تۇركىستان وبلىسى، ارىس قالاسىندا جۇمىسپەن قامتۋ جانە الەۋمەتتىك باعدارلامالار ءبولىمىنىڭ التى قىزمەتكەرى سوتتالدى. ولار پاندەميا كەزىندەگى توتەنشە جاعداي مەن شەكتەۋ شارالارىنا بايلانىستى ازىق-تۇلىك پەن تۇرمىستىق قاجەتتىلىككە بولىنگەن قاراجاتتى جىمقىردى دەپ ايىپتالدى. بۇل تۋرالى "ادىرنا" ۇلتتىق پورتالى حابارلايدى.
ارىس اۋداندىق سوتىنىڭ حابارلاۋىنشا، ايىپتالعان التاۋدىڭ قاتارىندا قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى مەن ونىڭ ورىنباسارى، كومەك سەكتورىنىڭ باس مامانى مەن ەسەپشىسى جانە ونىڭ ەكى كومەكشىسى بار. ولار تۇرمىسى تومەن تۇرعىندارعا بولىنگەن 120 ملن تەڭگەنى تالان-تاراجعا سالعانى ءۇشىن سوتتالدى. سوت وتىرىسىندا شەنەۋنىكتەردىڭ پاندەميا كەزىندە 29 ازاماتقا كومەك رەتىندە بولىنگەن 2 900 400 تەڭگەنى زاڭسىز اۋدارىپ العانى انىقتالعان.
«كوبىنشە وزدەرىنىڭ تۋىستارى مەن تانىستارىنان تۇراتىن ارىس قالاسىنىڭ 138 ازاماتىنا اقشالاردى نەگىزسىز، زاڭسىز اۋدارعانى انىقتالعان. مەملەكەتكە جالپى سوماسى 123 493 688 تەڭگە ماتەريالدىق زالال كەلتىرگەن»، دەلىنگەن سوتتىڭ حابارلاماسىندا.
سوت ۇكىمىنە سايكەس ءبولىم باسشىسى مەن ونىڭ ورىنباسارىنا قىلمىستىق كودەكستىڭ 189-بابى 4-بولىگى 2-تارماعى «اسا ءىرى مولشەردەگى سەنىپ تاپسىرىلعان بوتەن مۇلىكتى يەمدەنىپ الۋ نەمەسە تالان-تاراجعا سالۋ» بويىنشا كىنالى دەپ تانىلىپ، 7 جىل مەرزىمگە باس بوستاندىعىنان ايىرۋ جازاسى تاعايىندالدى. ولارعا ءومىر بويىنا مەملەكەتتىك قىزمەتتە ەڭبەك ەتۋگە تىيىم سالىندى. سونداي-اق، ءبولىمنىڭ باس مامانى ءۇش باپ بويىنشا كىنالى دەپ تانىلدى. ال، ەسەپشىنىڭ كومەكشىسى 189-بابى 4-بولىگى 2-تارماعى، 28-بابى 5-بولىگى، 190-بابى 3-بولىگىنىڭ 2,4-تارماقتارى بويىنشا كىنالى دەپ تانىلىپ، 7 جىلعا باس بوستاندىعىنان ايىرىلدى.
«سونىمەن بىرگە، ءىس بويىنشا ازاماتتىق تالاپ قويۋ ارىزى ءىشىنارا قاناعاتتاندىرىلىپ، سوتتالۋشىلاردان مەملەكەت پايداسىنا ورتاق تارتىپپەن جالپى سوماسى 113 788 348 تەڭگە (قالعان سومالار تولەنىپ قايتارىلعان) كەلتىرىلگەن زالال مەن وسىنىڭ 3 پايىزى كولەمىندە مەملەكەتتىك باج ءوندىرىلدى» دەلىنگەن حابارلامادا.
دەگەنمەن ەسەپشىنىڭ كومەكشىسى قىزمەتىن اتقارعان ايىپتالۋشى قىلمىستىق كودەكستىڭ 74-بابى 1-بولىگىنە سايكەس، ياعني جۇكتى نەمەسە جاس بالالارى بولۋىنا بايلانىستى جازاسىن تەك 5 جىلدان كەيىن وتەيتىن بولدى. ال، وعان دەيىن پروباتسيالىق ەسەپتە تۇرادى. سونىمەن قاتار، ەسەپشىنىڭ تاعى ءبىر كومەكشىسى مەن ءبولىمنىڭ كومەك سەكتورىنىڭ باس مامانى دا قىلمىستىق كودەكستىڭ 189-بابى 4-بولىگى 2-تارماعىمەن كىنالى دەپ تانىلدى. ونىڭ بىرىنە 7, بىرەۋىنە 2 جىل باس بوستاندىعىنان ايىرۋ جازاسى تاعايىندالدى. ولار دا جازاسىن بەس جىلدان كەيىن وتەيتىن بولدى. جۇمىسپەن قامتۋ ءبولىمىنىڭ باسشىسى، ورىنباسارى جانە ەسەپشى جازالارىن قاۋىپسىزدىگى ورتاشا تۇزەۋ مەكەمەسىندە وتەيدى.
سوت ۇكىمى ءالى زاڭدى كۇشىنە ەنگەن جوق.
"ادىرنا" ۇلتتىق پورتالى
