ەلجان ءبىرتانوۆ كەزەكتى سوت وتىرىسىندا وزىنە تاعىلعان ايىپتارمەن كەلىسپەيتىنىن جانە مەملەكەتتىك قىزمەتشى رەتىندە قانداي زاڭ بۇزعانى تۋرالى ءالى دە تۇسىنبەيتىنىن جەتكىزدى، دەپ حابارلايدى "ادىرنا" ۇلتتىق پورتالى "Azattyq Ruhy"-نا سىلتەمە جاساپ.
ەكس-مينيستر العاشقىدا مەملەكەتتىك بيۋدجەتتى تالان-تاراجعا سالدى دەگەن كۇدىككە ءىلىنىپ، كەيىن بۇل ايىپ قىزمەت بابىن اسىرا پايدالاندى دەگەن ايىپقا اۋىستىرىلدى. الايدا ءبىرتانوۆ بۇل ايىپتاۋدى نەگىزسىز سانايدى.
«مەملەكەتتىك قىزمەتشىنىڭ انتىن بۇزعانىم تۋرالى ايىپ تاعىلىپ وتىر. ايىپتاۋ تاراپىنان مەن انتتىڭ قانداي بولىگىن نەمەسە نورمالارىن بۇزعانىمدى ەستىگەن جوقپىن. وسىنى ءتۇسىندىرىپ بەرۋىڭىزدى سۇرايمىن. ماتەريالدا مەن قابىلداعان انتتىڭ ءماتىنى جوق. «ءبىرتانوۆ وسىنداي ارەكەتىمەن انتىن بۇزدى» دەيتىندەي ەشبىر فاكت كەلتىرىلمەگەن. مەن مەملەكەتتىك قىزمەتتە 30 جىل جۇمىس ىستەگەندىكتەن، مەن ءۇشىن مۇنى ءبىلۋ ماڭىزدى. ايىپتاۋدا مەنىڭ دەنساۋلىق ساقتاۋ ءمينيسترى رەتىندەگى قىزمەتتىك مىندەتتەرىمە قاتىستى دەرەكتەر كەلتىرىلگەن. وسى رەتتە مەن قانداي وكىلەتتىكتەردى تەرىس پايدالانعانىم تۋرالى ءتۇسىندىرىپ بەرۋىڭىزدى سۇرايمىن. مەن قانداي بىلىكتىلىك لاۋازىمدىق مىندەتىمدى بۇزدىم جانە قالاي بۇزدىم؟ جان-جاقتان ءتىنتىدى. بارلىق ەلشىلىكتەرگە وتىنىشتەر جىبەرىلدى، بارلىق تۋىسىمنىڭ بانكتىك شوتتارى ىزدەلدى، تەكسەرىلدى. قارجى مونيتورينگى اگەنتتىگى وتە مىقتى ۇيىم. ەگەر تاعىلعان ايىپ راس بولسا، ولار ءۇش جىلعا جۋىق ۋاقىت ىشىندە تابار ەدى. ەشتەڭە جوق، شوتتار دا، اۋدارىمدار دا جوق»، - دەدى ءبىرتانوۆ.
سوت ءوز كەزەگىندە تاعىلعان ايىپ ونىڭ مينيستر قىزمەتىن اتقارىپ جۇرگەن كەزىندە سول ۋاقىتتاعى ۆيتسە-مينيستر ولجاس ابىشەۆكە زاڭسىز بۇيرىق بەرىپ، جارامسىز پلاتفورمانى العاندىعىمەن بايلانىستى ەكەنىن تۇسىندىرمەك بولدى. سودان كەيىن ابىشەۆ تە ونىڭ جۇمىس ىستەمەيتىنىن بىلە تۇرا قابىلداۋ اكتىسىنە قول قويعانىن ايتتى. الايدا ءبىرتانوۆتىڭ ادۆوكاتى سۋديانىڭ بۇل ارەكەتىن پروكۋروردىڭ ءسوزىن قايتالاعانمەن تەڭ دەپ ءتۇسىندى.
«سىزدەردىڭ قازىرگى ارەكەتتەرىڭىز ءبىزدى قاناعاتتاندىرمايدى. ءسىز قازىر پروكۋرور شەكەنوۆتىڭ ايتقانىن قايتالاپ بەرىپ تۇرسىز. بۇل ءماتىندى ءبىز بۇعان دەيىنگى تەرگەۋ سۋدياسىنان دا ەستىدىك. قازىر سول ءماتىندى تاعى دا قايتالاپ وتىرسىز. ناقتى سۇراققا ناقتى جاۋاپ كەرەك. ءبىز قىلمىستىق ماتەريالدان ءتىپتى مەملەكەتتىك قىزمەتشىنىڭ انت ءماتىنىن دە تاپپادىق. تيىسىنشە «زاڭ بۇزۋشىلىق مەملەكەتتىك قىزمەتشىنىڭ انتىنىڭ قاي بولىگىنە قاتىستى؟» دەگەن سۇراق تۋىندايدى»، - دەدى قورعاۋشى.
