قىرعىزستان مەن وزبەكستان شەكارانى دەماركاتسيالاۋ ۇدەرىسى اياسىندا ەكى ەل اراسىندا اۋماقتىق الماسۋ جۇزەگە اسىرىلدى، دەپ حابارلايدى "ادىرنا" ۇلتتىق پورتالى.
ناتيجەسىندە ەكى ەلدى مەكەن تۇرعىندارىمەن بىرگە قىرعىز رەسپۋبليكاسىنىڭ قۇرامىنا ءوتتى.
مالىمەتكە سايكەس، قىرعىزستانعا وتكەن ەلدى مەكەندەر – بۇرىن وزبەكستاننىڭ فەرعانا وبلىسىنا قاراستى بولعان چونگارا جانە تاش-توبو اۋىلدارى. بۇل اۋىلداردا شامامەن 2500 ادام تۇرادى، ولاردىڭ باسىم بولىگى ەتنيكالىق قىرعىزدار.
رەسمي اقپاراتقا ساي، ءتيىستى تىركەۋ راسىمدەرى اياقتالعاننان كەيىن جەرگىلىكتى تۇرعىندارعا قىرعىز رەسپۋبليكاسىنىڭ ازاماتتىق قۇجاتتارى بەرىلمەك. ءوز كەزەگىندە قىرعىز تاراپى وزبەكستانعا جالپى اۋماعى 236 گەكتاردى قۇرايتىن شەكارا ماڭىنداعى جەر ۋچاسكەلەرىن بەردى. اتالعان اۋماقتىق الماسۋ ەكى ەل اراسىنداعى شەكارا ينفراقۇرىلىمىن دامىتۋعا مۇمكىندىك بەرمەك.
سونىمەن قاتار بۇل كەلىسىم شەڭبەرىندە ساي جانە تايان اۋىلدارىن بايلانىستىراتىن اۆتوجول قۇرىلىسى جوباسىن ىسكە اسىرۋ جوسپارلانىپ وتىر. جوبا ناتيجەسىندە ايداركەن مەن باتكەن اراسىنداعى جول قاشىقتىعى 225 شاقىرىمنان شامامەن 55 شاقىرىمعا دەيىن قىسقارادى دەپ كۇتىلۋدە.
ايتا كەتەيىك، قىرعىزستان بۇعان دەيىن قازاقستانمەن دە شەكارالىق اۋماقتاردى الماسۋ ماسەلەسىن كوتەرگەن.
