اقتاۋداعى «Monster Aktau» دونەرحاناسىنىڭ يەسى ءىرى داۋدىڭ ورتاسىندا قالدى. وعان سەبەپ – كەلۋشى ايەلدىڭ دونەردىڭ ىشىنەن شاش تاۋىپ العاننان كەيىن ورىن العان جانجال. ينتەرنەتتەگى دەرەكتەرگە سۇيەنسەك، شاعىم ايتقان قىزدى يەسى ساباپ، كەيىن الەۋمەتتىك جەلىدە قازاق حالقىنا جانە ايەلدەرگە اۋىر سوزدەر ايتقان، دەپ حابارلايدى “ادىرنا”.
وقيعانىڭ ۆيدەوسى جەلىدە كەڭ تاراپ، قوعامدا ۇلكەن نارازىلىق تۋدىردى. جەلى قولدانۋشىلارى دونەرحانا تۋرالى جاعىمسىز پىكىرلەر قالدىرىپ، يەسىنىڭ ارەكەتىن سىنعا الدى. بىراق ول كەشىرىم سۇراۋدىڭ ورنىنا قازاقتاردى كەمسىتۋ باعىتىندا اشىق مالىمدەمەلەر جاساعان.
شابۋىلدان كەيىن ەر ادام بىرنەشە ۆيدەو جاريالاپ، وندا بىلاي دەگەن:
«قازاقتار وزدەرىن ۇرىپ، "مەن قازاقپىن" دەيدى، بىراق قازاقستان ءۇشىن تۇك ىستەگەن جوق»;
«مۇنداعى بارلىق زات قىتايدان، تۇركيادان، ازەربايجاننان كەلەدى. قازاقتارعا ءۇيدى كىم سالادى؟ ءبارىن وزبەكتەر مەن قاراقالپاقتار ىستەيدى»;
«ۇلتتىق نامىس تۋرالى ءسوز بولعاندا، قازاقتار دەرەۋ وزدەرىن ۇرىپ، كەۋدە سوعادى»;
ء«بىز ۇلتقا بولىنبەۋىمىز كەرەك. قازاقستان — كوپۇلتتى مەملەكەت»;
ء «ار اقىماق ايەلگە ونى ۇرىپ، تاربيەلەيتىن ەركەك كەرەك. ەگەر ول مەنىڭ ايەلىم بولسا، باياعىدا ۇرىپ تاستار ەدىم».
قازاقستان جۇرتشىلىعى تەك ايەلدى ۇرىپ-سوعۋ فاكتىسىنە ەمەس، سونىمەن قاتار قازاق حالقى مەن ايەلدەرگە باعىتتالعان قورلاۋ سوزدەرگە دە قاتتى نارازى. جۋرناليست ايگۇل ورىنبەك بۇل وقيعاعا قاتىستى قۇقىق قورعاۋ ورگاندارىنا جۇگىنىپ، كىنالى ادامدى جاۋاپقا تارتۋدى تالاپ ەتتى.
«اقتاۋ پوليتسياسى بۇل ادامعا شارا قولدانۋى ءتيىس! ول – ارانداتۋشىلىقپەن اينالىسىپ وتىر. ونىڭ ارەكەتىن قر قك 174-بابى بويىنشا سارالاۋدى جانە بارلىق ۆيدەولارىنا ساراپتاما جۇرگىزۋدى سۇرايمىن»، - دەدى ول.
كوپتەگەن قازاقستاندىقتار «Monster Aktau» مەكەمەسىن جابۋدى جانە ونىڭ يەسىن، وزبەك ۇلتىنىڭ وكىلى بولۋى مۇمكىن دەگەن اقپاراتقا بايلانىستى، ەلدەن شىعارۋدى تالاپ ەتتى.
22 تامىز كۇنى اقتاۋ قالالىق سوتى وسى جاعدايعا بايلانىستى شەشىم شىعاردى.
كافە يەسى بىرنەشە باپ بويىنشا 3 جىلعا باس بوستاندىعىنان ايىرىلدى. وقيعاعا قاتىسى بار اناسىنا 2 جىل شارتتى جازا كەسىلدى. ەگەر ۇلتارالىق ارازدىقتى قوزدىرۋعا قايتا ارەكەت ەتسە، ول دا ناقتى مەرزىممەن تۇرمەگە قامالماق.
