىڭ اتا-اناسى بۇل جاعدايعا اسكەري قىزمەتكەرلەردى كىنالايدى.
“بالامدى اسكەرگە 14-ءى الىپ كەتتى. 18-ءى كۇنى حابار ايتىپ وتىر، ماماسىنا زۆانداعان بالاڭ ەس-ءتۇسسىز جاتىر، بالاڭدى قاراتۋىمىز كەرەك دەپ. اتى-ءجونىن بىلمەيدى، كەلمەسەڭىز بولمايدى دەپ. كەشكى ساعات 5-6-دا جەتتىك. بالانى كوردىك، ءوزىمىز شوك بولدىق، تانىماي قالدىم. بالام فۋتبوليست، سپورتسمەن بالا ەدى. ءوز ەركىمەن بارعان جوق، نەگىزى وقىپ جۇرگەن بالا ەدى، 11-ءى كۇنى تاڭەرتەڭ بارادى، مەد-تەن وتەيىن دەپ، ودان وتە الماي، سوسىن ۆوەنچاسقا ايتايىن وتە المادىم دەپ، ۆوەنكوماتقا بارادى. بارعان كەزدە 2 وفيتسەر ەكى جاعىنان ۇستاپ، اۋداندىق اۋرۋحاناعا اپارادى. كەشكە پويىزعا مىنگىزىپ جىبەرەدى بالامدى بەرسە، الىپ كەتەيىن دەپ تۇرمىن، بۇلار بەرمەي تۇر”،- دەيدى تالعاتتىڭ اكەسى.
تالعات ايتمۇحانوۆ ءتىپتى جاسىن دا ايتا الماعان. قازىر ساربازدىڭ جاعدايى بويىنشا اسكەري پوليتسيا تەكسەرۋ جۇرگىزە باستادى. قۇزىرلى مەكەمە وكىلىنىڭ مالىمەتىنشە، تالعات ايتمۇحانوۆ مەديتسينالىق كوميسسياعا كەلگەن كەزدە دەنساۋلىعىنا شاعىم بولماعان. ءتىپتى اسكەري بولىمشە باسشىلارى ونىڭ ءوز ەركىمەن وتان الدىنداعى بورىشىن وتەۋگە كەلگەنىن ايتادى.
“اسكەري شاقىرىلۋشى رەتىندە ايتمۇحانوۆ قارۋلى كۇشتەردىڭ قاتارىندا قىزمەت وتەۋگە ءوتىنىش ءبىلدىردى. وبلىستىق اۋرۋحاناعا جەتكىزىلدى. تەكسەرۋ ناتيجەسىندە مرت، ميدىڭ كت جانە ماماننىڭ كەڭەسى، دەنە جاراقاتتارى مەن قاۋىپتى پوتولوگيالارى انىقتالعان جوق. بيىلعى جىلدىڭ 19 مامىرىندا ماماندار قايتا تەكسەرۋ جوسپارلانىپ وتىر. اسكەرگە شاقىرۋشىنى مەديتسينالىق كوميسسيادان وتكىزىپ، ودان ءارى اسكەرگە جىبەرۋ ءۇشىن اۋداندىق قورعانىس ىستەر جونىندەگى بولىمگە ماجبۇرلەپ جەتكىزۋگە قاتىستى اقپارات ناقتى ەمەس. قازىر سارباز اتا-اناسىمەن بىرگە قالالىق اۋرۋحانادا جاتىر. پسيحياتر دارىگەر دەنساۋلىعىنا تاعى تەكسەرىس جۇرگىزبەك. ەگەر تالعات ايتمۇحانوۆتىڭ ەسى دۇرىس ەكەنى انىقتالسا، وعان اسكەري بورىشىن وتەۋدى جالعاستىرۋعا تۋرا كەلەدى”، - دەيدى 25744 اسكەري ءبولىمى كومانديرىنىڭ ورىنباسارى رەنات شاريپوۆ.
“ادىرنا” ۇلتتىق پورتالى
