تۇركيا ازەربايجان مەن رەسەي اراسىنداعى شيەلەنىسكە الاڭداۋشىلىقپەن قاراپ، تاراپتاردى سابىر ساقتاۋعا شاقىردى. بۇل تۋرالى تۇركيا پرەزيدەنتى رەجەپ تايىپ ەردوعان ازەربايجاننان ورالعان جولىندا ۇشاق بورتىندا جۋرناليستەرگە بەرگەن سۇحباتىندا مالىمدەدى، دەپ حابارلايدى "ادىرنا" ۇلتتىق پورتالى Report-قا سىلتەمە جاساپ.
ول بۇل ماسەلەنى ازەربايجان پرەزيدەنتى يلحام اليەۆپەن تالقىلاعانىن اتاپ ءوتتى.
«تۇركيانىڭ ازەربايجانمەن دە، رەسەيمەن دە تەرەڭ ديپلوماتيالىق ءارى ستراتەگيالىق بايلانىستارى بار. ءبىز ەكى ەل اراسىنداعى شيەلەنىستى مۇقيات باقىلاپ وتىرمىز جانە تاراپتاردى سابىر مەن ۇستامدىلىق تانىتۋعا شاقىرامىز. ءبىز بۇل ماسەلە ديپلوماتيالىق شيەلەنىستى باسەڭدەتەتىن مالىمدەمەلەر ارقىلى وڭاي ءارى اقىلمەن شەشىلەدى دەپ ەسەپتەيمىز. رەسەي مەن ازەربايجان اراسىنداعى بۇل جاعىمسىز وقيعالار ەكىجاقتى قارىم-قاتىناستارعا ورنى تولماس زيان كەلتىرمەي، تەز ارادا توقتايدى دەپ ۇمىتتەنەمىن»، – دەدى ەردوعان.
ونىڭ ايتۋىنشا، بۇل ماسەلەگە سابىرمەن قاراۋ قاجەت.
ء«بىز بۇل ەكى دوس ەلدىڭ ءوزارا تۇسىنىستىكپەن بۇل ماسەلەنى ەڭسەرۋگە نيەتتى ەكەنىن بىلەمىز. تۇركيا بۇل ماسەلەنى شەشۋگە باعىتتالعان بارلىق كونسترۋكتيۆتى قادامدارعا قولداۋ كورسەتۋدى جالعاستىرادى. ءبىزدىڭ باستى ماقساتىمىز – وڭتۇستىك كاۆكازدا زور قيىندىقپەن ورناعان تۇراقتىلىقتى شايقالتۋى مۇمكىن كەز كەلگەن شيەلەنىستىڭ الدىن الۋ. بۇل ايماق سوعىس پەن قاقتىعىستاردان ابدەن قاجىعان. جاڭا جانجالدارعا توتەپ بەرەتىن جاعداي جوق. تۇركيا بۇل ماسەلە ديپلوماتيالىق جولمەن شەشىلەدى دەپ سەنەدى. بۇل ماسەلە مەنىڭ يلحام اليەۆپەن كەزدەسۋىمدە كۇن تارتىبىنە ەندى»، – دەپ تۇيىندەدى ەردوعان.
