الماتى وبلىسىندا حالىقتىڭ ءومىر ءسۇرۋ ساپاسىن جاقسارتۋ باستى نازاردا. كۇن تارتىبىنەن استە تۇسپەيتىن وزەكتى ماسەلەنىڭ ءتۇيىنىن تارقاتۋ وبلىس اكىمدىگىنىڭ الدىندا تۇرعان باستى مىندەت. حالىقتىڭ تۇرمىسىنىڭ جايلى، قونىسىنىڭ تۇراقتى بولۋى ءومىر ءسۇرۋ ساپاسىنا تىكەلەي اسەر ەتەتىنى جاسىرىن ەمەس. بۇگىندە بازىنالى ەلدىڭ باستى ماسەلەسى-باسپانا.
تۇرعىنداردى ۇيمەن قامتۋ ءۇشىن بارلىق جۇمىستار جۇيەلى ورىندالۋى شارت. قازىرگى كەزدە الماتى وبلىسىندا وسى تەكتەس شارالار قارقىندى جۇزەگە اسۋدا. ايماقتا، اعىمداعى جىلى 722,3 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان، ونىڭ ىشىندە بيۋدجەت قاراجاتى ەسەبىنەن – 61,7 مىڭ شارشى مەتر كرەديتتىك جانە جالعا بەرىلەتىن تۇرعىن ۇيلەر ەل يگىلىگىنە بەرىلەدى دەپ كۇتىلۋدە.
1 جارتىجىلدىق قورىتىندىسىنا سۇيەنسەك، الماتى وبلىسىندا 482,1 مىڭ ش.م. تۇرعىن ءۇي پايدالانۋعا بەرىلدى. ناتيجەسىندە، وبلىستاعى 117 وتباسى قونىس تويىن تويلادى. بيىلعى جىلى جالپى سانى 2048 جانۇيانى جىلى ۇياسىنا كىرگىزۋ جوسپاردا بار. ولاردىڭ 853-ءى كوپ بالالى جانە الەۋمەتتىك وسال توپ ساناتىنداعىلار.
2029 ۋچاسكەگە 244,2 كم ينجەنەرلىك-كوممۋنيكاتسيالىق جەلىلەردى سالۋ بويىنشا جۇمىستار جۇرگىزىلۋدە. بۇگىنگى تاڭدا 240 ۋچاسكەگە 45 كم جەلى تارتىلدى.
جاۋاپتىلاردىڭ ايتۋىنشا، جالپى الاڭى 23,2 مىڭ شارشى مەتر 288 پاتەرلى 4 نەسيەلىك تۇرعىن ۇيلەردىڭ ىسكە قوسىلماۋ قاۋپى بار. سەبەبى، ىلە اۋدانىندا 72 پاتەرلى تۇرعىن ءۇي ەكى ايعا كەستەدەن كەشىگىپ سالىنۋدا. تالعار اۋدانىندا 3 تۇرعىن ۇيگە ينجەنەرلىك جەلىلەردىڭ دايىن بولماۋىنا بايلانىستى.
تۇرعىنداردى تولعاندىراتىن ماسەلەنىڭ ءبىرى-اۋىز سۋ. وبلىستا 384 ەلدى مەكەننىڭ 357-ءى نەمەسە
93%-ى ورتالىقتاندىرىلعان سۋمەن، 25-ءى ورتالىقتاندىرىلماعان سۋمەن قامتىلعان، جامبىل (اششىسۋ) جانە ىلە اۋداندارىندا (كۇرتى) 2 اۋىلعا سۋ تاسىمالدانادى.
ۇستىمىزدەگى جىلى سۋمەن جابدىقتاۋ جانە سۋ بۇرۋ جۇيەلەرىنىڭ قۇرىلىسى مەن جوندەۋ بويىنشا 29 جوبانى ىسكە اسىرۋعا 9,2 ملرد.تەڭگە كوزدەلگەن. 534 كم سۋمەن جابدىقتاۋ جانە سۋ بۇرۋ جەلىلەرى سالىنىپ، قايتا جاڭعىرتىلادى، بالقاش، جامبىل، كەگەن، رايىمبەك جانە تالعار اۋداندارىنىڭ 7 ەلدى مەكەنىندە اۋىز سۋدىڭ ساپاسى جاقسارادى. جىل سوڭىنا قاراي ورتالىقتاندىرىلعان سۋمەن قامتۋ دەڭگەيى قالالاردا 100%-عا، اۋىلداردا – 91,4%-عا جەتەدى دەپ كۇتىلۋدە.
ايتا كەتەيىك، ورتالىقتاندىرىلماعان سۋعا قوسىلماعان اۋىلداردىڭ ەڭ كوپ سانى بالقاش جانە ەڭبەكشىقازاق اۋداندارىندا باسىم. قوس اۋداندا 8 اۋىلدان ورتالىق سۋعا ءالى قوسىلماعان.سۋدىڭ الەگىنەن بولەك، جىلۋدىڭ جايى دا حالىق ءۇشىن ماڭىزدى. قاتتى وتىننان ارىلۋدىڭ جولىن ىزدەگەن بۇقارا گازعا قول جەتكىزگىلەرى كەلەدى. بۇگىندە وبلىستا384 ەلدى مەكەننىڭ 1,1 ملن. ادامنان استام حالقى بار 294-ءى گازداندىرۋعا جاتادى.
ونىڭ ىشىندە 920,8 مىڭ حالقى بار 144 ەلدى مەكەن گازداندىرىلدى، گازداندىرۋ دەڭگەيى 49%-عا جەتتى.
اعىمداعى جىلى گازبەن جابدىقتاۋ جەلىلەرىنىڭ قۇرىلىسى بويىنشا 15 جوباعا بيۋدجەتتەن 4,1 ملرد. تەڭگە ءبولىندى. بالقاش، جامبىل، تالعار جانە ۇيعىر اۋداندارىندا ەلدى مەكەندەردىڭ كەنتىشىلىك جەلىلەرىنىڭ قۇرىلىسى جۇرگىزىلۋدە.
930 مىڭ حالقى بار تاعى 5 ەلدى مەكەن گازعا قول جەتكىزىپ، قامتۋ دەڭگەيى 50,7%-عا جەتەدى.
كەگەن جانە رايىمبەك اۋداندارىن گازداندىرۋ ءۇشىن 75 مىڭ ادامدى قامتي وتىرىپ، ۇزىندىعى 227 شاقىرىم «شەلەك-كەگەن-نارىنقول» ماگيسترالدى گاز قۇبىرىن سالۋ ءۇشىن جوبالاۋ-سمەتالىق قۇجاتتاما ازىرلەنۋدە.
وسى جوبانى جۇزەگە اسىرۋ ناتيجەسىندە وبلىس بويىنشا گازداندىرۋ دەڭگەيى ءبىرشاما ارتىپ، 65,8% قۇرايدى دەيدى ماماندار.