ەلجان ءبىرتانوۆ پەن بۇرىنعى دەنساۋلىق ساقتاۋ ۆيتسە-ءمينيسترى ولجاس ابىشەۆ Ericsson Nicola Tesla كومپانياسى جاساعان اقپاراتتاندىرۋ پلاتفورماسىن قابىلداۋ جانە ىسكە قوسۋ ارقىلى بيلىكتى اسىرا پايدالاندى دەپ كۇدىكتەلۋدە.
قازاقستاننىڭ دەنساۋلىق ساقتاۋ مينيسترلىگى 2015 جىلى Ericsson Nicola Tesla-مەن 17,8 ملن دوللارعا اۆتوماتتاندىرىلعان اقپاراتتىق جۇيەسىن جەتكىزۋگە كەلىسىمشارت جاسادى.
پلاتفورما بىرىڭعاي دەرەكتەر قويماسىنا اينالۋى كەرەك ەدى، سونىمەن قاتار بارلىق دەنساۋلىق ساقتاۋ اقپاراتتىق جۇيەلەرىن بىرىكتىرۋى ءتيىس بولعان.
ءوز سوزىندە ەلجان ءبىرتانوۆ اتالعان ماسەلەگە قاتىستى قۇجاتتارعا قويىلعان قولداردىڭ بارلىعى زاڭ اياسىندا ورىندالىپ، بىرقاتار مامانداردىڭ كەلىسىمىمەن جاسالعانىن ايتۋدا.
«تاعى ءبىر ماسەلە – ايىپتاۋشى تاراپ قانداي نەگىزدە ماعان بۇيرىقتارعا قول قويۋدا كىنا تاعىپ وتىر؟ جۇمىس توبىن قۇرۋ تۋرالى بۇيرىق بار. بۇل بۇيرىقتار قىزمەتتىك حاتتار نەگىزىندە مينيسترلىكتىڭ كوپتەگەن جاۋاپتى قىزمەتكەرلەرىمەن قول قويۋعا كەلىسىلدى. قابىلداۋ كوميسسياسىنىڭ قۇرامىندا IT تەحنولوگيا باعىتىنداعى كاسىبي ماماندار بولدى. پلاتفورمانى قولداۋ، ازىرلەۋ، تەكسەرۋ جانە قابىلداۋ جۇمىستارىن سولار اتقاردى. ولار ءتيىستى قىزمەتتىك حات پەن اكتىلەردى جازدى. ءتيىستى تۇلعالار مامانداردىڭ وسى بۇيرىققا قول قويۋدا زاڭ بۇزۋشىلىق بولماعانىن ايتادى. ول بۇيرىقتى جالعىز مەن ويلاپ تاپقان جوقپىن! ول جەردە ورىنداۋشىلار دا بار. وتكىزىلگەن ەسەپتەرگە قارايتىن بولساق، پلاتفورمانى سىناقتان وتكىزۋ بارىسىندا بارلىعى ءساتتى جۇزەگە اسقان. ونى دالەلدەيتىن بارلىق تەحنيكالىق قۇجاتتار بار. ءاربىر كەزەڭ وڭ ناتيجەسىن بەرگەن. ال ەكى جىل وتكەننەن كەيىن مەنى قاماۋعا الىپ، بارلىعىن زاڭسىز دەيدى. بۇل جەردە مەن بۇيرىقتارعا قول قويا وتىرىپ، ءوز قىزمەتىمدى قالاي اسىرا پايدالاندىم؟» - دەدى ءبىرتانوۆ.
سونداي-اق اتالعان پلافتورمانىڭ جۇمىس ىستەۋ مۇمكىندىگىن تەكسەرۋ ماقساتىندا سوت ساراپتاماسى جۇرگىزىلگەن. ءبىرتانوۆ تەرگەۋشىلەر ونىڭ ناتيجەسىن تەرىسكە شىعارىپ وتىرعانىنا سەنىمدى.
