الماتى وبلىسىنداعى ۇلكەن اۋىلىنىڭ ماڭىندا قازاقستان تاريحىنداعى العاشقى اتوم ەلەكتر ستانتسياسىنىڭ قۇرىلىسىن باستاۋ ءراسىمى ءوتتى، دەپ حابارلايدى "ادىرنا".
قۇرىلىستى باستاۋ تۋرالى تۇيمەنى قازاقستان اتوم ەنەرگياسى جونىندەگى اگەنتتىگىنىڭ توراعاسى الماسادام ساتقاليەۆ، رەسەيلىك روساتوم كومپانياسىنىڭ باس ديرەكتورى الەكسەي ليچاچەۆ، الماتى وبلىسى جامبىل اۋدانى قوعامدىق كەڭەسىنىڭ توراعاسى باعدات اليەۆ پەن رەسەيدەگى ۇلتتىق زەرتتەۋ يادرولىق ۋنيۆەرسيتەتى «ميفي» ستۋدەنتتەرى باستى.
ەسكە سالايىق، قۇرىلىس الاڭىنا ارنايى تەحنيكا جەتكىزىلىپ، سونداي-اق نوۆوۆورونەج اتوم ەلەكتر ستانتسياسىنىڭ ماكەتى ورناتىلعان. قازاقستاندا سالىناتىن ستانتسيا وسى ۇلگىگە ۇقساس بولادى. ماكەتتە كورسەتىلگەن № 6 ەنەرگوبلوك — الەمدەگى 3+ بۋىنىنا جاتاتىن العاشقى ەنەرگوبلوك.
ءراسىم ۇيىمداستىرىلعان جەردە توپىراق سىناماسىن الۋ ءۇشىن بۇرعىلاۋ جۇمىستارى دا باستالدى. الىنعان كاپسۋلاداعى ۇلگىلەر رەسەي جاعىنا زەرتتەۋ جۇرگىزۋ ءۇشىن تاپسىرىلادى.
ايتا كەتسەك، قازاقستانداعى العاشقى اتوم ەلەكتر ستانتسياسىنىڭ قۇرىلىسىن اياقتاۋ 2035–2036 جىلدارعا جوسپارلانعان.
ال سوۆەت وداعى كەزىندە 1949 جىلى سەمەي جەرىندەگى يادرولىق سىناق الاڭىندا العاشقى جارىلىستار دا تامىز ايىندا وتكىزىلگەن بولاتىن.
