الماتى قالالىق سوتى ءماجىلىس دەپۋتاتى بولاتبەك ناجمەتدينۇلىنىڭ (بۇرىنعى اليەۆ ب.ن.) جۋرناليست ميحايل كوزاچكوۆقا قارسى بەرگەن اپەللياتسيالىق شاعىمىن قاناعاتتاندىرماي، تومەنگى سوتتىڭ شەشىمىن كۇشىندە قالدىردى، دەپ حابارلايدى “ادىرنا” پورتالى قازتاگ-قا سىلتەپ.
الماتىنىڭ مامانداندىرىلعان اكىمشىلىك قۇقىق بۇزۋشىلىقتار جونىندەگى مەجرايوندىق سوتى 2025 جىلعى 7 قاراشادا جۋرناليست كوزاچكوۆقا قاتىستى اقبتك-ءنىڭ 73-3-بابىنىڭ 3-بولىگى («جالا جابۋ») بويىنشا قوزعالعان ءىستى توقتاتقان بولاتىن. سوت ءجۋرناليستتىڭ ناجمەتدينۇلىنىڭ بۇرىنعى سوتتىلىعى تۋرالى جازبالارىندا قۇقىقبۇزۋشىلىق قۇرامىنىڭ جوق ەكەنىن انىقتادى. سونىمەن قاتار، سوت ءجۋرناليستىڭ ۋچاسكەلىك ينسپەكتوردىڭ ارەكەتتەرىنە قاتىستى شاعىمىن قاناعاتتاندىرىپ، پوليتسەيدىڭ ءىس-ارەكەتتەرىن زاڭسىز دەپ تانىعان.
ناجمەتدينۇلىنىڭ ادۆوكاتتارى بۇل شەشىممەن كەلىسپەي، ءجۋرناليستتىڭ الەۋمەتتىك جەلىلەردە جاريالاعان اقپاراتىن «جالا» دەپ تانىتقىسى كەلگەن. الايدا قالالىق سوت ولاردىن تالاپتارىن نەگىزسىز دەپ تاپتى.
سوت ماتەريالدارىنا سايكەس، كوزاچكوۆ جاريالاعان مالىمەتتەر ءجۋرناليستىڭ جەكە ويى ەمەس، ناقتى سوت قۇجاتتارىمەن راستالعان فاكتىلەر بولىپ شىقتى. 2001 جىلعى 8 مامىردا سارىاعاش اۋداندىق سوتىنىڭ ۇكىمىمەن بولاتبەك ناجمەتدينۇلى (سول كەزدەگى تەگى — اليەۆ) قىلمىستىق كودەكستىڭ 308-بابىنىڭ 1-بولىگى جانە 324-بابىنىڭ 2-بولىگى بويىنشا ايىپتالىپ، ءۇش جىلعا باس بوستاندىعىنان ايىرىلعان. كەيىن ول قازاقستان تاۋەلسىزدىگىنىڭ 10 جىلدىعىنا وراي جاريالانعان امنيستيا نەگىزىندە جازادان بوساتىلعان.
سوت ۇكىمىندە اليەۆتىڭ مەملەكەتتىك قىزمەت مۇددەلەرىنە قارسى قىلمىس جاساعانى، لاۋازىمدىق وكىلەتتىگىن اسىرا پايدالانعانى جانە بۇل ارەكەتتەر مەملەكەتتىڭ زاڭمەن قورعالاتىن مۇددەلەرىنە ەلەۋلى نۇقسان كەلتىرگەنى كورسەتىلگەن. 2003 جىلعى زاڭنامالىق وزگەرىستەرگە سايكەس، قك-ءنىڭ 308-بابى سىبايلاس جەمقورلىق قىلمىستارىنىڭ قاتارىنا ەنگىزىلگەن.
وسىعان بايلانىستى سوت كوزاچكوۆ تاراتقان اقپاراتتىڭ زاڭعا سايكەس، ناقتى قۇجاتتارمەن دالەلدەنگەنىن جانە جالا بولىپ سانالمايتىنىن اتادى.
بۇل – بولاتبەك ناجمەتدينۇلىنىڭ جۋرناليستەر مەن بەلسەندىلەردى سوتقا بەرۋگە تىرىسقان العاشقى تالپىنىسى ەمەس. 2023 جىلدىڭ ماۋسىمىندا ول شىمكەنتتە بەلسەندى نۇركەن اينابەكوۆكە قارسى سوتتاسىپ، تاعى دا جەڭىلگەن. اينابەكوۆ دەپۋتاتتىڭ قىلمىستىق وتكەنىن ايتقانى ءۇشىن جاۋاپقا تارتىلماق بولعان ەدى.
