برۋتسەللەز جۇقتىرۋ فاكتىلەرى شاحتينسك، تەمىرتاۋ جانە اباي اۋدانىندا تىركەلگەن. بۇل تۋرالى قاراعاندى وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ ءباسپاسوز قىزمەتى مالىمدەدى، دەپ حابارلادى “ادىرنا” ۇلتتىق پورتالى
«بيىل قاراعاندى وبلىسىنىڭ تۇرعىندارى اراسىندا العاش رەت انىقتالعان برۋتسەللەزدىڭ بەس جاعدايى تىركەلدى. بىلتىر وسى ارالىقتا تەك ءبىر ادام عانا برۋتسەللەز جۇقتىرعان ەدى. سونداي-اق، شەت، بۇقار جىراۋ، اباي، اقتوعاي جانە وساكاروۆ اۋداندارىندا ادامدار ءۇشىن برۋتسەللەز قوزدىرعىشىنىڭ نەگىزگى كوزى بولاتىن ءىرى قارا جانە ۇساق مال اراسىندا برۋتسەللەزدىڭ 391 جاڭا ەپيزووتيالىق وشاعى انىقتالدى»، – دەدى ءباسپاسوز قىزمەتى وكىلدەرى.
ينفەكتسيا قوزدىرعىشتارى ءسۇت ونىمدەرىندە، قيدا، پىشەندە جانە جانۋارلاردىڭ جۇنىندە انىقتالدى. بۇل ميكروبتاردىڭ سىرتقى ورتاعا تارالۋىن كورسەتەدى، ول ءوز كەزەگىندە ينفەكتسيانىڭ بەرىلۋ فاكتورى بولۋى مۇمكىن.
«برۋتسەللەز قاۋىپتى، سەبەبى كوپ جاعدايدا اۋرۋ ادامدا ينفەكتسيا اعىمىنىڭ سوزىلمالى ءتۇرى داميدى، ول ۋاقىتىلى مەديتسينالىق كومەككە جۇگىنبەگەن جانە ەمدەلمەگەن جاعدايدا مۇگەدەكتىككە اكەلۋى مۇمكىن. بۇل اۋرۋدىڭ ينفەكتسيادان كەيىن وتكىر كەزەڭى بولماۋى مۇمكىن جانە كلينيكا بىرنەشە ايدان كەيىن، ءتىپتى، بىرنەشە جىلدان كەيىن پايدا بولىپ جاتادى»، – دەپ تولىقتىردى وبلىستىق دەپارتامەنت.
سونداي-اق سانەپيدەميولوگتار تۇرعىنداردى ءسۇت جانە ءسۇت ونىمدەرىن تەك ۆەتەرينارلىق باقىلاۋى بار دۇكەندەردەن نەمەسە بازارلاردان ساتىپ الۋعا شاقىردى.
”ادىرنا” ۇلتتىق پورتالى
