قازاقستان رەسەي مەن ۋكراينا اراسىنداعى كەلىسسوزدەر الاڭىنا اينالۋعا دايىن. بۇل تۋرالى RTVI ارناسىنا بەرگەن سۇحباتىندا ءماجىلىس دەپۋتاتى، حالىقارالىق ىستەر، قورعانىس جانە قاۋىپسىزدىك كوميتەتى توراعاسىنىڭ ورىنباسارى ايدوس سارىم مالىمدەدى، دەپ حابارلايدى "ادىرنا" ۇلتتىق پورتالى.
«بارلىق دەلدالدىق پەن مودەراتسياعا قاتىستى ايتار بولسام، ەگەر مۇمكىندىك پەن قاجەتتىلىك تۋىنداسا، قازاقستان دەلدال رەتىندە شىعىپ، قانداي دا ءبىر ماسەلەنى رەتتەۋگە كومەكتەسۋگە دايىن. بۇل رەسەي مەن ۋكراينا قاقتىعىسىنا دا قاتىستى بولۋى مۇمكىن. مەن جالپى پروتسەستى ايتىپ تۇرعان جوقپىن، بىراق جەكەلەگەن كەيستەردى شەشۋ تۇرعىسىندا نەگە بولماسقا. ويتكەنى كەلىسسوزدەر ادەتتە ءارتۇرلى دەڭگەيدەگى ماسەلەلەر قارالاتىن ءارتۇرلى الاڭداردا وتەدى. ارينە، مۇنىڭ ءبارى تەك تاراپتار كەلىسۋگە نيەت بىلدىرگەندە عانا مۇمكىن بولادى»، - دەدى دەپۋتات.
سارىمنىڭ ايتۋىنشا، ول مۇنداي مۇمكىندىككە ءوزى دە قالايدى.
«بۇل قازاقستان ءۇشىن ناعىز توپ وقيعا بولار ەدى. قان توگىستى توقتاتۋ… سونىمەن بىرگە بۇل پرەزيدەنتتىڭ ديپلوماتيالىق مانسابىنداعى ۇلكەن بەلەس بولار ەدى. دەگەنمەن بەيبىتشىلىككە جەتۋ پروتسەسى ونداعان جىلدارعا سوزىلۋى ىقتيمال»، — دەدى ول.
جۋرناليست سۇراعىنا جاۋاپ بەرە وتىرىپ، قازاقستاندا كەلىسسوزدەر وتكىزۋگە العىشارتتار بار ما دەگەندە، سارىم:
ء«بىز ترامپتان بەلگى كوردىك. ول جاقىن ۋاقىتتا ءبىزدىڭ ايماققا كەلمەكشى. ال قازاقستان ادال دەلدال، ادال بروكەر بولعاندىقتان، نەگە بولماسقا؟» — دەدى.
«تاعى ءبىر ماڭىزدى جايت: قازاقستان رەسەي پرەزيدەنتى ۆلاديمير پۋتين ءۇشىن دە، ترامپ ءۇشىن دە قولايلى ەل. ءبىز ولاردىڭ قاۋىپسىزدىگىن دە، باسقا قاجەتتىلىكتەرىن دە تولىق قامتاماسىز ەتە الامىز»، — دەپ تۇيىندەدى ايدوس سارىم.
ەسكە سالايىق، قاڭتاردىڭ باسىندا قازاقستان پرەزيدەنتى قاسىم-جومارت توقاەۆ «انا ءتىلى» گازەتىنە بەرگەن سۇحباتىندا ۋكرايناداعى جاعدايدى دونالد ترامپپەن تەلەفون ارقىلى تالقىلاعانىن ايتقان. ول استانانىڭ ۋكراينا بويىنشا كەلىسسوزدەردىڭ باستالۋىن قولدايتىنىن، بىراق دەلدالدىققا ۇمتىلماي، قازاقستاننىڭ الەۋەتى مەن مۇمكىندىگىنە ساي ارەكەت ەتەتىنىن اتاپ وتكەن. سونداي-اق توقاەۆ رەسپۋبليكا «ارقاشان حالىقارالىق ماسەلەلەردى شەشۋگە كومەكتەسۋگە دايىن» ەكەنىن جەتكىزگەن.
