Türkıstan oblysy, Arys qalasynda jūmyspen qamtu jäne äleumettık baǧdarlamalar bölımınıŋ alty qyzmetkerı sottaldy. Olar pandemiia kezındegı tötenşe jaǧdai men şekteu şaralaryna bailanysty azyq-tülık pen tūrmystyq qajettılıkke bölıngen qarajatty jymqyrdy dep aiyptaldy. Būl turaly "Adyrna" ūlttyq portaly habarlaidy.
Arys audandyq sotynyŋ habarlauynşa, aiyptalǧan altaudyŋ qatarynda qalalyq jūmyspen qamtu jäne äleumettık baǧdarlamalar bölımınıŋ basşysy men onyŋ orynbasary, kömek sektorynyŋ bas mamany men esepşısı jäne onyŋ ekı kömekşısı bar. Olar tūrmysy tömen tūrǧyndarǧa bölıngen 120 mln teŋgenı talan-tarajǧa salǧany üşın sottaldy. Sot otyrysynda şeneunıkterdıŋ pandemiia kezınde 29 azamatqa kömek retınde bölıngen 2 900 400 teŋgenı zaŋsyz audaryp alǧany anyqtalǧan.
«Köbınşe özderınıŋ tuystary men tanystarynan tūratyn Arys qalasynyŋ 138 azamatyna aqşalardy negızsız, zaŋsyz audarǧany anyqtalǧan. Memleketke jalpy somasy 123 493 688 teŋge materialdyq zalal keltırgen», delıngen sottyŋ habarlamasynda.Sot ükımıne säikes bölım basşysy men onyŋ orynbasaryna Qylmystyq kodekstıŋ 189-baby 4-bölıgı 2-tarmaǧy «Asa ırı mölşerdegı senıp tapsyrylǧan böten mülıktı iemdenıp alu nemese talan-tarajǧa salu» boiynşa kınälı dep tanylyp, 7 jyl merzımge bas bostandyǧynan aiyru jazasy taǧaiyndaldy. Olarǧa ömır boiyna memlekettık qyzmette eŋbek etuge tyiym salyndy. Sondai-aq, bölımnıŋ bas mamany üş bap boiynşa kınälı dep tanyldy. Al, esepşınıŋ kömekşısı 189-baby 4-bölıgı 2-tarmaǧy, 28-baby 5-bölıgı, 190-baby 3-bölıgınıŋ 2,4-tarmaqtary boiynşa kınälı dep tanylyp, 7 jylǧa bas bostandyǧynan aiyryldy.
«Sonymen bırge, ıs boiynşa azamattyq talap qoiu aryzy ışınara qanaǧattandyrylyp, sottaluşylardan memleket paidasyna ortaq tärtıppen jalpy somasy 113 788 348 teŋge (qalǧan somalar tölenıp qaitarylǧan) keltırılgen zalal men osynyŋ 3 paiyzy kölemınde memlekettık baj öndırıldı» delıngen habarlamada.
Degenmen esepşınıŋ kömekşısı qyzmetın atqarǧan aiyptaluşy Qylmystyq kodekstıŋ 74-baby 1-bölıgıne säikes, iaǧni jüktı nemese jas balalary boluyna bailanysty jazasyn tek 5 jyldan keiın öteitın boldy. Al, oǧan deiın probasiialyq esepte tūrady. Sonymen qatar, esepşınıŋ taǧy bır kömekşısı men bölımnıŋ kömek sektorynyŋ bas mamany da Qylmystyq kodekstıŋ 189-baby 4-bölıgı 2-tarmaǧymen kınälı dep tanyldy. Onyŋ bırıne 7, bıreuıne 2 jyl bas bostandyǧynan aiyru jazasy taǧaiyndaldy. Olar da jazasyn bes jyldan keiın öteitın boldy. Jūmyspen qamtu bölımınıŋ basşysy, orynbasary jäne esepşı jazalaryn qauıpsızdıgı ortaşa tüzeu mekemesınde öteidı.
Sot ükımı älı zaŋdy küşıne engen joq.
"Adyrna" ūlttyq portaly
