رەسەيدىڭ سىرتقى ىستەر ءمينيسترى سەرگەي لاۆروۆ ۋكرايناداعى ءبىتىم شارتتارى تۋرالى سۇحبات بەردى، دەپ حابارلايدى "ادىرنا" ۇلتتىق پورتالى Caliber.Az-عا سىلتەمە جاساپ.
لاۆروۆتىڭ ايتۋىنشا، ۋكرايناداعى ءبىتىمنىڭ باستى شارتى – رەسەي قۇرامىنا جاڭا اۋماقتاردىڭ قوسىلۋىن حالىقارالىق دەڭگەيدە مويىنداۋ.
«بەيبىتشىلىك بەرىك بولۋى ءۇشىن قىرىم، سەۆاستوپول، دحر، لحر، زاپوروجە جانە حەرسون وبلىستارى رەفەرەندۋم ناتيجەسىندە قوسىلعاننان كەيىن پايدا بولعان جاڭا اۋماقتىق شىندىق حالىقارالىق-قۇقىقتىق تۇرعىدا مويىندالۋى جانە راسىمدەلۋى قاجەت»، – دەدى رەسەيلىك مينيستر.
بۇدان بولەك، رەسەي ءسىم باسشىسى «بەيبىتشىلىك رەسەي قاۋىپسىزدىگىنە تونەتىن قاۋىپتەر جويىلمايىنشا مۇمكىن ەمەس» ەكەنىن، وعان ناتو-نىڭ كەڭەيۋى دە كىرەتىنىن ايتتى.
سونىمەن قاتار، ءبىتىم ءۇشىن ۋكراينا بەيتاراپ، اسكەري وداقتارعا قوسىلماعان جانە يادرولىق مارتەبەدەن تىس ەل بولۋى قاجەت ەكەنىن جەتكىزدى.
