26 ءساۋىر مەن 30 ءساۋىر ارالىعىندا ۆنۋكوۆو اۋەجايىنا بارعان 3 مىڭنان استام تاجىك ازاماتى بىرنەشە كۇن ەشقانداي جاعداي جاسالماعان رەسەي قاماۋىندا وتىرىپ، اقىرى 643 ازامات تاجىكستانعا دەپورتاتسيالاندى، دەپ حابارلايدى "ادىرنا" ۇلتتىق پورتالى «ازيا-پليۋس» اگەنتتىگىنە سىلتەپ.
دەرەككوزدىڭ حابارلاۋىنشا، تاجىكستاننىڭ تاعى 117 ازاماتىنا قاتىستى دەپورتاتسيالاۋ تۋرالى شەشىم قابىلدانعان.
«قازىر بۇل ازاماتتار دا ۆنۋكوۆو اۋەجايىنىڭ ۋاقىتشا ۇستاۋ يزولياتورىندا ادام تۇرا المايتىن جاعدايدا ۇستالىپ، وتانىنا كەتۋدى كۇتۋدە»، - دەپ اتاپ ءوتتى تاجىكستان رەسپۋبليكاسىنىڭ سىرتقى ىستەر مينيسترلىگى.
دەرەككوز وسىنداي قيىن جاعداي جۋكوۆسكي جانە دومودەدوۆو اۋەجايلارىندا دا ورىن العانىن اتاپ ءوتتى.
تاجىكستاننىڭ سىرتقى ىستەر مينيسترلىگى تاعى دا ەل ازاماتتارىنا رەسەي اۋماعىنا بارۋدان باس تارتۋدى قاتاڭ تۇردە ۇسىنۋدا.
ەسكە سالا كەتەيىك، 30 ءساۋىر كۇنى رەسەي تاراپىنىڭ وتىنىشىمەن تاجىكستان سىرتقى ىستەر ءمينيسترى سيروجيددين مۋحريددين رەسەيلىك ارىپتەسى سەرگەي لاۆروۆپەن تەلەفون ارقىلى سويلەسىپ، ماسكەۋدەگى تاجىكستان ازاماتتارىن تەكسەرۋ جايىن تالقىلاعانىن حابارلاعان بولاتىنبىز.