«تەرگەۋ امالدارى پلاتفورمانىڭ جارامسىز ەكەنىن قانداي نەگىزدەرمەن بايلانىستىرىپ وتىرعانى مەن ءۇشىن تۇىسىنىكسىز. مەن سوت ساراپتاماسىن مۇقيات زەرتتەدىم. ول جەردە پلاتفورمانىڭ 2018 جىلى قانشالىقتى جۇمىس ىستەۋگە قابىلەتتى بولعانىن انىقتاۋ مۇمكىن ەمەستىگى جازىلعان. ويتكەنى پلاتفورما مەرزىمدى وزگەرىستەرگە ۇشىراعان جانە جەتىلدىرىلمەگەن. سونداي-اق 2020 جىلعى اقپانداعى پلاتفورمانى تەحنيكالىق تەكسەرۋ جانە 2020 جىلعى 16 ناۋرىزداعى ساراپتامالىق قورىتىندى اكتىلەرىندە اتالعان اقپاراتتىق جۇيەنىڭ كەلىسىمشارتتا قاراستىرىلعان تەحنيكالىق تالاپتارعا سايكەس كەلەتىندىگى جانە فۋنكتسيونالدىق ەسكەرتۋلەر جوق ەكەنى جازىلعان. بىراق وعان قاراماستان قىلمىستىق ءىس قوزعالدى. بۇل ماسەلەنى بۇعان دەيىن دە تالاي مارتە كوتەردىك. الايدا تەرگەۋشى «ءسىز جۇمىس ىستەمەيتىن پلاتفورمانى قابىلدادىڭىز» دەپ ايىپ تاعۋدا»، - دەدى ەكس-مينيستر.
ەلجان ءبىرتانوۆ بۇل ىسكە جوعارىدان ارنايى تاپسىرما بەرىلگەنىنە سەنىمدى.
«مەنىڭ تۇسىنىگىمدە، بۇل تەرگەۋشىنىڭ قيالىنان تۋعان ءىس. ياعني ول ءىستى قوزعادى جانە جازدى، ويتكەنى وعان جوعارعى جاقتان ناقتى تاپسىرما بەرىلدى. ەندى كەلىپ، ءسىز كىناڭىزدى مويىندايسىز با دەيسىزدەر، مەن مويىنداعاننان بۇرىن قانداي قىلمىس ەكەنىن ءالى تۇسىنە الماي جاتىرمىن؟» - دەدى ءبىرتانوۆ.
ەكس-مينيستر كومپانياعا تاعىلعان الاياقتىق ايىبى دا نەگىزسىز ەكەنىنە سەنىمدى. ايتۋىنشا Ericsson Nicola Tesla جاساعان جۇمىسى ءۇشىن ءتيىستى قاراجاتىن الدى جانە ول اقشا سول كەزدە بارلىق ماماندارمەن راستالعان.
سونىمەن قاتار، ەلجان ءبىرتانوۆ اتالعان پلاتفورمانىڭ جۇمىسقا جارامدى ەكەنىن ايتتى. الايدا بۇعاتتاۋدىڭ سالدارىنان ونى ىسكە قوسۋ مۇمكىن ەمەس بولىپ وتىر ەكەن.
«Ericsson Nikola Tesla كومپانياسى ءوزىنىڭ جۇمىسىن ورىندادى، تەستىلەۋدەن وتكىزدى. بىلتىر قازان ايىندا ولار وسى جاققا كەلىپ، توعجانوۆ مىرزادا جينالىس وتكىزىلدى. ولار ءبىر ايدان كەيىن پلاتفورمانى ىسكە قوسۋعا دايىن ەكەندەرىن ايتتى. ول ءۇشىن اقشا العان جوق جانە سۇراپ تا جاتقان جوق. الايدا مەنىڭشە قارجى مونيتورينگى جاساپ جاتقان قىسىمنىڭ سالدارىنان دەنساۋلىق ساقتاۋ مينيسترلىگى ودان باس تارتىپ وتىر. كومپانيا پلاتفورمانى قوسۋعا مۇمكىندىك سۇراپ وتىر، بىراق مۇمكىندىك بەرىلمەي وتىر. ويتكەنى مەنى ايىپتاۋ ءتيىمدى بولىپ وتىر. ەگەر دە پلاتفورمانىڭ ىستەيتىنى دالەلدەنسە، ارىپتەستەر شەندەرىنەن ايىرىلادى. ەگەر دە پلافتورمانى بۇعاتتاماسا، 2021 جىلى ونى ىسكە قوسۋعا بولار ەدى. قىلمىستى وسى جەردەن ىزدەۋ كەرەك»، - دەدى ءبىرتانوۆ.
سوت وتىرىسىنىڭ سوڭى ادۆوكات پەن سۋديانىڭ اراسىنداعى تۇسىنىسپەۋشىلىككە ۇلاسىپ، كەلەسى تىڭداۋدىڭ قاي كۇنى وتەتىنى سول كۇيى بەلگىلەنگەن جوق.
"ادىرنا" ۇلتتىق پورتالى
