رەسەيدىڭ ۋكرايناعا قارسى سوعىسى اياقتالۋعا جاقىن. مۇنداي پىكىردى تۇركيانىڭ سىرتقى ىستەر ءمينيسترى حاكان فيدان A Haber تەلەارناسىنا بەرگەن سۇحباتىندا ايتتى، دەپ حابارلايدى "ادىرنا" پورتالى «Anadolu» اگەنتتىگىنە سىلتەمە جاساپ.
ءمينيستردىڭ ايتۋىنشا، سوعىستىڭ العاشقى كەزەڭىندە ونى توقتاتۋدى قالاماعاندار بولعان، الايدا قازىر ولاردىڭ دا كوزقاراسى وزگەرىپ كەلەدى.
«مۇنداي كۇشتەر بولدى، سوندىقتان سوعىس ءۇش-ءتورت جىلعا سوزىلدى. بىراق ەندى ونى اياقتاۋدى قالاماعاندار دا باسقاشا ويلاي باستادى»، – دەدى ول.
فيداننىڭ سوزىنشە، ەۋروپا باسشىلارى دا وسى پىكىرگە كەلە باستاعان.
«انكاراعا كەلگەن ۇلىبريتانيا پرەمەر-ءمينيسترى مەن گەرمانيا كانتسلەرى دە پرەزيدەنت ەردوعانمەن كەزدەسۋدە وسى ماسەلەنى كوتەردى. مەنىڭ ويىمشا، بۇل سوعىس توقتاۋ نۇكتەسىنە ەڭ جاقىن ساتىندە تۇر»، – دەدى تۇركيانىڭ سىرتقى ىستەر ءمينيسترى.
مينيستر قازىر سوعىس «توزدىرۋ سوعىسىنا» اينالعانىن، مۇندا ەشكىم ناقتى جەڭىسكە جەتە المايتىنىن، كەرىسىنشە ەكى تاراپ تا ادام شىعىنى، قارجىلىق جانە ساياسي تۇرعىدا وتە ۇلكەن زارداپ شەگىپ جاتقانىن ايتتى. سول سەبەپتى بەيبىت كەلىسسوزدەر – ۋاقىت تالابى.
«بۇل سوعىس ەڭ اۋىر كەزەڭىن باستان وتكەرۋدە دەپ ويلايمىن. سەبەبى ەكى تاراپ تا ءبىر-ءبىرىنىڭ كولىك جانە ەنەرگەتيكالىق ينفراقۇرىلىمىن جويۋعا كۇش سالىپ جاتىر. تىعىرىققا تىرەلگەن جاعداي قالىپتاستى. ەشكىم العا جىلجي المايدى، جاعداي وزگەرمەي تۇر. سوعىس اياقتالۋى ءتيىس. ءبىز كەلىسسوزدەردىڭ ءسوزسىز ەكەنىن تۇسىنەمىز»، – دەدى ول.
فيدان ەۋروپا رەسمي تۇردە سوعىسقا قاتىسپاعانىمەن، ونىڭ اسكەري جانە قارجىلىق قولداۋى قاقتىعىستىڭ ءبىر بولىگىنە اينالعانىن اتاپ ءوتتى. ونىڭ ايتۋىنشا، سوعىسقا كەتەتىن شىعىن ءبىلىم، مەديتسينا، ينفراقۇرىلىم سياقتى سالالاردىڭ قارجىسىن ازايتىپ، سالىقتىڭ وسۋىنە جانە حالىق نارازىلىعىنا اكەلىپ وتىر.
تۇركيا سىرتقى ىستەر ءمينيسترى ديپلوماتيا ءالى دە باستى قۇرال ەكەنىن ايتىپ، بەيبىت پلاتفورما قۇرۋعا بولاتىنىنا سەنىم ءبىلدىردى.
ء«بىز بەيبىت پلاتفورما قۇرىلادى دەپ سەنەمىز. جەكە ءوزىم سەنەمىن. ول تۇركيادا نەمەسە باسقا جەردە بولۋى مۇمكىن، بىراق بەيبىت كەلىسىم تەك قاجەت ەمەس، سونىمەن بىرگە مىندەتتى دەپ ەسەپتەيمىن. وكىنىشكە قاراي، تۇسىنىكتى سەبەپتەرگە بايلانىستى بارلىق مالىمەتتى ايتا المايمىن، بىراق بۇل ورىن الادى دەپ سەنەمىن»، – دەدى فيدان.
بيىل كوكتەمدە ءۇش جىل ۇزىلىستەن كەيىن رەسەي مەن ۋكراينا اقش-تىڭ ارااعايىندىعىمەن تىكەلەي كەلىسسوزدەردى جانداندىرعان ەدى. ستامبۋلدا ءۇش راۋند ءوتتى، تاراپتار تۇتقىندار مەن قازا تاپقانداردىڭ دەنەلەرىن الماسۋ تۋرالى كەلىسكەن. الايدا جاڭا راۋندتار ازىرگە بەلگىلەنگەن جوق.
