22–23 تامىز كۇندەرى «اۆازا» ۇلتتىق تۋريستىك ايماعىندا وزبەكستان رەسپۋبليكاسىنىڭ پرەزيدەنتى شاۆكات ميرزيەەۆتىڭ تۇركىمەنستانعا جۇمىس ساپارى ءوتتى. ساپار اياسىندا وزبەكستان، تۇركىمەنستان جانە ازەربايجان كوشباسشىلارىنىڭ ۇشجاقتى كەزدەسۋى ۇيىمداستىرىلدى، دەپ حابارلايدى “ادىرنا”.
كەلىسسوزدەرگە وزبەكستان پرەزيدەنتى شاۆكات ميرزيەەۆ، تۇركىمەن حالقىنىڭ ۇلتتىق كوشباسشىسى، حالك ماسلاحاتىنىڭ توراعاسى گۋربانگۋلى بەردىمۇحامەدوۆ جانە ازەربايجان پرەزيدەنتى يلحام اليەۆ قاتىستى.
تاراپتار ساۋدا-ەكونوميكا، كولىك-كوممۋنيكاتسيا، ەنەرگەتيكا جانە گۋمانيتارلىق سالالارداعى كوپجاقتى ىنتىماقتاستىقتى دامىتۋعا قاتىستى كەڭ اۋقىمدى ماسەلەلەردى تالقىلادى.
ميرزيەەۆ گۋربانگۋلى بەردىمۇحامەدوۆتى اۆازادا وتكەن دامۋشى تەڭىزگە شىعا المايتىن ەلدەر جونىندەگى بۇۇ-نىڭ ءۇشىنشى كونفەرەنتسياسىنىڭ ءساتتى وتۋىمەن قۇتتىقتاپ، سونداي-اق ازەربايجان پرەزيدەنتى يلحام اليەۆتى ارمەنيامەن بەيبىتشىلىك دەكلاراتسياسىن قابىلداۋمەن شىن جۇرەكتەن قۇتتىقتادى.
كولىك بايلانىسى مەن لوگيستيكا ماسەلەلەرىنە ەرەكشە نازار اۋدارىلدى. كوشباسشىلار ءۇش ەلدىڭ ترانزيتتىك الەۋەتىن ءتيىمدى پايدالانۋدىڭ، قولدانىستاعى جانە بولاشاعى بار كولىك دالىزدەرىن ۇشتاستىرۋدىڭ ماڭىزىن اتاپ ءوتتى. قىتاي – وزبەكستان تەمىرجولىن سالۋ جانە ترانساۋعان ءدالىزىن جۇزەگە اسىرۋ جوباسىنىڭ وزەكتىلىگى دە ايتىلدى.
ورتا ءدالىزدى، ونىڭ ىشىندە زانگەزۋر ءدالىزىن دامىتۋ جوسپارلارى قولداۋ تاپتى. تۇرىكمەنباشى مەن باكۋ پورتتارىندا وتكىزۋ قابىلەتىن ارتتىرۋ، زاماناۋي لوگيستيكالىق ينفراقۇرىلىم قۇرۋ، كەلىسىلگەن تاريفتىك ساياسات جۇرگىزۋ جانە پروتسەستەردى تسيفرلاندىرۋ ماسەلەلەرى تالقىلاندى.
ەنەرگەتيكالىق قاۋىپسىزدىكتى قامتاماسىز ەتۋ ماقساتىندا تاراپتار ىنتىماقتاستىقتى تەرەڭدەتۋگە، ەكسپورتتىق دالىزدەردى دامىتۋعا جانە ەۋروپاعا «جاسىل» ەنەرگيا جەتكىزۋ جوبالارىن ىسكە اسىرۋعا مۇددەلىلىك ءبىلدىردى. كاسپي شەلفىندەگى كومىرسۋتەك كەن ورىندارىن بارلاۋ مەن يگەرۋ بويىنشا سەرىكتەستىك پەرسپەكتيۆالارى دا قارالدى.
