قازاقستاننىڭ سۋ رەسۋرستارى جانە يرريگاتسيا مينيسترلىگى رەسەيدىڭ ورال فەدەرالدىق وكرۋگى بويىنشا وكىلەتتى وكىلى ۆلاديمير ياكۋشەۆتىڭ سۋ جىبەرۋگە قاتىستى مالىمدەمەسىن جوققا شىعاردى، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«توبىل وزەنىنىڭ بويىنداعى سۋ رەسەيدەن كەلەدى. تيىسىنشە، سۋدى اعىزۋ تۋرالى شەشىم رەسەيلىك جاعىنان كەلەتىن اعىندار نەگىزىندە قابىلدانادى. سوندىقتان رەسەيدەگى سۋ تاسقىنىنا قازاقستان ىقپال ەتەدى دەۋ دۇرىس ەمەس. بۇل شىندىققا جاناسپايدى»، - دەلىنگەن مينيسترلىكتىڭ قازتاگ رەداكتسياسىنا جاۋابىندا.
سۋ رەسۋرستارى جانە يرريگاتسيا مينيسترلىگىنىڭ ءباسپاسوز حاتشىسى ءمولدىر ابدۋاليەۆا الەۋمەتتىك جەلىدەگى مالىمدەمەسىندە دە وسى تۋرالى ايتقان.
ول ياكۋشەۆتىڭ سوزىنە مەزەپ "قازاقستان رەسەيدەگى سۋ تاسقىنىنا اسەر ەتەدى دەپ ايتۋ دۇرىس ەمەس. بۇل شىندىققا جاناسپايدى،"- دەگەن.
ۆەدومستۆونىڭ حابارلاۋىنشا، 2 ساۋىردەن باستاپ قازاقستان تاراپى توبىل وزەنى بويىنداعى سۋدى جىبەرۋ بويىنشا قابىلدانعان شەشىمدەر تۋرالى رەسەيلىك تاراپتى حاباردار ەتۋدە.
«تاراپتار رازريادتاردىڭ كوبەيۋى نەمەسە ازايۋى بويىنشا تاۋلىك بويى اقپارات الماسادى. ال ءبىز ەشقانداي كەلىسىلمەگەن ارەكەتتەر تۋرالى ايتىپ وتىرعان جوقپىز. قازاقستاندىق تاراپ رەسەي تاراپىمەن تاتۋ كورشىلىك ارىپتەستىك رۋحىندا ىنتىماقتاستىق پەن اقپارات الماسۋدى جالعاستىرۋعا دايىن»، - دەپ اتاپ ءوتتى مينيسترلىك.
بۇعان دەيىن ياكۋشەۆ قورعان جانە تۇمەن وبلىستارىنداعى سۋ تاسقىنىن بولدىرماۋ ءۇشىن قازاقستان ءوزىنىڭ سۋ قويمالار جۇيەسىنە سۋدى «كەلىسىلگەن تۇردە جىبەرۋگە مىندەتتى ەدى" دەگەن پىكىر بىلدىرگەن. ونىڭ ايتقانى قازاقستان وسىلاي جاساماعان سوڭ قورعان مەن تۇمەن جەرىن سۋ الىپ كەتتى دەگەنگە سايادى. ياكۋشەۆتىڭ مالىمدەمەسى قازاقستاندا ءبىرشاما رەاكتسيا تۋدىرعان. سوندايدا كوپشىلىك توبىل سۋىنىڭ قازاقستاننان رەسەيگە ەمەس، رەسەيدەن قازاقستانعا اعاتىنىن ايتىپ، مىسقىلداعان.
«بىزدە وسىنداي قىس بولعان كەزدە، قاردىڭ جەتكىلىكتى مولشەرى جينالعاندا ءارى سۋ قويماسىندا سۋدىڭ جەتكىلىكتى ۇلكەن قورى جينالعان كەزدە ارىپتەستەرىمىزبەن دۇرىس جانە بىركەلكى بولۋى ءۇشىن سۋ قويمالارىنداعى سۋدى اعىزۋ كەلىسىلگەن، - دەگەن بولاتىن ۆلاديمير ياكۋشەۆ.
رەسەيدىڭ قورعان وبلىسىنىڭ وزەندەرىنە قۇياتىن سۋ قويمالارىنان اعىزىلاتىن سۋ توقتاماي وتىر. وسىعان وراي، "قورعانعا قاراي اعىسپەن مول كولەمدە سۋ كەلە جاتىر،-" دەپ حابارلاعان وبلىس گۋبەرناتورى ۆاديم شۋمكوۆ ءوزىنىڭ Telegram كانالىندا.
«قازىر زۆەرينوگولوۆسكوە اۋىلىندا توبىلدان كەلەتىن سۋ دەڭگەيى قازىردىڭ وزىندە 980 سم-دەن اسىپ وتىر، ال قورعاندا – 375 سم. ەڭ باستى پروبلەما قازىر وسى بولىپ وتىر. قويمالاردان كەلەتىن سۋ توقتاماي اعىپ جاتىر»، - دەپ جازدى ول.
قورعان وبلىسى وڭتۇستىگىندە قازاقستانمەن شەكتەسەدى، توبىل وزەنى وبلىستىڭ ورتالىعىنان وتەدى. وزەن القابىندا ورنالاسقان ەلدى مەكەندەردى، سونىڭ ىشىندە قورعاندى سۋ باسۋ قاۋپى بار.
