الماتىدا اسكەري قىزمەتكەرلەر ەگدە جاستاعى ەر ادامدى ورتتەن قۇتقاردى. بۇل تۋرالى قورعانىس مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
جوندەۋ بازاسىنىڭ اسكەري قىزمەتشىلەرى ابىلايحان وماروۆ پەن تالعات ءابجانوۆ اۋلاسىندا اۆتوكولىك جوندەپ جاتقان ەدى. كورشى كوشەدەگى ءتۇتىندى كورىپ، كومەك سۇراپ ايقايلاعان داۋىستى ەستىگەن بەتتە ولار ءورت ورنىنا دەرەۋ جۇگىرىپ جەتكەن.
قالىڭ قارا ءتۇتىن جەكە ءۇيدىڭ اۋلاسىندا ورنالاسقان عيماراتتان شىعىپ جاتىر ەكەن. ابىلايحان مەن تالعات دۋالدان سەكىرىپ ءتۇسىپ، جانىپ جاتقان عيماراتتان ءبىر قارت ادامدى الىپ شىقتى. اسكەري قىزمەتشىلەر زارداپ شەگۋشىگە العاشقى كومەك كورسەتىپ، مەديتسينالىق جانە ءورت ءسوندىرۋ بريگادالارىن شاقىردى.
ءورت جاپسارلاس قۇرىلىستان تۇرعىن ۇيگە كوشۋى مۇمكىن دەپ قاۋىپتەنگەن ەفرەيتورلار وماروۆ پەن ءابجانوۆ ءورتتى سوندىرە باستادى. ولارعا تجد قىزمەتكەرلەرى كومەككە كەلدى.
زارداپ شەككەن ازامات ل.، 1963 جىلى تۋعان. ول ءۇش دارەجەلى كۇيىك الىپ، №4 قالالىق كلينيكالىق اۋرۋحاناعا جەتكىزىلدى.
ء"بىزدىڭ ورنىمىزدا كىم بولسا دا وسىلاي ىستەيتىن ەدى. مەديتسينالىق دايىندىق ساباقتارىندا ءبىزدى ءورت كەزىندە زارداپ شەككەندەرگە العاشقى كومەك كورسەتۋگە ۇيرەتەدى. بىراق ءبىز العان ءبىلىمىمىز ومىردە كادەگە جارايددى دەپ ەشقاشان ويلاماپپىز", - دەيدى ولار.
ءورت سوندىرۋدە جانە ادامدى قۇتقارۋ كەزىندە كورسەتكەن ەرلىگى ءۇشىن قورعانىس ءمينيسترى گەنەرال-پولكوۆنيك رۋسلان جاقسىلىقوۆتىڭ بۇيرىعىمەن اسكەري قىزمەتشىلەر "ەل قورعانى" ۆەدومستۆولىق مەدالىمەن ماراپاتتالدى.
”ادىرنا” ۇلتتىق پورتالى
