«قىزىلوردا تازالىعى» جشس مەكەمەسىنىڭ قىزمەتكەرلەرى قالالىق قوعامدىق كولىكپەن تەگىن جۇرەدى. بۇل تۋرالى وبلىس اكىمى نۇرلىبەك نالىباەۆ مالىمدەدى، دەپ حابارلايدى «ادىرنا» ءتىلشىسى.
باسشىنىڭ تۇرعىنداردى جەكە ماسەلەلەرى بويىنشا قابىلداۋىنا كەلگەن "قىزىلوردا تازالىعى" كمم-ءنىڭ جۇمىسشىسى گۇلايىم قارعاباەۆا 18 جىلدان بەرى وسى قىزمەتتى اتقارا ءجۇرىپ، قوعامدىق كولىكتە ءجيى قاتىنايتىنىن جانە بۇل قالتاعا اجەپتەۋىر سالماق سالاتىنىن ايتىپ، ايماق باسشىسىنان كومەك سۇرادى.
وبلىس اكىمى "قىزىلوردا تازالىعى" مەكەمەسىنىڭ جۇمىسشىلارىنىڭ ەڭبەگى اسا جاۋاپتى ءارى قيىن ەكەنىن العا تارتىپ، قالا اكىمى اسىلبەك شامەنوۆكە 1 ماۋسىمنان باستاپ قوعامدىق كولىكتە تازالىقشىلار ءۇشىن تەگىن ءجۇرۋ بيلەتىن ەنگىزۋ قاجەتتىگىن تاپسىردى.
- كۇننىڭ ىستىق، سۋىعىنا قاراماستان ادال ەڭبەك ەتىپ، قالانىڭ تازالىعىن ساقتاپ جۇرگەن «قىزىلوردا تازالىعى» جشس جۇمىسشىلارىنا قۇرمەتىمىز ەرەكشە بولۋى ءتيىس. تاڭنىڭ اتىسى مەن كەشتىڭ باتىسىنا دەيىن كوشە ارالاپ جۇرەتىن ازاماتتارعا بارىنشا قولداۋ كورسەتىلۋى قاجەت. سول سەبەپتى، 1 ماۋسىمنان باستاپ بۇل مەكەمەنىڭ بارلىق قىزمەتكەرلەرىنىڭ قوعامدىق كولىكتە تەگىن ءجۇرۋىن ۇيىمداستىرۋ كەرەك، - دەدى ول.
«ادىرنا» ۇلتتىق پورتالى