تاۋار اينالىمىن ۇلعايتۋ جانە ونەركاسىپتىك كووپەراتسيانى دامىتۋعا ەرەكشە ءمان بەرىلدى. سوڭعى جىلدارى وزبەكستاننىڭ تۇركىمەنستان جانە ازەربايجانمەن ءوزارا ساۋداسى ەكى ەسەگە ءوسىپ، ونەركاسىپتىك ونىمدەردىڭ ۇلەسى 40 پايىزعا جەتكەنى اتاپ ءوتىلدى.
وزبەكستان پرەزيدەنتى تۇراقتى ساۋدا-لوگيستيكالىق تىزبەكتەردى قالىپتاستىرۋ، تاراتۋ ورتالىقتارىن قۇرۋ، فيتوسانيتارلىق تالاپتاردى بىرىڭعايلاۋ، ونىمدەردى تسيفرلىق تاڭبالاۋ جانە ەلەكتروندىق ساۋدا الاڭدارىن كەڭەيتۋ جونىندەگى ءىس-قيمىلداردىڭ كەشەندى جوسپارىن بىرلەسىپ ازىرلەۋدى ۇسىندى.
كەلىسسوزدەر قورىتىندىسى بويىنشا ءۇش ەل باسشىلارى بىرلەسكەن مالىمدەمە مەن بىرقاتار قۇجاتتارعا، ونىڭ ىشىندە كولىك جانە لوگيستيكا، كەمە جاساۋ جانە ازاماتتىق اۆياتسيا سالالارىنداعى ىنتىماقتاستىق تۋرالى مەموراندۋمدارعا، سونداي-اق تاۋار-شيكىزات بيرجالارى اراسىنداعى ءوزارا ءىس-قيمىل تۋرالى كەلىسىمگە قول قويدى.
بىرلەسكەن ءباسپاسوز ءماسليحاتىندا كوشباسشىلار كەلىسسوزدەردىڭ ناتيجەسىن جوعارى باعالاپ، قول جەتكىزىلگەن ۋاعدالاستىقتاردىڭ ستراتەگيالىق ارىپتەستىكتى تەرەڭدەتۋدەگى ماڭىزىن اتاپ ءوتتى.
بىرلەسكەن جۇمىستىڭ ءوزارا ساۋدا كولەمىن ارتتىرۋعا، كولىك جانە ەنەرگەتيكا جوبالارىن جەدەل ىسكە اسىرۋعا، سونداي-اق گۋمانيتارلىق سالاداعى ىنتىماقتاستىقتى جانداندىرۋعا مۇمكىندىك بەرەتىنى ايتىلدى.
ساپار باعدارلاماسى اياسىندا كوشباسشىلار ۇلتتىق «گالكىنىش» اتقىشتار توبىنىڭ قويىلىمىن تاماشالادى. قوناقتارعا تۇرىكمەنستاننان تىس جەرلەردە دە كەڭ تانىمال احالتەكە جىلقىلارىنىڭ ونەرى كورسەتىلدى.
قۇرمەت پەن دوستىق بەلگىسى رەتىندە تۇركىمەن حالقىنىڭ ۇلتتىق كوشباسشىسى گۋربانگۋلى بەردىمۇحامەدوۆ وزبەكستان پرەزيدەنتىنە بەرەكە مەن مولشىلىقتىڭ سيمۆولى رەتىندە تۇيە مەن بوتانى سىيعا تارتتى.
جۇمىس ساپارىنىڭ قورىتىندىسى بويىنشا تاراپتار بەلسەندى ءارى ناتيجەلى بىرلەسكەن جۇمىستى جالعاستىرۋعا دايىن ەكەندىكتەرىن راستادى. تۇركىمەنباشى قالاسىنىڭ اۋەجايىندا وزبەكستان رەسپۋبليكاسىنىڭ پرەزيدەنتىن تۇركىمەنستاننىڭ رەسمي تۇلعالارى شىعارىپ سالدى.
اۆازاداعى جيىن كەزىندە قازاقستان پرەزيدەنتى قاسىم-جومارت توقاەۆ بىشكەككە رەسمي ساپارمەن بارىپ، ەكىجاقتى كەزدەسۋ وتكىزىپ جاتقان بولاتىن.
