قر پارلامەنتى سەناتىنىڭ پلەنارلىق وتىرىسىندا دەپۋتات دانا نۇرجىگىت ايەلدەردىڭ زەينەت جاسىن تومەندەتۋدى ۇسىندى، دەپ حابارلايدى "ادىرنا" ۇلتتىق پورتالى "orda.kz"-كە سىلتەمە جاساپ.
– 2015 جىلى زەينەتكە شىعۋ جاسىن وزگەرتۋگە قاتىستى زاڭ قابىلدانعان كەزدە قازاقستانداعى ورتاشا جاس نەگىزگە الىندى. ول كەزدە 73 جاس ەدى. 2021 جىلى بۇل كورسەتكىش 70 جاس دەپ قابىلداندى. بۇۇ دەرەكتەرى بويىنشا قازاقستاندا 2022 جىلى ءومىر ءسۇرۋ ۇزاقتىعى – ايەلدەر ءۇشىن 78 جاس، ەرلەر ءۇشىن 70 جاس. الايدا، پاندەمياعا بايلانىستى بۇل كورسەتكىشتەر وزگەردى. بۇگىنگى تاڭدا قانداي بولجامدار بار ەكەندىگى تۋرالى ناقتى اقپارات جوق، – دەدى دانا نۇرجىگىت دەپۋتاتتىق ساۋالىندا.
ونىڭ پىكىرىنشە، كۇماندى كورسەتكىشتەرى بار مۇنداي ناقتى ەمەس مالىمەتتەر الەۋمەتتىك ماڭىزدى زاڭدى قابىلداۋعا نەگىز بولا المايدى.
– ۇلتتىق ستاتيستيكا بيۋروسىنىڭ مالىمەتتەرى بويىنشا، 2020 جىلى ءولىم-ءجىتىم 2019 جىلمەن سالىستىرعاندا 22% – عا ءوستى. كەيىنگى جىلدارى بۇل پروتسەسس توقتاعان جوق. وسىلايشا، الەمدىك بولجامدارعا نەگىزدەلگەن 2015 جىلعى زەينەتاقى رەفورماسى قازاقستانداعى بۇگىنگى جاعدايعا مۇلدەم سايكەس كەلمەيدى. جەتى جىل بۇرىن الەمدە قارت ادامدار سانى ارتىپ، ەڭبەككە قابىلەتتى ادامدار سانى ازاياتىنى ايتىلدى. الايدا، پاندەمياعا، الەۋمەتتىك-ەكونوميكالىق داعدارىسقا بايلانىستى بۇل بولجامدار دۇرىس ەمەس، – دەدى دانا نۇرجىگىت.
دەپۋتات ەگەر ازاماتتار بۇگىنگى زەينەتاقى زاڭناماسىنا سايكەس 60-63 جاسقا دەيىن جۇمىس ىستەيتىن بولسا، وندا ولار جۇمىس ورىندارىن بوساتپايتىنىن ايتتى. بۇل جاعدايدا جاس ۇرپاق ءۇشىن جۇمىس ورىندارى بوس بولمايدى.
– ءبىز سوڭعى ۋاقىتتا ۇكىمەت زەينەتاقى سالاسىنىڭ ماسەلەلەرىن قاراستىرىپ جاتقانىن جانە اۋىر جۇمىستاردا ىستەيتىن ادامدار ءۇشىن زەينەتاقى جاسىن قايتا قارايتىنىن بىلەمىز. مەنىڭ ار-ۇجدانىم ايەلدەردىڭ زەينەت جاسىن وزگەرتۋ تۋرالى تىلەكتەرىن ايتپاۋعا مۇمكىندىك بەرمەيدى. وسى وتىنىشتەرگە سايكەس ايەلدەر ءۇشىن زەينەت جاسىن – 58 جاس دەپ بەلگىلەۋدى سۇرايمىن. ەگەر ايەل ودان ءارى جۇمىس ىستەۋگە دايىن بولسا، وندا بۇل ونىڭ ەركىنە بايلانىستى، – دەدى دانا نۇرجىگىت.
"ادىرنا" ۇلتتىق پورتالى
