استانادا قازاقستان پوليتسياسى كۇنىنە وراي كۇش كورسەتىلىمى ءوتتى. پوليتسيا پودپولكوۆنيگى باۋىرجان كاماليەۆ سالماعى 24 توننا بولاتىن Terrex Barys 8×8 امفيبيالىق بروندى اسكەري تەحنيكانى ورنىنان قوزعاپ، الەمدىك رەكورد ورناتتى.
رەكوردتى GLOBAL BOOK of RECORDS (GBR) ۇيىمىنىڭ باس تىركەۋشى وفيتسەرى قۋاندىق قۇدايبەرگەنوۆ رەسمي تۇردە تىركەدى.
بۇل – اۋىر اتلەت باۋىرجان كاماليەۆتىڭ التىنشى رەت الەمدىك رەكورد ورناتۋى. ول بۇعان دەيىن ۇشاق، تەمىرجول ۆاگونى، لوكوموتيۆ، تىكۇشاق، ءتىپتى قوس ءدجيپتى سۇيرەپ رەكورد ورناتقان. سونداي-اق، ون جاسىنان سپورتتى جانىنا سەرىك ەتكەن ول وتىز جىلدىق قاجىماس ەڭبەگىنىڭ ارقاسىندا ەلىمىزدىڭ پاۋەرليفتينگتەن سپورت شەبەرى، الەم كۋبوگىنىڭ جۇلدەگەرى اتانعان.
«مەن بۇل رەكوردتى بورىشىن اتقارىپ جۇرگەن بارلىق پوليتسيا قىزمەتكەرلەرىنە ارنايمىن. بۇل – جاي عانا تەمىر تارتۋ ەمەس. باستى ماقسات – قازاقتىڭ قارا كۇشىن، رۋحىن، ەرلىگىن ناسيحاتتاۋ. جاستارعا ۇلگى بولىپ، «وسى كىسى ىستەسە، مەن دە ىستەي الامىن» دەگەن سەنىم ۇيالاتقىم كەلەدى. ەرلىك، حالىققا قىزمەت ەتۋ، ءتارتىپ – ءبىز ناسيحاتتاپ جۇرگەن باستى قۇندىلىقتار. ءبىز جاستاردى سپورتقا، رۋحاني جانە فيزيكالىق دامۋعا باۋلۋعا ءتيىسپىز. بۇل ءىس-شارا – ءدال سوعان باعىتتالعان. قازاقتىڭ جاستارى نامىستى، رۋحتى بولسىن»، – دەدى باۋىرجان كاماليەۆ.
باۋىرجان كاماليەۆ Terrex Barys 8×8
«بۇل تەحنيكادا 6 جەتەك بار، ءار جەتەك شامامەن 6 توننادان اسادى. سالماعى مەن قۇرىلىمى ونى وتە اۋىر ەتەدى. مەن ونى 10 مەترگە سۇيرەدىم. كۇش نەگىزىنەن اياققا، قولعا جانە بەلگە تۇسەدى. قولىم ءىسىپ كەتتى، بىراق بار كۇشىمدى سالدىم»، – دەيدى ول.
GBR ۇيىمىنىڭ باس تىركەۋشى وفيتسەرى قۋاندىق قۇدايبەرگەنوۆ باۋىرجان كاماليەۆكە ارنايى سەرتيفيكات تابىستادى.
«بۇل – سالماعى 24 توننا بولاتىن، 4 رەدۋكتورلى اۋىر اسكەري تەحنيكا. مۇنداي تەحنيكا – ەرەكشە قۇرىلىمعا يە جانە جوعارى قاۋىپسىزدىك دەڭگەيىندەگى جابىق، رەجيمدى نىسانداردا ساقتالادى. سوندىقتان ونى تارتۋ وڭاي شارۋا ەمەس – ارنايى رۇقساتتى تالاپ ەتەدى»، – دەدى ول.
سونىمەن قاتار، ول باۋىرجان كاماليەۆتى 2025 جىلعى جەلتوقساندا وتەتىن GLOBAL BOOK of RECORDS حالىقارالىق تانىستىرىلىمىنا شاقىردى.
«ەڭ الدىمەن، ىشكى ىستەر مينيسترلىگىنە جانە تەحنيكا ۇسىنىپ، قولداۋ كورسەتكەن زاۋىت باسشىلىعىنا العىسىمدى بىلدىرەمىن. سونداي-اق قۋاندىق شىڭعىسۇلىنا ەرەكشە ريزاشىلىعىمدى ايتامىن. قازاقستان پوليتسياسى كۇنى-ءتۇنى ەلىمىزدىڭ تىنىشتىعى ءۇشىن تىنىمسىز، ادال ەڭبەك ەتۋدە. بارشا پوليتسيا قىزمەتكەرلەرىن كاسىبي مەرەكەلەرىمەن قۇتتىقتايمىن. قازاق ەلى امان بولسىن»، – دەپ ريزاشىلىعىن ءبىلدىردى.
