Túrkistan oblysy, Arys qalasynda jumyspen qamtý jáne áleýmettik baǵdarlamalar bóliminiń alty qyzmetkeri sottaldy. Olar pandemııa kezindegi tótenshe jaǵdaı men shekteý sharalaryna baılanysty azyq-túlik pen turmystyq qajettilikke bólingen qarajatty jymqyrdy dep aıyptaldy. Bul týraly "Adyrna" ulttyq portaly habarlaıdy.
Arys aýdandyq sotynyń habarlaýynsha, aıyptalǵan altaýdyń qatarynda qalalyq jumyspen qamtý jáne áleýmettik baǵdarlamalar bóliminiń basshysy men onyń orynbasary, kómek sektorynyń bas mamany men esepshisi jáne onyń eki kómekshisi bar. Olar turmysy tómen turǵyndarǵa bólingen 120 mln teńgeni talan-tarajǵa salǵany úshin sottaldy. Sot otyrysynda sheneýnikterdiń pandemııa kezinde 29 azamatqa kómek retinde bólingen 2 900 400 teńgeni zańsyz aýdaryp alǵany anyqtalǵan.
«Kóbinshe ózderiniń týystary men tanystarynan turatyn Arys qalasynyń 138 azamatyna aqshalardy negizsiz, zańsyz aýdarǵany anyqtalǵan. Memleketke jalpy somasy 123 493 688 teńge materıaldyq zalal keltirgen», delingen sottyń habarlamasynda.
Sot úkimine sáıkes bólim basshysy men onyń orynbasaryna Qylmystyq kodekstiń 189-baby 4-bóligi 2-tarmaǵy «Asa iri mólsherdegi senip tapsyrylǵan bóten múlikti ıemdenip alý nemese talan-tarajǵa salý» boıynsha kináli dep tanylyp, 7 jyl merzimge bas bostandyǵynan aıyrý jazasy taǵaıyndaldy. Olarǵa ómir boıyna memlekettik qyzmette eńbek etýge tyıym salyndy. Sondaı-aq, bólimniń bas mamany úsh bap boıynsha kináli dep tanyldy. Al, esepshiniń kómekshisi 189-baby 4-bóligi 2-tarmaǵy, 28-baby 5-bóligi, 190-baby 3-bóliginiń 2,4-tarmaqtary boıynsha kináli dep tanylyp, 7 jylǵa bas bostandyǵynan aıyryldy.
«Sonymen birge, is boıynsha azamattyq talap qoıý aryzy ishinara qanaǵattandyrylyp, sottalýshylardan memleket paıdasyna ortaq tártippen jalpy somasy 113 788 348 teńge (qalǵan somalar tólenip qaıtarylǵan) keltirilgen zalal men osynyń 3 paıyzy kóleminde memlekettik baj óndirildi» delingen habarlamada.
Degenmen esepshiniń kómekshisi qyzmetin atqarǵan aıyptalýshy Qylmystyq kodekstiń 74-baby 1-bóligine sáıkes, ıaǵnı júkti nemese jas balalary bolýyna baılanysty jazasyn tek 5 jyldan keıin óteıtin boldy. Al, oǵan deıin probaııalyq esepte turady. Sonymen qatar, esepshiniń taǵy bir kómekshisi men bólimniń kómek sektorynyń bas mamany da Qylmystyq kodekstiń 189-baby 4-bóligi 2-tarmaǵymen kináli dep tanyldy. Onyń birine 7, bireýine 2 jyl bas bostandyǵynan aıyrý jazasy taǵaıyndaldy. Olar da jazasyn bes jyldan keıin óteıtin boldy. Jumyspen qamtý bóliminiń basshysy, orynbasary jáne esepshi jazalaryn qaýipsizdigi ortasha túzeý mekemesinde óteıdi.
Sot úkimi áli zańdy kúshine engen joq.
"Adyrna" ulttyq portaly
