شۋ اۋدانىنداعى مەكتەپتەردىڭ بىرىندە وقۋ ءىسىنىڭ مەڭگەرۋشىسى اۋىلداستارىنىڭ زەرگەرلىك بۇيىمدارى مەن قاراجاتىن ۇرلاپ، بۇيىمداردى تارازداعى ساۋدا ورتالىقتارىنا ساتىپ جىبەرگەن. بۇل تۋرالى جامبىل وبلىسىنىڭ پوليتسيا دەپارتامەنتى 23 شىلدە كۇنى كەزەكشى بولىمگە جەرگىلىكتى تۇرعىننان ارىز تۇسكەنىن مالىمدەدى، دەپ حابارلايدى “ادىرنا”.
ءتىنتۋ كەزىندە مەڭگەرۋشىدەن اقشا مەن زەرگەرلىك بۇيىمدار تابىلدى.
جابىرلەنۋشىنىڭ ايتۋىنشا، بەلگىسىز ادام ونىڭ ۇيىنە تەرەزە ارقىلى كىرىپ، التىن بۇيىمدارى مەن اقشاسىن ۇرلاپ كەتكەن.
«پوليتسەيلەر وسى قىلمىستى جاسادى دەگەن كۇدىكپەن شۋ اۋدانىنىڭ 33 جاستاعى تۇرعىنىن ۇستادى. وسى فاكتى بويىنشا قازاقستان رەسپۋبليكاسى قىلمىستىق كودەكسىنىڭ 188-بابى 3-تارماعىنىڭ 3-بولىگى بويىنشا (تۇرعىن ۇيگە زاڭسىز كىرىپ جاسالعان ۇرلىق) سوتقا دەيىنگى تەرگەۋ باستالدى»، — دەپ حابارلادى دەپارتامەنت.
تەرگەۋ بارىسىندا ۇستالعان ادامنىڭ جالپى سوماسى 3 450 000 تەڭگە مۇلىكتى ۇرلاۋعا قاتىسى بار ەكەنى انىقتالدى. وقۋ ءىسى مەڭگەرۋشىسى قىلمىسىن مويىندادى.
