قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ بۇرىنعى ءبىرىنشى ورىنباسارى سامات ابىشتەن كارىم ءماسىموۆ پەن وسى ءىس بويىنشا باسقا دا ايىپتالۋشىلاردىڭ ءىسى بويىنشا جاۋاپ الىندى، - دەپ حابارلايدى "ادىرنا" ءتىلشىسى.
ۇقك سونداي-اق سامات ءابىشتىڭ ۇستالعان باسقارمانىڭ بۇرىنعى باسشىلارىنا قاتىستى قىلمىستىق ءىس بويىنشا كۋاگەر ەكەنىن حابارلادى.
«س.س.ابىشتەن 175-باپتىڭ 1-بولىگى، 179-بابىنىڭ 3-بولىگى، 3-تارماعىندا كوزدەلگەن جانە قر قك-ءنىڭ 218-بابىنىڭ 3-بولىگىمەن، 362-بابىنىڭ 4-بولىگىنىڭ 3-تارماعىمەن، 366-بابىنىڭ 4-بولىگىمەن قىلمىستار بەلگىلەرى بويىنشا ك.ك.ماسىموۆكە، ا.ت.سادىكۋلوۆقا، د.ە.ەرعوجينگە، م.س.وسيپوۆقا جانە باسقالارعا قاتىستى قىلمىستىق ءىس بويىنشا جاۋاپ الىنىپ، كۋاگەر رەتىندە جاۋاپ الىنىپ جاتىر.
ءابىش س.س.-عا قاتىستى قىلمىستىق ىستەردى ۇلتتىق قاۋىپسىزدىك ورگاندارى تىركەگەن جوق، بۇلتارتپاۋ شاراسى تاڭدالعان جوق»، - دەپ حابارلادى Tengrinews.kz ءتىلشىسىنىڭ ساۋالىنا ۇقك ءباسپاسوز قىزمەتى.
ۇستىمىزدەگى جىلدىڭ 22 ماۋسىمىندا پارلامەنت ءماجىلىسىنىڭ الاڭىندا ۇقك توراعاسىنىڭ ورىنباسارى اسقار امەرحانوۆ سامات ءابىشتىڭ «تەرگەۋ وربيتاسىندا» ەكەنىن ايتقانىمەن، قانداي ستاتۋستا ەكەنىن ناقتىلامادى.
ايتا كەتەيىك، 43 جاستاعى سامات ءابىش 2000-2006 جىلدار ارالىعىندا قر ۇقك ورگاندارىندا وفيتسەر قىزمەتىن اتقارعان. ودان كەيىن ادىلەت مينيسترلىگى تىركەۋ قىزمەتى كوميتەتى توراعاسىنىڭ ورىنباسارى، توراعاسى، وسى ءبولىمنىڭ جاۋاپتى حاتشىسى قىزمەتتەرىن اتقاردى.
2010 جىلى ۇقك كادر باسقارماسىنىڭ باستىعى بولدى، ودان كەيىن ۇقك-ءنىڭ استانا قالاسى بويىنشا دەپارتامەنتىن باسقاردى (2011 جىلدىڭ قاراشاسىنان 2013 جىلدىڭ ناۋرىزىنا دەيىن).
2015 جىلى قازاقستان رەسپۋبليكاسى ۇلتتىق قاۋىپسىزدىك كوميتەتى باسشىسىنىڭ ءبىرىنشى ورىنباسارى بولىپ تاعايىندالدى. 2022 جىلدىڭ 17 قاڭتارىندا سامات ءابىش قىزمەتىنەن بوساتىلدى.
بۇعان دەيىن ۇقك توراعاسىنىڭ ورىنباسارى اسقار امەرحانوۆ بيىلعى جىلدىڭ كۇزىنە قاراي ۇقك-ءنىڭ بۇرىنعى باسشىلىعىنا قاتىستى جۇرگىزىلگەن تەرگەۋدىڭ ناتيجەسى بەلگىلى بولۋى مۇمكىن ەكەنىن ايتقان بولاتىن.
ەسكە سالايىق، اعىمداعى جىلدىڭ 6 قاڭتارىندا ۇلتتىق قاۋىپسىزدىك كوميتەتى قر قىلمىستىق كودەكسىنىڭ 175-بابى 1-ءبولىمى بويىنشا «مەملەكەتكە وپاسىزدىق جاساۋ» بابى بويىنشا تەرگەۋدى باستاعان بولاتىن. سول كۇنى بۇل قىلمىستى جاسادى دەگەن كۇدىكپەن ۇقك-ءنىڭ بۇرىنعى توراعاسى كارىم ءماسىموۆ پەن باسقا دا تۇلعالار ۇستالدى.
"ادىرنا" ۇلتتىق پورتالى
