وزبەكستانعا ساپارى بارىسىندا يوردانيا كورولى ابداللا II مەن پرەزيدەنت شاۆكات ميرزيوەۆ سامارقاندتاعى جەرگىلىكتى ءوندىرىس ونىمدەر كورمەسىن ارالاعان، دەپ حابارلايدى "ادىرنا" ۇلتتىق پورتالى Spot.uz سايتىنا سىلتەمە جاساپ.
كورمەدە Sahro Drone Industry كومپانياسى جاساعان ۇشقىشسىز ۇشۋ اپپاراتتارى (كۆادروكوپتەرلەر جانە ۇشاق ءتارىزدى قۇرىلعىلار) تانىستىرىلدى.
Sahro Drone Industry بيىل مامىردا قۇرىلعان. ونىڭ قورى – 10 ملرد سۋم (شامامەن $812 مىڭ).
كومپانيا ۇلەسىنىڭ 90%-ى Top-IT كومپانياسىنا تيەسىلى، ال قالعان 10%-ى وزبەكستان قورعانىس مينيسترلىگىنە قاراستى قورعانىس ونەركاسىبى اگەنتتىگىنىڭ تولىق يەلىگىندەگى MS-Investment-كە تيەسىلى.
وزبەكستاندا ۇشقىشسىز اپپاراتتار ءوندىرىسىن جولعا قويۋ جۇمىستارى ءجۇرىپ جاتىر. «ۋزبەكيستون 24» تەلەارناسى شىلدە ايىندا جەرگىلىكتى كاسىپورىنداردىڭ ەلەكتروندى كومپونەنتتەر مەن باعدارلامالىق جاساقتاما دايىنداۋدا بەلسەندى ەكەنىن حابارلاعان. لوكاليزاتسيا دەڭگەيى 80%-عا جەتكەن.
2022 جىلدان بەرى قورعانىس مينيسترلىگى باقىلاۋىمەن وزبەكستان ءوز برەندىمەن Lochin («لاشىن») اتتى درونداردى شىعارادى. بۇل قۇرىلعىلار اسكەري دە، ازاماتتىق تا ماقساتتاردا قولدانىلادى.
