كوكشەتاۋدا دوستىق ءۇيى اۋماعىندا حالقىمىزدىڭ كونەدەن جەتكەن قولونەر ءداستۇرىن جاڭعىرتۋعا ارنالعان «ۇرشىق Party» فەستيۆالى جوعارى دەڭگەيدە ءوتتى. شارا ۇلتتىق مادەنيەتتى ناسيحاتتاپ، ۇرپاقتار ساباقتاستىعىن دارىپتەۋدى ماقسات ەتتى.
فەستيۆال اياسىندا كەلۋشىلەرگە قازاقى ناقىشتاعى قولونەر كورمەسى ۇسىنىلىپ، ءجۇن ءتۇتۋ، ۇرشىق ءيىرۋ ۇدەرىسى كەڭىنەن تانىستىرىلدى. سونداي-اق ۇلتتىق كيىم ۇلگىلەرى مەن شەبەرلەردىڭ قولىنان شىققان بۇيىمدار كوپشىلىك نازارىنا قويىلدى. قاتىسۋشىلار كونفەرەنتس-زالدا ۇرشىق ءيىرۋ ونەرىنىڭ تاريحى مەن ەرەكشەلىگى تۋرالى مازمۇندى پرەزەنتاتسيانى تاماشالادى.
ءىس-شاراعا بارلىعى 12 قاتىسۋشى قاتىسىپ، «ۇرشىق شەبەرى»، «ۇزدىك ۇلتتىق وبراز»، «شەبەر قولدار» سىندى اتالىمدار بويىنشا ءوز ونەرلەرىن ورتاعا سالدى. ءار قاتىسۋشى ۇرشىقتىڭ تاريحىمەن تانىستىرىپ، ونى قولدانۋ شەبەرلىگىن كورسەتتى. اسىرەسە، اجەلەر قاۋىمىنىڭ ءجۇن يىرۋدەگى ەپتىلىگى كورەرمەن تاراپىنان ەرەكشە ىقىلاسقا يە بولدى.
فەستيۆال قورىتىندىسى بويىنشا جەڭىمپازدار انىقتالدى.
ءى ورىن – 50 000 تەڭگەلىك سەرتيفيكات يەگەرى نۇرجۇما باقشا (شورتاندى اۋدانى، نوۆوكۋبانكا اۋىلى);
ءىى ورىن – 30 000 تەڭگەلىك سەرتيفيكات يەگەرى رىسباەۆا تۇيمەقىز مەڭدەشقىزى (تسەلينوگراد اۋدانى، تالاپكەر اۋىلى);
ءىىى ورىن – 20 000 تەڭگەلىك سەرتيفيكات يەگەرى سماعۇلقىزى كەنجەباي (كوكشەتاۋ قالاسى).
سونىمەن قاتار بارلىق قاتىسۋشىلار ارنايى نوميناتسيالارمەن ماراپاتتالىپ، فەستيۆالگە بەلسەنە قاتىسقانى ءۇشىن العىس حاتتار تابىستالدى.
شارا بارىسىندا ۇلتتىق ءان-كۇي، بي ونەرى جانە شىعارماشىلىق كورسەتىلىمدەر ۇسىنىلىپ، مادەني كەشتىڭ مازمۇنىن تولىقتىرا ءتۇستى.
«ۇرشىق Party» فەستيۆالى – ۇمىت بولا باستاعان ۇلتتىق قولونەردى جاڭعىرتىپ، قازاقى قۇندىلىقتاردى دارىپتەۋگە باعىتتالعان تاعىلىمدى مادەني الاڭ رەتىندە ەرەكشەلەندى.
