پرەزيدەنت قاسىم-جومارت توقاەۆ جاڭا سالىق كودەكسىنە قول قويدى. بۇل تۋرالى اقوردا جازدى، دەپ حابارلايدى"ادىرنا".
«مەملەكەت باسشىسى جاڭا سالىق كودەكسىنە جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى»، – دەلىنگەن اقوردا حابارلاماسىندا.
سالىق كودەكسى سالىقتىق اكىمشىلەندىرۋدى جەڭىلدەتپەك.
جاڭا كودەكسكە سايكەس سالىق ەسەپتىلىگىنىڭ كولەمى 30 پايىزعا، سالىق سانى 20%-عا ازايادى. بۇدان بولەك جەڭىلدىكتەر مەن الىم تۇرلەرى دە وڭتايلاندىرىلماق.
«ەلەۋلى وزگەرىستەر كورپوراتيۆتىك جانە جەكە تابىس سالىقتارىنان باستاپ ينۆەستيتسيالاردى ىنتالاندىرۋ جانە سالىق جۇكتەمەسىن قايتا ءبولۋ سەكىلدى بارلىق نەگىزگى باعىتتى قامتيدى»، – دەلىنگەن اقوردا حابارلاماسىندا.
جاڭا سالىق كودەكسىنىڭ باستى جاڭالىعى قوسىلعان قۇن سالىعىنىڭ (ققس) 12%-دان 16%-عا
سونىمەن بىرگە مىناداي وزگەرىستەر ەنگىزىلمەك:
- بۇدان بولەك ءدارى-دارمەك پەن مەديتسينالىق قىزمەتتەرگە ققس مولشەرى تومەندەتىلگەن. ول 2026 جىلى 5% بولسا، 2027 جىلى – 10% بولادى.
- تمككك جانە ءمامس اياسىنداعى قىزمەتتەر ققس-تان بوساتىلادى;
- ورفاندىق جانە الەۋمەتتىك ءمانى بار اۋرۋلاردى ەمدەۋ – ققس-تان بوساتىلادى;
- ارحەولوگيالىق جۇمىستار مەن كىتاپ باسىپ شىعارۋ – ققس-تان بوساتىلادى.
- بىرىڭعاي زەينەتاقى جيناقتاۋشى قورىنان (بزجق) تولەنەتىن زەينەتاقى تولەمدەرى جەكە تابىس سالىعىنان (جتس) بوساتىلادى;
- پايدالانىلۋ مەرزىمى 10 جىلدان جوعارى اۆتوموبيلدەر ءۇشىن كولىك قۇرالى سالىعى تومەندەتىلەدى;
- مۇگەدەكتىگى بار ادامدارعا الەۋمەتتىك سالىقتىق شەگەرىمدەر 882-دەن 5000 اەك-كە دەيىن ۇلعايتىلماق.
كودەكس 2026 جىلدىڭ 1 قاڭتارىنان باستاپ كۇشىنە ەنەدى.
