«ماسكەۋ ينجەنەرلىك فيزيكا ينستيتۋتى» ۇلتتىق يادرولىق زەرتتەۋ ۋنيۆەرسيتەتىنىڭ الماتى قالاسىنداعى فيليالى باكالاۆريات پەن ماگيستراتۋراعا قابىلداۋ ناۋقانىن باستادى. رەسەيدەگى ەڭ ۇزدىك ۇلتتىق زەرتتەۋ ۋنيۆەرسيتەتتەرىنىڭ ءبىرى قازاقستانداعى فيليالىندا «قورعالعان جوعارى ءونىمدى ەسەپتەۋ جۇيەلەرى» جانە «ەلەمەنتار بولشەكتەر فيزيكاسى جانە عارىش فيزيكاسى» وقۋ باعدارلامالارى بويىنشا ساباق بەرەدى، دەپ جازادى "ادىرنا" ۇلتتىق پورتالى.
«Mيفي» فيليالى ءال-فارابي اتىنداعى قازۇۋ بازاسىندا ورنالاسادى جانە اتالعان وقۋ ورنىنىڭ ماماندارى قۇجاتتاردى قابىلدايدى. 2 تامىزدا الماتىعا ميفي ۇلتتىق يادرولىق زەرتتەۋ ۋنيۆەرسيتەتىنىڭ ىرىكتەۋ جانە پاندىك كوميسسياسىنىڭ وكىلدەرى كەلەدى.
بۇگىنگى تاڭدا باكالاۆريات بويىنشا 62 جانە ماگيستراتۋرادا وقۋدى جالعاستىرۋ ءۇشىن 10 قۇجات تاپسىرىلدى. قابىلداۋ ەمتيحاندارىنىڭ ءبىرىنشى تولقىنى 3 (فيزيكا) جانە 5 تامىزدا (ماتەماتيكا) وتەدى. ەكىنشى تولقىن سايكەسىنشە 25 جانە 27 تامىزعا جوسپارلانعان.
فيليالدىڭ رەسمي اشىلۋى قىركۇيەكتىڭ ەكىنشى جارتىسىنا، ال وقۋدىڭ باستالۋى 2022 جىلدىڭ 1 قازانىنا جوسپارلانعان.
"ميفي" ۇلتتىق يادرولىق زەرتتەۋ ۋنيۆەرسيتەتى – بەدەلدى عىلىمي مەكتەپتەرى بار الەمنىڭ جەتەكشى زەرتتەۋ ۋنيۆەرسيتەتتەرىنىڭ ءبىرى (الەمدەگى توپ-350). مۇندا نوبەل سىيلىعىنىڭ 6 لاۋرەاتى جۇمىس ىستەدى. بۇگىندە ميفي-دە 200-دەن استام ءبىلىم بەرۋ باعدارلاماسى جۇزەگە اسىرىلۋدا.
- رەسەي جوعارى وقۋ ورىندارىمەن ىنتىماقتاستىقتىڭ نەگىزگى باعىتتارى – يادرولىق ەنەرگەتيكا، گەولوگيا جانە مۇناي-گاز ونەركاسىبى ءۇشىن كادرلار دايارلاۋ. ناتيجەسىندە ەلىمىز تەك جوعارى بىلىكتى ينجەنەرلەردى عانا ەمەس، سونىمەن قاتار عىلىمي-زەرتتەۋ قىزمەتىنە دايىن جاس عالىمداردى دا الادى دەپ كۇتەمىز، - دەيدى عىلىم جانە جوعارى ءبىلىم ءمينيسترى ساياسات نۇربەك.
"ميفي" ۇلتتىق يادرولىق زەرتتەۋ ۋنيۆەرسيتەتىندە وقىتۋدىڭ باستى ەرەكشەلىگى – ءبىلىم بەرۋ، عىلىمي جانە يننوۆاتسيالىق قىزمەت ۇزدىكسىز جۇرگىزىلەدى. ستۋدەنتتەر تومەنگى كۋرستان باستاپ عىلىمي-زەرتتەۋ جۇمىستارىنا قاتىسا الادى. 3-كۋرستان وقۋ جانە عىلىمي-زەرتتەۋ جۇمىستارىنا قاتىسۋ مىندەتتى سانالادى.
ەستەرىڭىزگە سالا كەتەيىك، قر پرەزيدەنتى ق.توقاەۆ پارلامەنت ءماجىلىسىنىڭ 2022 جىلعى 11 قاڭتارداعى وتىرىسىندا 2025 جىلعا دەيىن قازاقستاندا بەدەلدى شەتەلدىك ۋنيۆەرسيتەتتەردىڭ كەمىندە 5 فيليالىن اشۋدى تاپسىرعان بولاتىن.
"ادىرنا" ۇلتتىق پورتالى
