ۇلىتاۋ جەرىندە ءانۋار وماروۆ ايتقان دەموكراتيالىق پرينتسيپتەردىڭ دامۋىنا كەدەرگى كەلتىرەتىن ءبىر جايت بار. ماسەلەن،ۇلىتاۋ اۋدانىنىڭ اكىمدەرى بىردەي رۋدا. ونى ۋيكيپەديادان ىزدەسەڭىز، كورە الاسىز. بۇل تۋرالى «سۇراۋى بار» يۋتۋب ارناسى دەرەكتى فيلم ءتۇسىردى، دەپ حابارلايدى «ادىرنا» ۇلتتىق پورتالى.
«ەڭ ءبىرىنشى سوققى جەرگە، رۋعا ءبولىنۋ. سول قازىر جەزقازعاندا بار. وسى ماسەلەدەن قۇتىلماي، بىزگە مىقتى باعدارلامالاردى ورىنداي قيىنعا سوعادى. بۇنىڭ ءبارى اكىمدىكتەردەن باستالادى. ۇلتتىق دەڭگەيگە كوتەرىلمەگەن جەردىڭ ءبىرى وسى جەر»، - دەيدى قازاقستاننىڭ قۇرمەتتى ءجۋرناليستى بازارباي الەۋحانۇلى «سۇراۋى بار» يۋتۋب ارناسىنا بەرگەن سۇحباتىندا.
بۇل پىكىردى ۇلىتاۋ اۋدانىنىڭ اكىمى دە قوستاپ وتىر. ايتۋىنشا، بىردەي رۋ ءبىر جەردە تۇرعان سوڭ ونداي بولادى. ال جۋرناليست بازارباي الەۋحانۇلى بۇل رۋشىلدىقتان قۇتىلۋىمىز كەرەك دەيدى.
«ەل بولۋ ءۇشىن رۋشىلدىقتان جوعارلاۋىمىز كەرەك. اركىم ءوزىنىڭ رۋىن، جەتى اتاسىن ءبىلسىن. ودان ەشكىم زارداپ شەكپەس. بىراق ونى مەملەكەتتىك ماسەلەلەرگە قوسىپ، مەملەكەتتىك ءىس-شارالاردى سوعان ساي وتكىزۋ استە مۇمكىن ەمەس. وندا تاۋەلسىزدىگىمىزدەن ايىرىلىپ قالامىز»، - دەيدى جۋرناليست.
«ادىرنا» ۇلتتىق پورتالى
