ۇلىتاۋ وبلىسى تۋرالى جەرگىلىكتى ءماسليحاتتىڭ شەشىمدەرى قانشالىقتى زاڭدى؟

4028
Adyrna.kz Telegram

ۇلىتاۋ وبلىسىن قۇرۋ تۋرالى پرەزيدەنت باستاماسىن ايماق حالقى قۋانا قابىلدادى. بۇل كوپتەن بەرى ايتىلىپ جۇرگەن ماسەلە ەدى. پرەزيدەنت " ۇلىتاۋ وبلىسى بۇرىنعى جەزقازعان وبلىسىنىڭ اۋماعىندا قۇرىلادى" دەگەن. الايدا قاراعاندى وبلىستىق ءماسليحاتى 2022 جىلعى 15 ساۋىردە سەسسيا وتكىزىپ، قاراعاندى وبلىسىنان ۇلىتاۋ وبلىسىنا جەزقازعان، ساتباەۆ، قاراجال قالالارى مەن ۇلىتاۋ، جاڭاارقا اۋداندارىن بەرۋ تۋرالى ۇكىمەتكە ۇسىنىس ەنگىزدى.

ۇسىنىس قانداي نەگىزدە جاسالدى؟ بۇل تۋرالى اشىق اقپارات بەرىلمەدى. ءوبلماسليحاتتىڭ سەسسياسى قارساڭىندا اسىعىس تۇردە جەزقازعان، ساتباەۆ، قاراجال قالالارى مەن ۇلىتاۋ، جاڭارقا اۋداندارى ءماسليحاتتارىنىڭ سەسسيالارى وتكىزىلىپ، بۇل سەسسيالاردا اتالعان اۋدان، قالالاردى جاڭادان قۇرىلاتىن ۇلىتاۋ وبلىسىنىڭ قۇرامىنان ەنگىزۋ تۋرالى ۇسىنىس جاساۋ جونىندە شەشىمدەر قابىلداندى. ال، جەرگىلىكتى ءماسليحاتتاردىڭ وسىنداي شەشىمدەر قابىلداۋى قانشالىقتى زاڭدى؟ مەنىڭشە، بۇل ەشقانداي زاڭعا ساي كەلمەيدى. بۇل -ءبىر.

ەكىنشىدەن، قازىرگى قاراعاندى وبلىسىنىڭ باسشىلىعى تەرريتوريانى بولمەس بۇرىن مىڭ ويلانىپ، ءجۇز تولعانۋى كەرەك ەدى. پرەزيدەنت جولداۋىنداعى ۇلىتاۋ وبلىسىن قۇرۋ تۋرالى باستامانى قالاي جۇزەگە اسىرۋعا بولادى دەگەن ماسەلە توڭىرەگىندە حالىقپەن كەزدەسۋ، ءتيىستى تۇسىنىك جۇمىستارى جۇرگىزىلمەدى. وبلىستى ءبولۋ كارۋ عالىمدارىنىڭ ەشكىم بىلمەيتىن الدەبىر ساراپاتاماسىنا سۇيەنىپ جاسالعانى ايتىلادى. سول ساراپاتاما نەگە حالىققا جاريا ەتىلمەيدى؟

ۇشىنشىدەن، اقتوعاي، شەت اۋداندارى مەن بالقاش قالاسى جەزقازعاننان قاشىقتا ورنالاسقاندىقتان حالىقتىڭ قاتىناسىنا قيىنشىلىق تۋدىرادى دەگەن بوس ءسوز. ويتكەنى، ەشكىم كۇن سايىن وبلىسقا شاپقىلاپ جاتقان جوق. تسيفرلاندىرۋ ساياساتى نە ءۇشىن جۇرگىزىلىپ جاتىر؟

تورتىنشىدەن، قاراعاندى وبلىسىنداعى 1,5 ملنعا جۋىق حالىقتىڭ جاڭا وبلىسقا اۋىساتىن بولىگى نەبارى 200 مىڭنان ءسال عانا استامىن قۇرايدى ەكەن. كوپتەگەن مەملەكەتتىك قۇرىلىمدار حالىق سانىنا بايلانىستى تۇزىلەتىنىن ەسكەرسەك، سوندا ولار قالاي جاساقتالادى؟ مىسالى،جاڭا وبلىستىق ءماسليحاتتا نەبارى 10 دەپۋتات بولادى ەكەن. وسى دۇرىس پا؟

بەسىنشىدەن، اقتوعاي، شەت، بالقاش قاشىق بولسا، وبلىس باسقا جولدارىن قاراستىرۋى كەرەك ەدى. مىسالى:

1.نۇرا اۋدانىنىڭ ۇلىتاۋعا جاقىن اۋىلدارىن جانە شۇباركول كەنىشىن ۇلىتاۋ اۋدانىنا قوسىپ، ۇلىتاۋدىڭ قۇرامىنداعى بۇرىن جەزدى اۋدانىنا قاراعان اۋىلداردى قايتا ءبولىپ شىعارىپ، وعان جەزقازعان قالاسىنىڭ قۇرامىنداعى ءۇش اۋىلدىق وكرۋگتى دە قوسا وتىرىپ، جاڭادان ۇلىتاۋ جانە جەزدى اۋداندارىن قۇرۋعا بولار ەدى.

2.شەت اۋدانىنىڭ قۇرامىنا قوسىلىپ كەتكەن بۇرىنعى اعادىر اۋدانىن تولىق قالپىندا قايتا قۇرىپ، ۇلىتاۋ وبلىسىنىڭ قۇرامىنا بەرۋگە بولار ەدى.

3.بالقاش پەن جەزقازعان تىعىز وندىرىستىك قارىم -قاتىناستا ەكەنىن ەسكەرىپ بالقاشتى مىندەتتى تۇردە ۇلىتاۋ وبلىسىنا قوسىپ، حالىققا ىڭعايلىلىق تۋدىراتىن جاعدايلاردى قاراستىرۋ كەرەك ەدى.

4.سوندا ۇلىتاۋ وبلىسىندا 300 مىڭنىڭ ۇستىندە حالىق، 4 اۋدان، 4 قالا ، بىرنەشە پوسەلكەلەر پايدا بولاتىن ەدى.

5. بۇرىنعى تورعاي وبلىسىنىڭ بىرنەشە اۋداندارى مەن ارقالىق قالاسىن جاڭادان قۇرىلاتىن ۇلىتاۋ وبلىسىنىڭ قۇرامىنا قوسۋعا مۇلدە بولمايدى. بۇل جاعدايدى ودان ءارى تومەندەتەدى. ويتكەنى، تورعاي دا، جەزقازعان دا ابدەن توزىعى جەتكەن وڭىرلەر. ولاردى ءبىر -بىرىنە قوسىپ ءوڭىردى كوتەرۋ اقىلعا سىيمايدى.

ابدوللا داستانوۆ،
"شىندىق" قوعامدىق بىرلەستىگىنىڭ توراعاسى،
"ايماق اقشامى" گازەتىنىڭ باس رەداكتورى.
ساتباەۆ قالاسىنىڭ قۇرمەتتى ازاماتى.

پىكىرلەر