قازاقستاننىڭ باس پروكۋراتۋراسى مەن ىشكى ىستەر مينيسترلىگىنىڭ قىزمەتكەرلەرى، ازەربايجانداعى قازاقستان ەلشىلىگىنىڭ كومەگىمەن كىسى ءولتىرۋ مەن قاراقشىلىق ءۇشىن حالىقارالىق ىزدەۋدە بولعان قازاقستاندىقتى ەكستراديتسيالادى، دەپ حابارلايدى "ادىرنا" ۇلتتىق پورتالى باس پروكۋراتۋرانىڭ ءباسپاسوز قىزمەتىنە سىلتەمە جاساپ.
باقىلاۋشى ورگاننىڭ حابارلاۋىنشا، وتكەن جىلدىڭ قازان ايىندا كۇدىكتى ءوز سىبايلاسىمەن بىرگە تانىس كاسىپكەردى كەزدەسۋ سىلتاۋىمەن الداپ شاقىرىپ، ونى ەسىنەن تانعانشا سوققىعا جىققان.
ولار جابىرلەنۋشىنىڭ جالپى قۇنى شامامەن 40 ميلليون تەڭگە تۇراتىن مۇلكىن يەمدەنىپ، كەيىن ونى الماتى قالاسىنان تىس جەرگە شىعارىپ، ءولتىرىپ كەتكەن.
«كۇدىكتىلەردىڭ ءبىرى وقيعا ورنىندا ۇستالدى، ال ەكىنشىسى بوي تاسالاپ، حالىقارالىق ىزدەۋ جاريالاندى. بيىلعى جىلدىڭ قاڭتار ايىندا كۇدىكتى ازەربايجان اۋماعىندا ۇستالىپ، قازاقستان باس پروكۋراتۋراسىنىڭ سۇراۋى بويىنشا وتانىنا ەكستراديتسيالاندى. قازىرگى ۋاقىتتا ول تەرگەۋ يزولياتورىنا قامالدى»، – دەلىنگەن حابارلامادا.
اتالعان قىلمىستار ءۇشىن 20 جىلعا دەيىن نەمەسە ءومىر بويى باس بوستاندىعىنان ايىرۋ جانە مۇلكىن تاركىلەۋ جازاسى قاراستىرىلعان.
