بۇگىن - قازاقتىڭ ءان ونەرىنە قوڭىر داۋسىمەن، قازاقى بوياۋلى ۇنىمەن قوسىلىپ، ءداستۇرلى ءاننىڭ مايىن تامىزىپ ورىنداعان شەبەر ءانشى بيعازى تۇتقابەكوۆتىڭ تۋعان كۇنى. كوزى ءتىرى بولسا، 50 جاسقا تولار ەدى.
مارقۇمدى جۇبايى گۇلشات تاكەجانوۆا ەسكە الدى.
“ماڭدايىما سىيماي كەتكەن جارىعىم… بيعازىم… بۇگىن سەنىڭ تۋعان كۇنىڭ… ءتىرى بولعانىڭدا، ءدال وسى كۇنى 50-گە كەلەر ەڭ عوي… ەردىڭ جاسىنا كەلگەن تورقالى تويىڭدى وتباسى-وشاق قاسىندا عانا تويلاپ قويماي، التى الاشتىڭ ورتاق تويىنا اينالدىرار ما ەدى؟! ۇلىتاۋىڭ ۇلىقتاپ، يماناعىڭ يلانىپ، تالدىبۇلاعىڭ تامسانىپ جاتار ما ەدى، كىم ءبىلسىن؟! ەسكەنەڭ ەسكەرىپ، تۋعان توپىراعىڭدا، ءوزىڭ ماڭگىلىك مەكەن تاپقان جەرىڭدە، قايرات اعانىڭ 50 جاسىن جاساعانداي، ات شاپتىرىپ، توي جاساپ بەرەر ەدى، بالكىم. “بيعازيا 50 جاس” دەپ تاسپەن قاشاپ جازار ەدى. ارقا جۇرتى القالاپ، “ەلگە كەل، كونتسەرت بەر!” دەپ قولقا سالار ەدى. جاڭارقاڭ جادىراپ قارسى الار ەدى. ءجون بىلەتىندەر شاپان جاۋىپ، ات مىنگىزەر ەدى. ء“بىز بيعازىمەن جەرلەسپىز، ول ءبىزدىڭ ەلدىڭ ازاماتى” دەپ اتالاستارىڭ اتىڭنىڭ ءوزىن مارتەبە كورىپ،اعايىندارىڭ ماقتان تۇتار ەدى. بىراق.. ول ەندى ورىندالماس ارمان عانا. ءوزىڭ جوقسىڭ…”كوزدەن كەتسە، كوڭىلدەن بولادى ۇمىت” دەگەن وسى بولار. ءوزىڭدى تانىعانداردىڭ كوبىنىڭ جادىنان ءوشتىڭ، كوڭىلدەرىنەن كەتتىڭ. اللانىڭ ىسىنە امال بار ما؟!” دەپ جازدى گۇلشات تاكەجانوۆا Facebook پاراقشاسىنا.
مارقۇمنىڭ جۇبايى ەسكە الماعان ەلىنە قاپالى.
“رۋحىڭدى سىيلاعان، وزىڭمەن دامدەس بولعان بىرەن ساراننىڭ عانا ەسىندە قالعانىڭ بولماسا…ەلىڭ دە ءۇنسىز. اۋىلىڭنىڭ اتقا مىنەرلەرى اۋىز اشپاي قالدى. كىمگە نازىمدى ايتايىن؟! كىمگە بارىپ، جەر باسىپ جۇرمەگەن جارىمدى ۇلىقتاڭدار دەپ ايتايىن؟!” ەلىم دەپ ەمىرەنىپ تۇرار ءوزىڭنىڭ كوزىڭ كەتكەن سوڭ “ەرىم دەپ ەمىرەنەر” ەل دە جوق ەكەن عوي! بۇل كۇندە ارقادان ءان كوشىپ كەتكەندەي، ونەر اۋىپ كەتكەندەي. بيعازى دەگەن ونەر قونعان پەرزەنتى بولماعانداي بۇل ەلدىڭ. ۇمىتىپتى… سەن ءبارىن سەزىپ، ءبىلىپ جاتىرسىڭ. بىلەمىن. قوس قاناتىڭ - ۇلىڭ مەن قىزىڭدى جەتىمدىك كورسەتپەي جەتكىزدىم. بيبارىسىڭ جانىڭدا.. وزىڭە شاپاعاتشى بولسىن دەگەن عوي جاراتقان.. ال الماسىڭ مەن كاكوشىڭ ەكەۋى دە ونەرلى، دارىندى بوپ ءوستى. قان قويا ما؟! بويلارىندا تۋلاعان قانى تىنىش جاتقىزا ما؟! جوعارى وقۋ ورنىنان ديپلومدارى بار. ءبىلىمدى، بىلىكتى. ۇلىڭ رەجيسسەر، كومپوزيتور، اقىندىعى دا بار. قىزىڭ مىقتى ءانشى، كومپوزيتور. “بولام دەگەن بالانىڭ بەتىنەن قاقپا بەلىن بۋ” دەپ، وسى بالالارىڭا جاقسىنىڭ كوزى عوي دەپ جول سىلتەپ سۇيەنىش بولار جان بولسا دەيسىڭ، شىركىن! اتتەڭ- اي، اتتەڭ! ءوزىڭ ءتىرى بولعاندا ءبارى باسقاشا بولار ەدى عوي…
كەۋدەمدە جانىم بولسا، بالاپاندارىڭ امان بولسا، ەل-جۇرتىڭنىڭ الدىندا بيعازى دەگەن اتىڭدى ءبىر ۇلىقتارمىن. ازىرگە قولىمنان كەلەرى وزىڭە ارناپ قۇران باعىشتاۋ عانا. ريزا بول، جارىعىم…” دەپ ەسكە الدى.
