اقش-تىڭ اريزونا شتاتىندا ورنالاسقان گراند-كانون ۇلتتىق پاركىنىڭ اۋماعىندا ورمان ءورتى باستالدى، دەپ حابارلايدى "ادىرنا" ۇلتتىق پورتالى.
پارك اكىمشىلىگىنىڭ مالىمدەۋىنشە، ءورت ەلدىڭ وڭتۇستىك-باتىس بولىگىندە ورنالاسقان اۋماققا قاۋىپ ءتوندىرىپ وتىر. سول سەبەپتى ەۆاكۋاتسيا جۇمىستارى جۇرگىزىلىپ، تۋريستەر مەن جەرگىلىكتى تۇرعىندار قاۋىپسىز جەرگە كوشىرىلگەن.
«وتكەن ءتۇنى پارك قىزمەتكەرلەرى شامامەن 500 قوناقتى ەۆاكۋاتسيالادى. قاۋىپتى ايماقتا بولعان بارلىق تۋريست پەن قىزمەتكەرلەر امان-ەسەن قۇتقارىلدى»، – دەلىنگەن رەسمي مالىمدەمەدە.
سونداي-اق كانوننىڭ سولتۇستىك بولىگى – North Rim (سولتۇستىك شەتى) ۋاقىتشا جابىلىپ، بۇل ايماققا كىرۋگە تىيىم سالىنعان.
ءورتتىڭ شىعۋىنا بەيسەنبى كۇنى نايزاعاي ءتۇسۋى سەبەپ بولعان. قازىرگى ۋاقىتتا شامامەن 3500 گەكتار جەر وتقا ورانعان. بيلىك وكىلدەرىنىڭ ايتۋىنشا، قۇرعاق اۋا رايى مەن قاتتى جەل ءورتتى ءسوندىرۋ جۇمىستارىن قيىنداتىپ وتىر.
«بۇل — تاۋلى شولەيت ايماق. اشىق ورمان القابى نەگىزىنەن كەمپينگكە ارنالعان»، – دەدى پوليتسيا وكىلى دجون پاكستون.
