ۇلت رۋحانياتىنا تىرەك بولار ءتورت ۇلى ۇعىم بار: تۋعان جەر، تۋعان ءتىل، سالت-ءداستۇر مەن تاريح. بۇل – حالقىمىزدىڭ عاسىرلار بويعى جان ساقتاپ كەلگەن ىشكى تۇعىرى. ەگەر سول تورتەۋدىڭ ءبىرى جۇتىلىپ، ءبىرى ۇمىتىلسا، ۇلتتىڭ كەلبەتى كومەسكى تارتا باستايدى…
№93 مەكتەپ-ليتسەيىندە وسى ۇلى ۇستانىمدى ارقاۋ ەتكەن تاعىلىمدى باستاما – ء“تورت انا” وقىرماندار كلۋبى ءوز جۇمىسىن باستادى. كلۋبتىڭ اشىلۋ سالتاناتىنا ەرەكشە مارتەبەلى قوناق – قازاقستاننىڭ ەڭبەك ەرى، اقىن مۇحتار شاحانوۆ قاتىسىپ، لەنتاسىن قيىپ، جۇرەكجاردى باتاسىن بەردى. بۇل – تەك ءبىر شارانىڭ رەسمي اشىلۋى عانا ەمەس، ۇلتتىق رۋح پەن ءبىلىمدى ۇشتاستىرعان رۋحاني بەتبۇرىستىڭ باستاماسى بولدى. اقىن سونداي-اق جازعى دەمالىس لاگەرىندە جۇرگەن وقۋشىلارمەن جۇزدەسىپ، ىزگى تىلەگىن ارنادى.
ء«تورت انا» – ۇلتتىق بولمىستىڭ ءتورت تىرەگىنىڭ پوەتيكالىق كورىنىسى. مۇحتار شاحانوۆتىڭ وسى اتتاس ولەڭىندە تۋعان جەر، تۋعان ءتىل، سالت-ءداستۇر مەن تاريح – ءاربىر ادامنىڭ رۋحاني تامىرى، ادامي بيىگى رەتىندە جىرلانادى. بۇل – تەرەڭگە بويلاعان، ۇرپاق جادىندا جاڭعىرۋى ءتيىس ماڭگىلىك يدەيا. بۇگىنگى وقىرماندار كلۋبى – سول يدەيانىڭ شىنايى ومىرمەن ۇندەسكەن، ناقتى ىسكە اينالعان كورىنىسى.
كلۋب ءبىرتۇتاس تاربيە باعدارلاماسىنىڭ «بالالار كىتاپحاناسى» جوباسى اياسىندا قۇرىلىپ وتىر. وعان تەك وقۋشىلار عانا ەمەس، اتا-انالار مەن ۇستازدار دا مۇشە بولادى. وسى ارقىلى مەكتەپ قابىرعاسىندا وتباسىلىق كىتاپ وقۋدىڭ جاڭا مادەنيەتى قالىپتاسىپ، «مەكتەپ – وقۋشى – اتا-انا» اراسىنداعى ديالوگ جاندانادى. ءبىر كىتاپتى بىرگە تالداۋ – ءبىر الەمدى بىرگە تانۋ.
بۇگىنگى بالاعا ويىنشىق سىيلايتىندار كوپ، وي سىيلايتىندار سيرەك. ء«تورت انا» وقىرماندار كلۋبى – ءدال سول وي سىيلايتىن كەڭىستىك. مۇندا ءار وقۋشى تەك كىتاپ وقىپ قويمايدى، قۇندىلىقپەن قاۋىشادى، ۇلت پەن رۋح، ادام مەن بولمىس، سانا مەن ءسوز جايلى تەرەڭ ويلانادى. اتا-انا مەن بالانىڭ ءبىر كىتاپتى بىرگە وقۋى – ءۇنسىز تاربيە. ءۇنسىز تۇسىنىستىك. ال ۇستاز سول ۇدەرىستىڭ باعىتتاۋشىسى. كلۋب وسى ۇشتاعاننىڭ توعىسىندا تۇرىپ، ءار جانۇيانى – كىتاپ اينالاسىندا ۇيىستىرۋدى ماقسات ەتەدى.
كلۋب مۇشەلەرى الداعى ۋاقىتتا بىرگە وقيتىن كىتاپتار ءتىزىمىن ناقتىلاپ، رۋحاني باعىتتاعى كەزدەسۋلەر، پىكىرتالاستار، شىعارماشىلىق جۇمىستار ۇيىمداستىرادى. بۇل – فۋنكتسيونالدىق ساۋاتتىلىقتى ارتتىرۋ عانا ەمەس، بالانىڭ ىشكى الەمىن كەڭەيتۋگە باستار جول.
مۇنداي باستامالار – مەكتەپ قابىرعاسىنان باستالاتىن رۋحاني يممۋنيتەتتىڭ تىرەگى. ۇلتتىڭ جۇرەگى – بالانىڭ جان دۇنيەسىندە سوعادى. ەگەر ول جۇرەكتە تىلگە، داستۇرگە، جەرگە، تاريحقا دەگەن قۇرمەت ويانىپ جاتسا، ۇلت بولاشاعىنا جاۋاپتى جاستارعا دەگەن سەنىم دە ارتادى. 
ءار وقىلعان كىتاپ – بالا بويىندا جانعان ءبىر شىراق. ء“تورت انا” كلۋبى بۇگىن سول شىراقتىڭ العاشقى وتىن جاقتى. ەندى بۇل شىراق سونبەۋى ءۇشىن ءار اتا-انا، ءار ۇستاز، ءار وقۋشى – جۇرەك جىلۋىن اياماسا يگى. جۇرەكپەن وقىلعان ءار كىتاپ – سانامەن جاسالعان تاڭداۋ. ەندەشە، سانالى تاڭداۋ جاساپ، كىتاپ ارقىلى بولاشاققا كوپىر سالايىق!
