پرەزيدەنت قاسىم-جومارت توقاەۆ قحر توراعاسى سي تسزينپينمەن كەلىسسوزدەر جۇرگىزدى، دەپ حابارلايدى "ادىرنا" ۇلتتىق پورتالى.
كەزدەسۋ تاريحي تيانتسزين قالاسىندا ءوتتى.
اقوردا مالىمەتىنشە، مەملەكەت باسشىسى جىلى قابىلداۋ ءۇشىن سي تسزينپينگە العىس ءبىلدىرىپ، شانحاي ىنتىماقتاستىق ۇيىمى سامميتىنە قاتىسۋعا شاقىرعانىن ريزاشىلىقپەن اتاپ ءوتتى.
"قازاقستان شىۇ اياسىنداعى قىتايدىڭ توراعالىعىن تولىق قولدايدى جانە ونىڭ كەڭ اۋقىمدى كۇن ءتارتىبىن ىلگەرىلەتۋگە بەلسەندى اتسالىسادى. ءسىزدى ەكىنشى دۇنيەجۇزىلىك سوعىستاعى جەڭىستىڭ 80 جىلدىعىمەن جانە جاپون ميليتاريزمىنە قارسى قىتاي حالقىنىڭ ەرلىككە تولى جەڭىسىنىڭ 80 جىلدىعىمەن قۇتتىقتايمىن. قىتاي حالقىنىڭ فاشيزمگە قارسى كۇرەستەگى باتىرلىعى مەن ەرلىگى بارشا قۇرمەتكە لايىق", – دەدى پرەزيدەنت.
قاسىم-جومارت توقاەۆتىڭ ايتۋىنشا، سي ءتسزينپيننىڭ قولداۋىمەن قازاقستان مەن قىتاي اراسىنداعى «ماڭگىلىك جان-جاقتى ستراتەگيالىق ارىپتەستىك» بۇرىن-سوڭدى بولماعان دەڭگەيدە دامىپ كەلەدى. وتكەن جىلى ەكى ەل اراسىنداعى ساۋدا اينالىمى رەكوردتىق كورسەتكىشكە جەتكەن.
پرەزيدەنت بۇل قارقىننىڭ بيىل دا ساقتالىپ وتىرعانىن اتاپ ءوتتى. قىتاي – قازاقستاننىڭ ەڭ ءىرى ساۋدا سەرىكتەسى. سونىمەن بىرگە ءىرى بىرلەسكەن جوبالار جۇزەگە اسىرىلىپ جاتىر. مەملەكەت باسشىسى ساپار اياسىندا قازاقستان-قىتاي ىسكەرلىك كەڭەسىنىڭ وتىرىسىنا قاتىسىپ، بىرقاتار قىتايلىق ءىرى كومپانيالاردىڭ باسشىلارىمەن كەزدەسۋدى جوسپارلاپ وتىرعانىن جەتكىزدى.
سونىمەن قاتار، 2025 جىلدىڭ قازاقستانداعى قىتاي ءتۋريزمىنىڭ جىلى بولىپ ءوتۋى ەلدەر اراسىنداعى مادەني-گۋمانيتارلىق بايلانىستارعا تىڭ سەرپىن بەرمەك. بۇعان دالەل – قازاقستاندا لۋ بان شەبەرحانالارىنىڭ اشىلۋى جانە بەيجىڭدە قازاقستان مادەني ورتالىعىن قۇرۋ تۋرالى شەشىم.
ايتا كەتەيىك، قاسىم-جومارت توقاەۆ بۇگىن تيانتسزينگە شانحاي ىنتىماقتاستىق ۇيىمىنىڭ سامميتىنە قاتىسۋ ءۇشىن كەلدى.
