بوليۆيا استاناسى لا-پاس قالاسىنىڭ سوتى وسى ەلدىڭ بۇرىنعى پرەزيدەنتى جانين انەستى 10 جىلعا بوستاندىعىنان ايىردى. سوت انەستى "بيلىككە زاڭسىز جولمەن كەلدى، بوليۆيا ازاماتتارىن بۇلىككە تارتىپ، مەملەكەتتىك توڭكەرىس جاساماق بولدى" ايىپتادى، دەپ حابارلايدى "ادىرنا" ۇلتتىق پورتالى "ازاتتىققا" سىلتەمە جاساپ.
بۇل ايىپتاۋ 2019 جىلدىڭ قاراشاسىندا بوليۆيادا بولعان داعدارىسقا بايلانىستى بولاتىن. رەسمي مالىمەتكە قاراعاندا، 2006 جىلدان بوليۆيا پرەزيدەنتى بولىپ كەلە جاتقان ەۆو مورالەس پرەزيدەنت سايلاۋىندا جەڭگەن. الايدا مىڭداعان ادام قارسىلىق اكتسياسىنا شىققان سوڭ، مورالەس وكىلەتىن وتكىزىپ، ەلىنەن قاشىپ كەتكەن. بوليۆيا باسشىلىعى جاپپاي وتستاۆكاعا كەتىپ، سەناتورلار پالاتاسى توراعاسىنىڭ ەكىنشى ورىنباسارى بولىپ وتىرعان انەس وزىن بوليۆيانىڭ وتپەلى كەزەڭدەگى ۋاقىتشا باسشىسىمىن دەپ جاريالاعان.
2020 جىلى قازان ايىندا قايتا سايلاۋ ءوتىپ، مورالەستىڭ سەرىگى لۋيس ارسە جەڭىپ شىققان. ودان نەبارى بەس ايدان كەيىن انەس پەن سەرىكتەرى قاماۋعا الىنىپ، ولارعا "مەملەكەتتىك توڭكەرىس جاساماق بولدى" دەگەن ايىپ تاعىلعان.
Amnesty International حالىقارالىق قۇقىق قورعاۋ ۇيىمى انەستىڭ ۇستىنەن قىلمىستىق ءىس قوزعالعانىن "بوليۆيا بيلىگىنىڭ ادام قۇقىعىن كەزەكتى رەت تاپتاعانى" دەپ اتاعان، بىراق انەس ۇكىمەتى دە "قارسىلىق اكتسيالارى كەزىندە ادام قۇقىقتارىنا نۇقسان كەلگەنىن جەتكىلىكتى تەرگەمەگەنىن" مويىنداعان.
انەستىڭ ءوزى مەن جاقتاستارى "بيلىككە زاڭدى جولمەن كەلدىك" دەپ ەسەپتەيدى. ەكس-پرەزيدەنت "ساياسي قۋعىن-سۇرگىنگە ءتۇستىم، زاڭسىز سوتتالدىم" دەپ سانايدى.
ء"وزىمدى سوتتاپ وتىرعان سوتقا ءوزىمدى كىرگىزبەدى. الگى قورقاق قاشىپ كەتكەن سوڭ ونىڭ مىندەتىن موينىما الىپ، بوليۆيانىڭ زاڭدى پرەزيدەنتى بولدىم، سولاي قالا بەرەمىن ", – دەيدى انەس.
"ادىرنا" ۇلتتىق پورتالى