قىرعىزستان پرەزيدەنتى سادىر جاپاروۆ «قىرعىز رەسپۋبليكاسى قىلمىستىق كودەكسىنە وزگەرىستەر ەنگىزۋ تۋرالى» زاڭ جوباسىن قارسىلىقتارىمەن جوگوركۋ كەنەشكە (پارلامەنتكە) قايتا قايتاردى. بۇل تۋرالى Kabar اقپارات اگەنتتىگى جاريالادى، دەپ حابارلايدى “ادىرنا”.
اتالعان قۇجاتتى 25 ماۋسىم كۇنى دەپۋتاتتار نۇرلان ازىعاليەۆ پەن مەردەربەك ساققاراەۆتىڭ باستاماسىمەن پارلامەنت قابىلداعان بولاتىن.
پرەزيدەنتتىڭ قارسىلىقتارى ومبۋدسمەننىڭ، باس پروكۋراتۋرانىڭ، ءدىن ىستەرى جانە ۇلتارالىق قاتىناستار جونىندەگى ۇلتتىق اگەنتتىكتىڭ، ۇلتتىق عىلىم اكادەمياسىنىڭ، ادىلەت مينيسترلىگىنىڭ جانە كونستيتۋتسيالىق سوت اپپاراتىنىڭ قورىتىندىلارىنا نەگىزدەلگەنى ايتىلدى.
اتالعان قۇرىلىمداردىڭ پىكىرىنشە، كوپ ايەل الۋشىلىق پەن قوس نەكە ءۇشىن قىلمىستىق جاۋاپكەرشىلىكتى ساقتاۋ – قىرعىزستاننىڭ حالىقارالىق مىندەتتەمەلەرىنە ساي كەلەدى، گەندەرلىك تەڭدىك پەن قۇقىق ۇستەمدىگى قاعيداتتارىنا بەيىلدىلىگىن راستايدى، سونداي-اق ايەلدەر مەن بالالاردى قۇقىقتىق جانە الەۋمەتتىك تەڭسىزدىكتەن قورعايدى. سونىمەن قاتار بۇل وتباسى ينستيتۋتىن نىعايتادى، ول قىرعىزستان كونستيتۋتسياسى مەن زاڭدارىندا بەكىتىلگەن.
قازىرگى ۋاقىتتا قىرعىز رەسپۋبليكاسىنىڭ قىلمىستىق كودەكسىنىڭ 176-بابىنا سايكەس، ەكى نەمەسە ودان دا كوپ ايەلمەن ءبىر شاڭىراق استىندا بىرگە تۇرۋ – قوس نەكە نەمەسە كوپ ايەل الۋشىلىق دەپ تانىلادى. بۇل ءۇشىن ايىپپۇل، قوعامدىق جۇمىستار نەمەسە تۇزەتۋ جۇمىستارى تۇرىندە جازا قاراستىرىلعان. ءىس تەك جابىرلەنۋشى تاراپتىڭ شاعىمى بويىنشا عانا قوزعالادى. ال وتباسى كودەكسى تەك ءبىر زاڭدى نەكەگە رۇقسات بەرەدى.
