ۇلتتىق دومبىرا كۇنىنە وراي اقمولا وبلىسىندا بۇرىن-سوڭدى بولماعان كولەمدە ۇيىمداستىرىلعان دومبىراشىلار فلەشموبى – كوپشىلىكتىڭ جۇرەگىنە ۇمىتىلماس اسەر سىيلادى. قۇرمانعازىنىڭ ايگىلى «بالبىراۋىن» كۇيىن 3000-عا جۋىق دومبىراشى ءبىر مەزەتتە ورىنداپ، قالا اسپانىن كۇيمەن تەربەتتى. وسىلايشا قوپا كولىنىڭ جاعاسى تاعى ء بىر دومبىرانىڭ سازىنا شالقىدى.
تاڭعى سالقىن لەپ پەن تولقىننىڭ سىبدىرىنا قوسىلعان دومبىرا ءۇنى - قالا تۇرعىندارى مەن قوناقتارى ءۇشىن ناعىز رۋحاني تويعا اينالدى. ۇلتتىق مۇراعا دەگەن ىڭكارلىك پەن ماقتانىش الاڭعا جينالعان ءار ادامنىڭ جانارىنان بايقالدى.
بىرەگەي كورىنىسكە وبلىستىڭ تۇكپىر-تۇكپىرىنەن كەلگەن مادەنيەت وشاقتارىنىڭ وكىلدەرى، فولكلورلىق انسامبلدەر، ونەر مەكتەپتەرىنىڭ تاربيەلەنۋشىلەرى مەن كاسىبي كۇي شەبەرلەرى قاتىستى. جاس دومبىراشىلار الدىن قازاقستاننىڭ ەڭبەك سىڭىرگەن ءارتىسى بيسارا ماكەنوۆا باستاپ، كوپپەن بىرگە كۇي شەرتتى.
«بۇل ۇكىلى دومبىرا مەرەكەسى. كەشەگى سال-سەرىلەردىڭ مەكەنىندە، كوكشەتاۋدىڭ كوركەم جاعالاۋىندا وسىنداي يگى شارانىڭ ءوتىپ جاتقانى ۇلكەن قۋانىش. بۇل كەيىنگى ۇرپاققا ۇلگى بولارلىق دۇنيە. دومبىرا –قاسيەتتى مۇرامىز. ونىڭ ءۇنى ءار قازاقتىڭ ۇيىنەن وشپەسىن. ۇرپاعىمىزدىڭ جۇرەگى دومبىرامەن سوعىپ تۇرسا، ەلدىڭ رۋحى ەشقاشان سونبەيدى، - دەدى ونەر مايتالمانى.
فلەشموبقا قاتىسۋشىلاردىڭ اراسىندا جاس ونەرپازدار دا كوپ بولدى. سولاردىڭ ءبىرى قوسشى قالاسىنان كەلگەن ايگەرىم نۇردىبەكقىزى. ول دومبىرا تارتىپ جۇرگەنىنە ءبىر جىلدان اسقانىن ايتىپ، بۇگىن «بالبىراۋىن» مەن «اداي» كۇيلەرىن ورىنداعانىن قۋانا جەتكىزدى.
«وسىنداي ۇلكەن شاراعا قاتىسقانىما وتە قۋانىشتىمىن. بۇل مەن ءۇشىن ۇلكەن تاجىريبە ءارى شابىت. ۇلتتىق دومبىرا كۇنىمەن بارشاڭىزدى قۇتتىقتايمىن! - دەيدى ول.
شاراعا ارنايى كەلىپ، ەرەكشە كورىنىستىڭ كۋاسى بولعان كوكشەتاۋلىق تۇرعىن ورال
«بۇگىنگى شارا – ۇلتتىڭ رۋحىن كوتەرەتىن ەرەكشە كۇن. قارا دومبىرا ءاردايىم تورىمىزدەن تۇسپەسىن. تەك قازاقتىڭ تويى بولسىن! - دەپ جۇرەكجاردى تىلەگىن ءبىلدىردى. ءتىپتى شاراعا ارناپ دومبىرا تۋرالى ولەڭ جولدارىن دا وقىپ بەردى.
3000 دومبىراشى ءبىر مەزەتتە ءبىر كۇيدى شەرتۋى تەك تەحنيكالىق ۇيلەسىم عانا ەمەس، بۇل رۋحاني تۇتاستىقتىڭ بەلگىسى. ءارتۇرلى اۋىلدان، ءارتۇرلى جاستان، ءتۇرلى ۇجىمنان جينالعان دومبىراشىلار ءبىر الاڭدا باس قوسىپ، قازاقتىڭ بولىنبەس بىرلىگىن كۇي ارقىلى پاش ەتتى.
فلەشموبقا قاتىسۋشى، ارشالى اۋدانىنىڭ قوستومار مەكتەبىنەن كەلگەن 11-سىنىپ وقۋشىسى اقنيەت امانتاي دا ءوزىنىڭ جۇرەكجاردى تىلەگىن ءبىلدىردى.
«دومبىرا ۇيىرمەسىنە قاتىسقانىما 6 جىل بولدى. وسى ۋاقىت ىشىندە 20-دان استام كۇي ۇيرەندىم. بۇگىن وسىنداي ۇلكەن شاراعا قاتىسۋ مەن ءۇشىن ۇلكەن مارتەبە. بۇل كۇن – ءبارىمىز ءۇشىن ەرەكشە، - دەيدى.
اقمولا وبلىستىق مادەنيەت باسقارماسىنىڭ باسشىسى ايگۇل ءسابيتوۆا بۇل شارانىڭ اۋقىمدىلىعىنا نازار اۋدارىپ، جىلداعىدان ەرەكشە ءوتىپ جاتقانىن جەتكىزدى.
«وبلىستىڭ تۇكپىر-تۇكپىرىنەن كەلگەن 3000-عا جۋىق دومبىراشى ءبىر مەزەتتە قۇرمانعازىنىڭ «بالبىراۋىن» كۇيىن ورىندادى. بۇل تەك مۋزىكالىق قويىلىم ەمەس، بۇل - ۇلتتىق رۋحتىڭ جاڭعىرۋى. دومبىرا كۇنى جىل سايىن وسىلاي كەڭ كولەمدە اتالىپ ءوتسىن! - دەدى.
بۇل كۇنى كۇمبىرلەگەن كۇي - دالانىڭ ۇنىنە، ۇلتتىڭ جۇرەك لۇپىلىنە اينالدى. دومبىرانىڭ قوڭىر ۇنىمەن سۋسىنداعان كوپشىلىك الاڭنان ەرەكشە شابىتپەن تاراستى. دەمەك، كۇيمەن ورىلگەن وسى كۇن ۇلتتىق سانا مەن رۋحانياتتىڭ جارقىن بەتى رەتىندە ەل ەسىندە ساقتالارى انىق.
