اقش-تىڭ تەحاس شتاتىندا بولعان جويقىن سۋ تاسقىنى 104 ادامنىڭ ءومىرىن قيدى. قازا تاپقانداردىڭ 28-ءى - بالا. بۇل تۋرالى ۆۆس جازدى، دەپ حابارلايدى “ادىرنا”.
اقپاراتقا سايكەس، قۇتقارۋشىلاردىڭ ايماقتا تىنباي جۇمىس ىستەپ جاتقانىنا 4 كۇن بولعان. قازىرگى ۋاقىتتا 24 ادام ءىزىم-قايىم جوعالعان.
ەڭ كوپ زارداپ شەككەن كەرر وكرۋگىندە 84 ءولىم دەرەگى راستالىپ، تاعى 11 ادام ىزدەستىرىلىپ جاتىر. تاعى دا بەس وكرۋگ - ترەۆيس، بەرنەت، ۋيليامسون، كەندالل جانە توم گريندە 20 ادام كوز جۇمىپ، 13 ادام جوعالىپ كەتكەن. كەررۆيلل قالاسىنا جاقىن ورنالاسقان گۋادالۋپە وزەنى جاعاسىنداعى قىزدارعا ارنالعان Camp Mystic جازعى حريستيان لاگەرى دە سۋ استىندا قالدى. لاگەر اكىمشىلىگى كەمىندە 27 قىز بالا مەن تاربيەشىنىڭ قازا تاپقانىن راستادى.
قازىر وڭىردە توتەنشە جاعداي
اقش پرەزيدەنتى دونالد ترامپ شتات بيلىگىمەن تىعىز جۇمىس جۇرگىزىلىپ جاتقانىن ايتتى. ونىڭ تاپسىرماسىمەن ىشكى قاۋىپسىزدىك ءمينيسترى كريستي نوەم تەحاسقا بارىپ، فەدەرالدى كومەكتىڭ كورسەتىلەتىنىن مالىمدەدى.
FEMA (توتەنشە جاعدايلاردى باسقارۋ اگەنتتىگى) جوعارى دايىندىق رەجيمىنە كوشتى. تەحاس گۋبەرناتورى گرەگ ەببوتت قۇتقارۋشىلارعا بارلىق قاجەتتى رەسۋرستاردى پايدالانۋعا رۇقسات بەردى.
گۋادالۋپە وزەنىنىڭ دەڭگەيى ءبىر ساعات ىشىندە 8 مەترگە كوتەرىلگەن. كەي اۋدانداردا بىرنەشە ساعات ىشىندە 250 مم-گە دەيىن جاۋىن جاۋعان، بۇل شىلدە ايىنداعى ورتاشا مولشەردەن 4-5 ەسە كوپ.
