كوكشەتاۋداعى «قوعامدىق كەلىسىم» كمم-دە قىرعىز حالقىنىڭ ۇلتتىق باس كيىمى – اق قالپاققا ارنالعان مەرەكەلىك ءىس-شارا ءوتتى. 5 ناۋرىزدا اتاپ وتىلەتىن بۇل كۇن قىرعىز حالقىنىڭ ۇلتتىق ءداستۇرىن دارىپتەپ، مادەني مۇراسىن ناسيحاتتاۋعا باعىتتالعان.
مەرەكەلىك كەش «بالاقاي» ونەر ستۋدياسىنىڭ دومبىرا ۇيىرمەسىنىڭ ورىنداۋىنداعى كۇيمەن اشىلدى. توعجان ءجاحيننىڭ «دالا رۋحى» كۇيى كورەرمەندەرگە ەرەكشە اسەر سىيلادى. سونىمەن قاتار LED ەكراندا اق قالپاقتىڭ تاريحى مەن ماعىناسىنا ارنالعان بەينەروليك كورسەتىلدى.
شارا بارىسىندا وبلىستىق ىشكى ساياسات باسقارماسى باسشىسىنىڭ ورىنباسارى، قازاقستان حالقى اقمولا اسسامبلەياسى حاتشىلىعىنىڭ مەڭگەرۋشىسى سابىرحان كەنجەباەۆ قۇتتىقتاۋ ءسوز سويلەپ، بىرلىك پەن تاتۋلىقتىڭ ماڭىزىن اتاپ ءوتتى. سونداي-اق اقمولا وبلىسى ىشكى ساياسات باسقارماسى باسشىسىنىڭ العىس حاتتارىمەن بىرقاتار بەلسەندى ازاماتتار ماراپاتتالدى.
مەرەكەلىك باعدارلامادا ءتۇرلى ەتنومادەني ۇجىمداردىڭ ونەرى ۇسىنىلدى. «كىزعالداق» بي توبى «كوچمون» ءبيىن ورىنداپ، كورەرمەندەردىڭ ىستىق ىقىلاسىنا بولەندى. «قازاق ءتىلى مەن مادەنيەتى» قوعامدىق بىرلەستىگىنىڭ مۇشەسى جانار احمەتجاروۆا حالىق ءانى «بەۋ ايدايدى» شىرقاسا، «بالاقاي» ونەر ستۋدياسىنىڭ «Qadam» بي توبى ۇلتتىق ءبيىن ۇسىندى. سونداي-اق ءابدءىمءالءىك انارباەۆ پەن تاحمينا كەڭەشوۆا قىرعىزدىڭ «ماش بوتوي» كۇيىن ورىندادى.
ءىس-شارانىڭ ماڭىزدى بولىگى – اق قالپاققا ارنالعان ارنايى كورسەتىلىم بولدى. وندا قىرعىز حالقىنىڭ قاسيەتتى مۇراسى سانالاتىن باس كيىمنىڭ شىعۋ تاريحى، ونىڭ قۇرىلىمى مەن ءاربىر ءتۇسىنىڭ ماعىناسى تۋرالى كەڭىنەن ايتىلدى. اق قالپاقتىڭ ءتورت بولىكتەن تۇراتىن قۇرىلىمى الا-توو تاۋلارىن بەينەلەيتىنى، ال اق كيىزدەن جاسالۋى ونىڭ تازالىق پەن قاسيەتتىلىكتىڭ بەلگىسى ەكەنى اتاپ ءوتىلدى.
كەش بارىسىندا ءان مەن بي، كۇي مەن ساحنالىق قويىلىمدار كورەرمەندەرگە ۇسىنىلىپ، قىرعىز حالقىنىڭ باي مادەنيەتى مەن ءداستۇرى كەڭىنەن تانىستىرىلدى. سونداي-اق قىرعىزدىڭ كورنەكتى جازۋشىسى شىڭعىس ايتماتوۆ شىعارمالارىنان ساحنالىق قويىلىم كورسەتىلدى.
شارا سوڭىندا «ماناس» ەتنومادەني بىرلەستىگىنىڭ توراعاسى زاكيردين جوروبەكوۆ ءسوز سويلەپ، ەتنومادەني بىرلەستىكتىڭ بەلسەندى مۇشەلەرىنە ماراپاتتار تابىس ەتتى.
ۇيىمداستىرۋشىلاردىڭ ايتۋىنشا، مۇنداي مادەني شارالار ءتۇرلى ەتنوس وكىلدەرى اراسىنداعى دوستىقتى نىعايتىپ، ۇلتتىق داستۇرلەردى دارىپتەۋگە مۇمكىندىك بەرەدى.
اۆتور اسلان وسپانوۆ.
