بۇگىن، 20 تامىزدا شىمكەنتتە شىمكەنت قالاسى اكىمىنىڭ ورىنباسارى رۋسلان بەردەنوۆكە قاستاندىق جاساۋ ءىسى بويىنشا ۇكىم شىقتى، دەپ حابارلايدى "ادىرنا" ۇلتتىق پورتالى.
سوتتالۋشى ەرنار جيەنباي قر قك-ءنىڭ 24-بابى 3-بولىگى جانە 99-بابى 1-بولىگى بويىنشا («قىلمىسقا دايىندالۋ جانە قاستاندىق جاساۋ» – «ادام ءولتىرۋ») ايىپتالدى.
سوت انىقتاعانداي، 2025 جىلعى 21 ساۋىردە «تۇرعىن ءۇي شىمكەنت» جشس-ءنىڭ ديرەكتورى جيەنباي ماس كۇيىندە، ارازدىقتىڭ سالدارىنان قالا اكىمىنىڭ ورىنباسارى بەردەنوۆكە قاستاندىق جاساپ، وعان اڭشى مىلتىعىنان وق اتقان.
«جيەنبايدىڭ وعى تاۋسىلعاندىقتان، سونداي-اق جابىرلەنۋشىنىڭ قارسىلاسۋىنان جانە كۋاگەرلەردىڭ كومەگىنەن ول قىلمىستىق نيەتىن اياعىنا دەيىن جۇزەگە اسىرا المادى»، – دەدى سوتتا.
ايىپتالۋشىنىڭ كىناسى ونىڭ ءوز مويىنداۋى، جابىرلەنۋشىنىڭ جانە كۋاگەرلەردىڭ ايعاقتارىمەن دالەلدەندى. جاۋاپكەرشىلىكتى جەڭىلدەتەتىن جايت رەتىندە كىنانى ءىشىنارا مويىنداۋى، وكىنۋى، بۇرىن سوتتالماعانى جانە اسىراۋىندا ەكى كىشكەنتاي بالاسىنىڭ بارى ەسكەرىلدى. ال اۋىرلاتاتىن جاعداي – قىلمىستى الكوگولدىك ماس كۇيىندە جاساۋى بولدى.
«جوعارىدا ايتىلعانداردى نەگىزگە الا وتىرىپ، سوت جيەنبايدى قر قك-ءنىڭ 24-بابى 3-بولىگى جانە 99-بابى 1-بولىگى بويىنشا كىنالى دەپ تانىپ، وعان 9 جىل باس بوستاندىعىنان ايىرۋ جازاسىن تاعايىندادى. ۇكىم زاڭدى كۇشىنە ەنگەن جوق»، – دەپ حابارلادى سوت.
ايتا كەتەيىك، شىمكەنت اكىمىنىڭ ورىنباسارىنا قاستاندىق جاساۋ ءىسى سوتتا 2025 جىلعى 6 تامىزدا قارالا باستادى.
