قازاقستاننىڭ رەسەيدەگى ەلشىسى داۋرەن اباەۆ شەشەنستان باسشىسى رامزان قادىروۆتىڭ ۇلى - ادامنىڭ ۇيلەنۋ تويىندا قوناق بولدى. بۇل تۋرالى رامزان قادىروۆ جازدى، دەپ حابارلايدى “ادىرنا”.
“مەن، دوستارىم، وسى كۇندەرى گروزنىيدا قاتتى قادىرلەيتىن جانە قۇرمەتتەيتىن كوپتەگەن قوناقتاردى، سونداي-اق يران، ءباا، تۇركيا، قازاقستان ەلشىلەرىن كورگەنىمە قۋانىشتىمىن. ولاردىڭ ءبارى وتباسىمىزدى شەشەن رەسپۋبليكاسى تۇڭعىش پرەزيدەنتىنىڭ نەمەرەسى، رەسەي باتىرى احمات-حادجي قادىروۆتىڭ نەمەرەسى — ادامنىڭ ۇيلەنۋ تويىمەن قۇتتىقتاۋعا كەلدى»، — دەپ جازدى رامزان قادىروۆ ءوزىنىڭ Telegram-ارناسىندا.
ول گروزنىيعا كەلگىسى كەلگەندەر بۇدان دا كوپ بولعانىن، بىراق ءتۇرلى سەبەپتەرگە بايلانىستى ءبارىنىڭ كەلە الماعانىن اتاپ ءوتتى.
«مەن ولارعا شىن جۇرەكتەن ريزامىن. ولار تەك قۋانىشىمىزدى ءبولىسىپ قويماي، وزدەرىنىڭ قاتىسۋىمەن تويىمىزدى ودان سايىن ەستە قالارلىقتاي، ۇمىتىلماس ەتتى. (…) راحمەت سىزدەرگە، دوستار! بۇكىل وتباسىمىز سول ەرەكشە كۇندە جانىمىزدا بولعان ءار ادامعا شىن جۇرەكتەن العىس ايتادى!» — دەپ اتاپ ءوتتى قادىروۆ.
بۇعان دەيىن حابارلانعانداي، شەشەنستان باسشىسى رامزان قادىروۆتىڭ كىشى ۇلى - 17 جاستاعى ادام ۇيلەنۋ تويىندا شەكتەۋلى سەريامەن شىققان Mercedes كولىگىمەن جۇرگەن، سونداي-اق بىرنەشە ميلليون دوللار تۇراتىن ساعات تاققان.
بۇعان The Insider جانە فبك-نىڭ تەرگەۋ ءبولىمىنىڭ باسشىسى ماريا پەۆچيح نازار اۋداردى.
شەشەنستان باسشىسىنىڭ ۇلىنىڭ ۇيلەنۋىمەن رەسەي پرەزيدەنتى ۆلاديمير پۋتين جەكە قۇتتىقتادى.
ادام قادىروۆتىڭ قالىڭدىعىنىڭ ەسىمى - مەدني، دەپ حابارلادى ايشات قادىروۆا. «نوۆايا گازەتا ەۆروپا» مالىمەتىنشە، 2024 جىلدىڭ 8 ماۋسىمىندا ادام قادىروۆ شەشەنستان سەناتورى سۋلەيمان گەرەمەەۆتىڭ قىزىمەن يسلام شاريعاتى بويىنشا نەكەگە وتىرعان.
