دميتري روگوزين ەندى روسكوسموستىڭ باس ديرەكتورى ەمەس. رەسەي پرەزيدەنتى ۆلاديمير پۋتين ونى قىزمەتىنەن الىپ تاستادى، دەپ حابارلايدى “ادىرنا” ۇلتتىق پورتالى.
روگوزين كورپوراتسيادا 2018 جىلدان بەرى جۇمىس ىستەيدى. ەندى ونىڭ ورنىن رەسەي فەدەراتسياسى پرەمەر-ءمينيسترىنىڭ بۇرىنعى ورىنباسارى يۋري بوريسوۆ الادى.
مەملەكەتتىك كورپوراتسيا باسشىسى اۋىسادى دەگەن سىبىستىڭ شىققانىنا ءبىراز بولدى. بۇقارالىق اقپارات قۇرالدارىنىڭ حابارلاۋىنشا، اسكەري-ونەركاسىپ كەشەنىن قاداعالايتىن يۋري بوريسوۆ «ءىرى ونەركاسىپتىك اكتيۆتىڭ» باسشىسى بولادى دەپ بولجانعان. كەشە، مەملەكەتتىك دۋمادا كۇتىلەتىن كەزدەسۋ قارساڭىندا بۇل قاۋەسەتتەر ناقتىلانا ءتۇستى جانە روسكوسموس «ءىرى ونەركاسىپتىك اكتيۆ» بولىپ جاريالانباق.
65 جاستاعى يۋري بوريسوۆ ەكى كۇن بۇرىن رەسەي پرەمەر-ءمينيسترىنىڭ ورىنباسارى قىزمەتىنەن بوساتىلدى. ول بۇل قىزمەتتە 2018 جىلدىڭ مامىر ايىنان بەرى قىزمەت ەتىپ كەلەدى. وعان قوسا، رەسەي فەدەراتسياسىنىڭ باتىرى اتاعى دا بار.
سونىمەن قاتار، ءپۋتيننىڭ جارلىعىمەن
دەنيس مانتۋروۆ رەسەي پرەمەر-ءمينيسترىنىڭ ورىنباسارى – يندۋستريا جانە ساۋدا ءمينيسترى بولىپ تاعايىندالدى.
ايتا كەتەيىك، روسكوسموس — عارىش سالاسىن باسقاراتىن رەسەيلىك كورپوراتسيا. ول بايقوڭىر عارىش ايلاعىن پايدالانادى.
“ادىرنا” ۇلتتىق پورتالى
