ەرىكتى بولۋ – جۇرەكتىڭ ءىسى. ول ءۇشىن ۇلكەن جۇرەك پەن شەكسىز مەيىرىم، شىنايى جاناشىر بولمىس بولۋى ءتيىس. كەز كەلگەن جاننىڭ بويىنان تابىلا بەرمەيتىن "جاناشىرلىق", "ىزگىلىك" دەيتىن اسىل قاسيەتتەرگە يە ەرىكتى جاندار، بۇگىنگى ازاماتتىق قوعامنىڭ اينىماس بولشەگى. ولار ەل ءۇشىن بىلەك سىبانا ەڭبەك ەتىپ قانا قويماي، قوعامنىڭ "ادام" دەڭگەيىندەگى اسىل ىستەرىن اتقارىپ ءجۇر. سونداي جانداردىڭ ءبىرى، “الماتى ەرىكتىلەر ليگاسىنىڭ” بەلسەندى مۇشەسى، جاس ءارى العىر ايجان ماراتقىزى ءوزىنىڭ ەرىكتى رەتىندەگى ازاماتتىق پوزيتسياسى جايلى "ادىرنا" تىلشىسىنە اڭگىمەلەپ بەردى.
“جاقسىلىق – ادامنىڭ تابيعي بولمىسى”
ايجان ەرىكتىلەر قاتارىنا كەزدەيسوق قوسىلماعان. ول “ەحرو-2017” كورمەسىنە قاتىسقىسى كەلگەنىمەن، جاس مولشەرىنە بايلانىستى ىرىكتەۋدەن وتە الماعان. الايدا بۇل ونى توقتاتقان جوق. كەرىسىنشە، ىزدەنىس جولىنا ءتۇسىپ، الماتىداعى “ەرىكتىلەر ليگاسىنا” قوسىلادى. سودان بەرى قوعامدىق شارالاردىڭ بىردە-بىرىنەن تىس قالىپ كورمەپتى.
“ەرىكتى بولۋ – ءوزىڭدى قاجەت سەزىنۋ. ەشكىمنىڭ قىسىمىنسىز، شىنايى نيەتپەن ارەكەت ەتۋ – ەرىكتىنىڭ باستى قاسيەتى. مەنىڭشە، بۇل – قوعامعا دەگەن جاۋاپكەرشىلىكتىڭ كورىنىسى”، – دەيدى ايجان.
ايتۋىنشا، ەرىكتى دەگەنىمىز – اقى كۇتپەي، ادال قىزمەت ەتەتىن جان. قايىرىمدىلىق، كومەك كورسەتۋ – حالقىمىزدىڭ عاسىرلار بويى جالعاسقان ءداستۇرى. بۇرىنعى “اسار” سالتى – بۇگىنگى ەرىكتىلىكتىڭ تامىرى دەسەك قاتەلەسپەيمىز.
"الماتى مارافونىنان – بالالار ۇيىنە دەيىن"
“ەرىكتىلەر ليگاسى” – بۇگىندە ون مىڭعا جۋىق بەلسەندى جاستى بىرىكتىرىپ وتىرعان ءىرى پلاتفورما. ۇيىم بەس باعىتتا جۇمىس ىستەيدى: الەۋمەتتىك، ءبىلىم بەرۋ، ەكولوگيالىق، دەنساۋلىق ساقتاۋ جانە جەكە دامۋ. جاس ەرەكشەلىگىنە شەكتەۋ جوق – مەكتەپ وقۋشىلارىنان باستاپ، زەينەتكەرلەرگە دەيىن قوعامعا ۇلەس قوسىپ ءجۇر.
ايجان ءۇشىن ەڭ ەستە قالعان شارا – الماتى مارافونى. ول مۇنداي اۋقىمدى جوبالاردا ۆولونتەر بولۋ – شىنايى رۋح پەن ۇيىمشىلدىقتىڭ سىنالار ءساتى ەكەنىن ايتادى.
