پاۆلودار وبلىسىنداعى جاسىباي دەمالىس ايماعىندا Hyundai Tucson ماركالى اۆتوكولىك جوتادان اۋدارىلىپ كەتتى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىدە تاراعان بەينەدەن كولىكتىڭ بۇرىلىستى ەڭسەرۋ كەزىندە تومەن قاراي سىرعىپ، بىرنەشە رەت اۋدارىلىپ كەتكەنى بايقالادى. بەيرەسمي اقپاراتتىڭ مالىمەتىنشە، بۇل وقيعا 16 شىلدە كۇنى بولعان.
وبلىستىق پوليتسيا دەپارتامەنتى تاراتقان رەسمي مالىمەتكە سايكەس، جۇرگىزۋشى بۇرالاڭ جولمەن ءتۇسىپ كەلە جاتىپ رۋلگە يە بولا الماي، كولىك ەڭىسكە قاراي اۋدارىلىپ كەتكەن. اپات سالدارىنان بەس ادام زارداپ شەكتى: ەكى ادام سول ساتتە اۋرۋحاناعا جەتكىزىلسە، ۇشەۋى كەيىننەن مەديتسينالىق كومەككە جۇگىنگەن.
پاۆلودار وبلىستىق دەنساۋلىق ساقتاۋ باسقارماسىنىڭ حابارلاۋىنشا، 1962 جىلى تۋعان ايەلدىڭ يىعى مەن مويىن ومىرتقاسى زاقىمدانعان. 1975 جىلعى ايەل ادامدا مويىن ومىرتقاسىنىڭ كوگەرۋى، قول جاراقاتتارى بولسا، 1982 جىلعى ايەلدە باس جاراقاتى مەن كەۋدەنىڭ جابىق جاراقاتى، ومىرتقاسى سىنعان بولۋى مۇمكىن. ال 2004 جىلعى بويجەتكەندە شىنتاق پەن تىزە ماڭىنداعى كوگەرۋلەر، 2017 جىلى تۋعان بالانىڭ جاعدايى تۇراقتى.
قازىرگى ۋاقىتتا 1982 جىلى تۋعان ايەل پاۆلودار قالالىق №1 اۋرۋحاناسىنا، 2004 جىلعى قىز وبلىستىق اۋرۋحاناعا، ال 2017 جىلعى بالا وبلىستىق بالالار اۋرۋحاناسىنا جاتقىزىلدى.
پوليتسيا دەپارتامەنتى اتالعان دەرەك بويىنشا قىلمىستىق ءىس قوزعاپ، وقيعانىڭ سەبەپتەرى مەن ءمان-جايىن انىقتاپ جاتىر.
