الماتىدا اتموسفەرالىق اۋانى قورعاۋ جونىندەگى جاڭا ەرەجەلەر جوباسى ۇسىنىلدى. قۇجاتقا سايكەس، كەيبىر اۆتوكولىك يەلەرى ءۇشىن مەگاپوليسكە كىرۋ اقىلى بولۋى مۇمكىن، دەپ حابارلايدى "ادىرنا" ۇلتتىق پورتالى.
اكىمدىك مالىمەتىنشە، جوبا ەكولوگيالىق كودەكستىڭ 206-بابىنا سايكەس ازىرلەنىپ، قالاداعى ەكولوگيالىق جاعدايدى جاقسارتۋعا، زياندى شىعارىندىلاردى ازايتۋعا جانە تۇرعىنداردىڭ دەنساۋلىعىن قورعاۋعا باعىتتالعان.
ەكولوگيالىق مونيتورينگ دەرەكتەرىنە قاراعاندا، الماتى تۇراقتى تۇردە الەمدەگى ەڭ لاستانعان قالالاردىڭ قاتارىنا ەنىپ وتىر. 2024 جىلعى ەسەپ بويىنشا قالاداعى جالپى شىعارىندىلار كولەمى جىلىنا 189 مىڭ توننادان اسادى، ونىڭ 60 پايىزى نەمەسە 112 مىڭ تونناسى اۆتوكولىككە تيەسىلى. ەڭ كوپ ۇلەس (84%) ەكوكلاسى تومەن ەۆرو-0 كولىكتەرىنە تيەسىلى.
جوبا اياسىندا تومەن ەميسسيالى ايماقتار (Low Emission Zones, LEZ) قۇرىلادى، مۇندا تومەن ەكوكلاستى كولىكتەردىڭ قوزعالىسى شەكتەلەدى جانە ول ءۇشىن اقى تولەنەدى، كوممۋنالدىق جانە جەكە اۆتوپاركتەرگە قويىلاتىن تالاپتار كۇشەيتىلەدى. سونداي-اق، زاماناۋي ەكوباقىلاۋ جۇيەلەرى ەنگىزىلەدى.
العاشقى كەزەڭدە، قازان ايىندا، پيلوتتىق رەجيمدە ەنگىزىلىپ، تەستىلىك تالداۋ جۇرگىزىلەدى. بۇل كەزدە جۇرگىزۋشىلەردەن اقى الىنبايدى. كەيىنىرەك ەۆرو-0-4 كولىكتەرى ءۇشىن قالاعا كىرۋ اقىلى بولادى. ال ەلەكتروموبيلدەر، سۋتەگى قوزعالتقىشىنداعى كولىكتەر جانە ەۆرو-5 پەن ەۆرو-6 ستاندارتىنداعى ماشينالار بۇل تولەمنەن بوساتىلادى.
زياندى اسەردى ازايتۋ ءۇشىن قالا تۇرعىندارىنا جەڭىلدىكتەر قاراستىرىلعان. ارنايى تىركەۋدەن وتكەن جانە تەحنيكالىق بايقاۋدان وتكەن الماتىلىقتار اي سايىنعى ابونەمەنتتى ارزانداتىلعان باعامەن ساتىپ الا الادى.
تۇسكەن قاراجات ەكولوگيالىق جوبالارعا، قوعامدىق كولىكتى دامىتۋعا جانە الەۋمەتتىك قولداۋ شارالارىنا باعىتتالماق. سونىمەن قاتار، ەسكى ەكولوگيالىق كلاستى كولىكتەردى كەزەڭ-كەزەڭىمەن ساتىپ الۋ باعدارلاماسى ىسكە قوسىلادى.
اكىمدىكتىڭ ايتۋىنشا، بۇل شارالار اۋا ساپاسىن جاقسارتۋعا، كاسىپكەرلەردىڭ ەكولوگيالىق جاۋاپكەرشىلىگىن ارتتىرۋعا جانە قالا تۇرعىندارىنىڭ ءومىر ساپاسىن كوتەرۋگە مۇمكىندىك بەرەدى.
قازىر جاڭا ەرەجەلەر جوباسى قوعامدىق تالقىلاۋدا.
