قازاقستاندىق ءانشى ديماش قۇدايبەرگەن قىرعىزستانداعى حالىقارالىق «مەيكين ازيا» فەستيۆالىنە قاتىستى، دەپ حابارلايدى "ادىرنا" ۇلتتىق پورتالى.
بۇل تۋرالى فەستيۆالدىڭ نەگىزىن قالاۋشى، قىرعىز رەسپۋبليكاسىنىڭ حالىق جازۋشىسى، تۇركسوي ۇيىمىنىڭ باس حاتشىسى سۇلتان راەۆ مالىمدەدى.
22 شىلدە كۇنى ديماش ىستىقكول جاعالاۋىندا ءوتىپ جاتقان فەستيۆالگە كەلىپ، كوپشىلىكتىڭ ەرەكشە ىقىلاسىنا بولەندى. ونى فەستيۆال الاڭىندا سۇلتان راەۆتىڭ ءوزى قارسى الدى.
راەۆتىڭ ايتۋىنشا، ول ديماشپەن بىرنەشە رەت كەزدەسكەن. ءانشى 12 جىل بۇرىن ءدال وسى فەستيۆالدە العاش رەت حالىقارالىق دەڭگەيدە گران-پري جەڭىپ الىپ، ەلگە تانىلعان.
«سول كەزدە ول نەبارى 19 جاستا ەدى. فەستيۆالدە 16 ەلدىڭ مىقتى ۆوكاليستەرى باق سىنادى. ديماش سولاردىڭ اراسىنان سۋىرىلىپ شىعىپ، باس جۇلدەنى يەلەندى. سودان بەرى ول – الەمدىك جۇلدىز»، – دەدى سۇلتان راەۆ.
راەۆ سونىمەن قاتار ديماشقا قىرعىزستانعا كەلۋ تۋرالى ۇسىنىستى بىلتىر تۇركيادا وتكەن كونتسەرت كەزىندە ايتقانىن جەتكىزدى.
ودان بولەك، سۇلتان راەۆ جەلىدەگى پاراقشاسىندا:
"مەيكين ازيا" فەستيۆالىنىڭ جاڭعىرىعى، ديماشتىڭ عارىشتىق ءۇنى مەكسيكاعا جەتتى. مەكسيكالىق سەگمەنتتە بۇل سۋرەت جاريالاندى… مەكسيكادان ماحابباتپەن!" - دەپ سۋرەت جاريالادى.
