«قازاقفيلم» كينوستۋدياسىندا قازاق كينوسىنىڭ ابىزى، كەڭەس وداعىنىڭ جانە قازاقستاننىڭ حالىق ءارتىسى، قازاقستاننىڭ ەڭبەك ەرى ءاسانالى ءاشىموۆتىڭ 85 جاسقا تولۋىنا وراي سالتاناتاتتى شارا ءوتتى، دەپ حابارلايدى «ادىرنا» ءتىلشىسى.
جاقىندا عانا مەرەيتويىن اتاپ وتكەن دارىن يەسى ۇلتتىق كينەماتوگرافيانىڭ التىن قورىنا ەنگەن سۇلتان قوجىقوۆتىڭ «قىز جىبەك»، شاكەن ايمانوۆتىڭ «اتاماننىڭ اقىرى»، ءماجىت بەگاليننىڭ «تۇلپاردىڭ ءىزى»، حۋات احمەتوۆتىڭ «كا مىرزا، ءسىز كىمسىز؟» جانە باسقا دا كوپتەگەن فيلمدەردى جارىققا شىعارعان قازاق كينوسىنىڭ قارا شاڭىراعى – «قازاقفيلم» كينوستۋدياسىندا ءوزىنىڭ مەرەيتويىن ونەردەگى ارىپتەستەرى مەن جاقىندارىنىڭ ورتاسىندا اتاپ ءوتتى.
سالتاناتتى شارانى اشقان «قازاقفيلمنىڭ» پرەزيدەنتى اقان ساتاەۆ ءاسانالى ءاشىموۆتى 85 جاسقا تولۋىمەن قۇتتىقتاي وتىرىپ، قازاق كينوسىنىڭ اڭىزى اتانعان اكتەردىڭ ەلىمىزدىڭ مادەنيەتىنە قوسقان ەرەكشە ۇلەسى تۋرالى ايتىپ، وعان ۇزاق عۇمىر، زور دەنساۋلىق جانە وتباسىنا باق-بەرەكە تىلەدى.
كەش سوڭىندا قازاقتىڭ سالت-ءداستۇرى بويىنشا ءاسانالى اشىموۆكە قۇرمەت كورسەتىلىپ، اسىل تۇقىمدى تۇلپار تارتۋ ەتىلدى. سونىمەن قاتار، مەرەيتوي يەسىنە رەجيسسەر رەتىندە تۇسىرگەن جانە ءوزى تۇسكەن كارتينالاردان قۇرالعان فيلمدەر جيىنتىعى سىيعا بەرىلدى. ايتا كەتسەك، ولاردىڭ قاتارىندا ءاسانالى ءاشىموۆتىڭ مەرەيتويىنا وراي «قازاقفيلم» كينوستۋدياسى تۇسىرگەن رەجيسسەر تولەگەن نۇقىتوۆتىڭ «ءومىرىم-ونەرىم» اتتى دەرەكتى ءفيلمى دە بار.
مەرەيتوي يەسىن قۇتتىقتاۋعا كينوستۋديا قىزمەتكەرلەرىمەن قوسا ونەردەگى ارىپتەستەرى مەن شاكىرتتەرى، اتاپ ايتساق، بەلگىلى رەجيسسەر بولات قالىمبەتوۆ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ازامات ساتىبالدى، Nomad Stunts كاسكادەرلەر توبىنىڭ جەتەكشىسى جايداربەك كۇنعوجينوۆ، باۋىرجان قاپتاعاي، ايدوس بەكتەمىروۆ سىندى اكتەرلەر كەلىپ، جىلى لەبىزدەرى مەن تىلەكتەرىن ءبىلدىردى.