ء“يا، ءبىز تەگىن جۇمىس ىستەيمىز. كەيدە ءبىزدىڭ ەڭبەگىمىز كورىنبەۋى دە مۇمكىن. بىراق ەرىكتى بولۋ – كوزگە ءتۇسۋ ەمەس، جۇرەكپەن سەزىنۋ”، – دەيدى ول.
جاقىندا ايجان ءوزى باستاعان العاشقى جەكە جوباسىن ىسكە اسىرىپتى. “ستان ستارشيم درۋگوم” دەپ اتالاتىن بۇل باستاما بالالار ۇيىندەگى تاربيەلەنۋشىلەردىڭ ارمانىنا جول اشۋدى ماقسات ەتەدى.
“مۋزەيگە اپارعان كۇن – مەن ءۇشىن ۇلكەن جەڭىس بولدى. ۇزاق ىزدەنىپ، كەلىسىپ، سەنىم ارتۋعا كوندىرە الماي، كەيدە ءتىپتى جىلاعان ساتتەرىم دە بولدى. بىراق بالالاردىڭ جۇزىندەگى قۋانىشتى كورىپ، بار قيىندىق ارتتا قالعانداي بولدى”، – دەيدى ايجان.
مەملەكەت پەن قوعامنان قولداۋ بار ما؟
2020 جىلى قازاقستاندا “ەرىكتىلەر جىلى” جاريالانعانى بەلگىلى. ايجاننىڭ ايتۋىنشا، بۇل ەرىكتىلەر قوزعالىسىنا سەرپىن بەردى. ستۋدەنتتەر ءۇشىن بىرقاتار قولداۋلار ەنگىزىلىپ، ۆولونتەرلىك ەڭبەك اقىلى قىزمەتكە دە اينالا باستادى.
“مينيسترلىك ساعاتىنا 1000 تەڭگە كولەمىندە اقى بەلگىلەدى. بۇل – تەك تابىس كوزى ەمەس، ەڭ باستىسى – جاستارعا ۇلكەن موتيۆاتسيا. كوپشىلىگى ەرىكتى بولا ءجۇرىپ، ءوز باعىتىن تاۋىپ، جاڭا دوستار تابادى”، – دەيدى ول.
قوعام كوزقاراسى – ەكىۇشتى
ايجاننىڭ پىكىرىنشە، قازاقستاندا ۆولونتەرلىك مادەنيەت قالىپتاسىپ كەلە جاتسا دا، قوعامنىڭ ءبىر بولىگى بۇل قىزمەتتىڭ ءمانىن ءالى تولىق تۇسىنبەي كەلەدى.
“كەيدە شارالاردا بىزگە اۋىر سوزدەر ايتىلىپ جاتادى. بىراق ءبىز رەنجىمەيمىز. ويتكەنى ءبىز جاقسىلىق جاساۋعا ۇمتىلامىز. قوعامنان ۇنەمى كۇتۋدى دوعارىپ، ءوزىمىز ۇلەس قوسا باستاساق، ءبارى وزگەرەدى”، – دەيدى ول سەنىممەن.
“ەرىكتىلەر – قوعامنىڭ ءۇنسىز قاھارماندارى”
ايجان مامەش – ءبىر عانا ەرىكتى. بىراق ونىڭ ءجۇرىپ وتكەن جولى مىڭداعان جاستىڭ ارمانىنا جول اشا الادى. بۇگىن ول – ەرىكتى. ەرتەڭ – كوشباسشى. قوعامدى وزگەرتۋ ءۇشىن ۇلكەن لاۋازىم كەرەك ەمەس. كەيدە جىلى ءسوز بەن كىشكەنتاي كومەك تە ۇلكەن وزگەرىسكە باستايدى. ال ايجان سول وزگەرىستى باستاۋعا دايىن جانداردىڭ ءبىرى.
