بيىل 9 شىلدەدە اقمولا وبلىسىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىندا شەتەلدە تۇراتىن قانداس بالالارعا ارنالعان ەرەكشە شارا – «مەن Qazaqپىن» حالىقارالىق بالالار قۇرىلتايى ءوتتى. ماڭىزدى جيىنعا الەمنىڭ جەتى ەلىنەن كەلگەن 288 بالا قاتىستى.
قۇرىلتايدىڭ نەگىزگى ماقساتى - شەتەلدەگى قازاق بالالارىنىڭ تاريحي وتانىنا دەگەن سۇيىسپەنشىلىگىن ارتتىرۋ، ۇلتتىق قۇندىلىقتار مەن سالت-داستۇرلەردى تەرەڭىرەك تانۋىنا مۇمكىندىك جاساۋ. جوبا اياسىندا قاتىسۋشىلار ۇلتتىق-مادەني باعدارلاما نەگىزىندە ارنايى دايىندالعان تانىمدىق جانە تاربيەلىك شارالارعا بەلسەنە قاتىستى.
بۇل يگى باستاما بيىل تيمۋر قۇلىباەۆتىڭ Halyk قايىرىمدىلىق قورى مەن دۇنيەجۇزى قازاقتارىنىڭ قاۋىمداستىعى اراسىنداعى تۇراقتى سەرىكتەستىك ناتيجەسىندە ۇيىمداستىرىلدى.
ء"وتىنىش بىلدىرگەن قانداستاردىڭ اراسىنان ءتۇرلى سالادا جەتىستىككە جەتكەن، جۇلدەگەر جانە دارىندى بالالار ىرىكتەلدى. شارانىڭ باستى ماقساتى – شەتەلدەگى قازاق بالالارىنىڭ اتاجۇرتىمەن بايلانىسىن نىعايتۋ. قازاقتىڭ ءتىلى مەن ءداستۇرىن تەرەڭىرەك تانىپ، ءوز تامىرىن سەزىنۋگە جول اشۋ. بۇل ولاردىڭ بولاشاقتا وتانىنا ورالىپ، ەلدىڭ دامۋىنا ۇلەس قوسۋىنا ۇلكەن مۇمكىندىك بەرەدى", – دەدى دۇنيەجۇزى قازاقتارى قاۋىمداستىعى توراعاسىنىڭ كەڭەسشىسى قارلىعاش بەكپاتشاقىزى.
قۇرىلتايدا ۇلتتىق قۇندىلىقتاردى دارىپتەۋمەن قاتار، بالالارعا بيزنەس، زاماناۋي كاسىپتەر مەن الەۋمەتتىك جەلىنىڭ مۇمكىندىكتەرى تۋرالى ماڭىزدى دارىستەر وقىلدى.سونداي-اق، بيىلعى باعدارلامادا ەتنومۋزىكالىق ساباقتار، ۇلتتىق اسپاپتارمەن تانىسۋ، مۋزەيلەرگە بارۋ جانە تاريحي جادىگەرلەردى زەرتتەۋ سەكىلدى باعىتتار قامتىلدى.
"تيمۋر قۇلىباەۆتىڭ Halyk قورى دۇنيەجۇزى قازاقتارىنىڭ قاۋىمداستىعىن بىرنەشە جىل قاتارىنان قولداپ كەلەدى. بيىلعى شارا وسى قولداۋىمىزدىڭ ايقىن دالەلى. شەتەلدەگى ءار قازاق بالاسى – ۇلتتىڭ اماناتى. ءبىز ولاردى تۋعان جەرگە تارتۋ ارقىلى انا ءتىلىن جانە ۇلتتىق مادەنيەتىن ساقتاۋعا كومەكتەسكىمىز كەلەدى. ءبىزدىڭ باستى ماقساتىمىز – بالالار بۇل ساپاردان تەك جاقسى اسەر الىپ قانا قويماي، ءوز بولمىسىن سەزىنىپ قايتۋى", – دەدى Halyk قايىرىمدىلىق اتقارۋشى ديرەكتورى ايگۇل ساپارعاليقىزى احمەتوۆا.
وسى جوبا اياسىندا Halyk قايىرىمدىلىق قورىبالالاردىڭ شىعارماشىلىق قابىلەتىن دامىتۋعا ۇلەس قوسۋ ماقساتىندا وقۋ-ساۋىقتىرۋ ورتالىعىنىڭ مۋزىكالىق كابينەتىن تولىق جابدىقتاۋعا قارجىلاي قولداۋ كورسەتتى.
موڭعوليادان كەلگەن 13 جاستاعى ءىنجۋ قازاقستانعا العاش رەت كەلىپ وتىرعانىن ايتىپ، ەرەكشە قۋانىشىمەن ءبولىستى:
"مەن قازاقستانعا كەلۋدى كوپتەن ارماندادىم. اجەم ۇنەمى «سەنىڭ ەلىڭ – قازاقستان» دەپ ايتىپ وتىراتىن. ەندى ءوز وتانىمدى كورىپ، باسقا ەلدەردەگى قازاق بالالارىمەن دوس بولۋ ارمانىم ورىندالدى. انا تىلىندە سويلەي الاتىنىم ءۇشىن ماقتانامىن", – دەدى جاس قاتىسۋشى.
ايتا كەتەيىك، Halyk قايىرىمدىلىق قورى – تيمۋر قۇلىباەۆ جەتەكشىلىك ەتەتىن كوممەرتسيالىق ەمەس ۇيىمداردىڭ ءبىرى. قور دەنساۋلىق ساقتاۋ، ءبىلىم بەرۋ، الەۋمەتتىك قورعاۋ، مادەنيەت جانە سپورت سالالارىندا اۋقىمدى الەۋمەتتىك جوبالاردى جۇيەلى تۇردە جۇزەگە اسىرىپ كەلەدى. سونىمەن قاتار، بيىلدان باستاپ قور شەتەلدەگى قازاق بالالارىنا تۋعان جەرمەن بايلانىس ورناتۋعا مۇمكىندىك بەرەتىن جاڭا باستامالاردى قولعا الدى. بۇل جوبالار ولاردىڭ ۇلتتىق بولمىسىن ساقتاۋىنا، قازاق ءتىلىن مەڭگەرۋىنە جانە تاريحي تامىرىن تەرەڭ تانىپ-بىلۋىنە باعىتتالعان.
مۇنداي جۇمىستار ءبىر رەتتىك شارا ەمەس، قور قىزمەتىنىڭ باسىم جانە ۇزاق مەرزىمدى باعىتتارىنىڭ ءبىرى بولماق.
دۇنيەجۇزى قازاقتارىنىڭ قاۋىمداستىعى – 33 جىلدىق تاريحى بار حالىقارالىق قوعامدىق ۇيىم. قاۋىمداستىق رەسپۋبليكادان تىسقارى، شەتەلدەردە تۇراتىن قازاق دياسپوراسىمەن جان-جاقتى بايلانىس ورناتۋ، مادەني جانە ءبىلىم بەرۋ ماسەلەلەرى بويىنشا قولداۋ كورسەتۋ ماقساتىندا قۇرىلعان.
سونىمەن قاتار، قاۋىمداستىق تاريحي وتانىنا قونىس اۋدارعان قانداستارعا الەۋمەتتىك قولداۋ كورسەتىپ، قايىرىمدىلىق شارالارىن جۇيەلى تۇردە ۇيىمداستىرادى.
